YY08的部落格

20231228

日期: 28/12/2023

農曆: 十一月十六
地點: 交倚南丫對開海面一帶
艇家: 朗仔自駕
釣友: 朗仔、阿康、阿甘、華仔、YY
天氣: 天晴、東風4級
水流: 中速流、水質不俗
釣穫: 黑格 x 5、花惑一堆、埋單八、九斤

是咁的，話說朗仔自上次夜水通頂搵紅鮋之後就返英國繼續學業。而佢趁聖誕長假就會回港度假，所以一早都同我地講定話返黎同我倆去釣魚，所以我地就約好左今次釣行。出發前幾日就研究釣邊度，本身我同華仔之前一路都研究釣櫃底嘅，不過朗仔就話見天文台好似話預報收東風3–4級，想試下出去浦台島對出天然氣一帶搵下青斑、鱲魚；咁既然佢有想法，櫃底又隨時都釣得，如果天氣好夠哂晴的話咁按道理就梗係釣啲平時唔係隨時都出得到嘅釣點啦。就係咁樣，我地就決定「遠征」天然氣。

出發得天然氣，朗仔就話叫我地搵人試下勾頭蝦，佢就睇情況先釣蝦仔；所以我就約左華仔係筲箕灣街市會合買棕蝦先再上船。點知我就到街市時華仔先打電話黎話啱啱先訓醒叫我街市揀住蝦先；咁我就打比朗仔叫佢係筲箕灣對出駁位釣住先，我同華仔買完蝦再會合佢。

卒之等到華仔買完棕蝦落到艇都成10點，朗仔佢地已經先釣到幾條石狗梳蘿了。二話不說，我地就往東面直奔。問阿朗仔今日目標有啲乜，佢就話搵下青斑鱲魚，一個唔覺意紅運起上嚟紅斑白立都有得中；嘩，乜真係咁樂觀咩？一路車都唔係好見有艇仲心諗正呀，出到去就更加無艇，飲頭啖湯仲唔係今日？本身我仲話不如車浦台開外釣，會唔會經到橫欄個公廁位釣返一兩寨睇下會唔會有料。點知再車多陣，已經覺得好大風大湧，船頭對正橫欄車係食哂湧浪，於是決定放棄車向橫欄，改而車向浦台螺洲方向。船頭食湧浪程度即時減低，但望落去個湧差都有成2米高，真係幾癲。繞過螺洲門時風浪即時減弱，但係一轉個彎車出去天然氣方向就即時風高浪急。

終於頂住風浪車到去釣點，但係見到啲湧真係推到成2米幾，再加上車過嚟時一路食浪搞到我都濕左半個身，隊友都不遑多讓，大家諗過度過，都係決定轉換釣點。換上防水膠衣之後我地就艇西車，向住南丫、交倚方向出發。車左幾個字，終於到達釣點，我地都笑笑口話咁就差唔多環左香港島一周了。望下隻錶、都十一點半有多，無辦法，本身落艇就已經晏，仲要忽發奇想出左去一個本身係唔應該會出到嘅釣點，然後又要再兜大彎去返過嚟交倚外，結果落得繩黎已經差唔多係正午時份。

大家都急不及待落餌，又真係好快咁樣就見勾蝦仔嘅朗仔先拔頭籌，首先上水嘅係一條良型花惑，大家都即時加強左戰意。不過跟手呢一寨都無魚上，返寨之後就到阿康中多條花惑上水，但都係成寨得一條，咁呢一帶釣點既特色就係排口細但多，所以呢一個寨無乜魚我地就車去附近隔離下一個。睇下邊一個排口聚到魚。由於我係用棕蝦做餌，所以基本上我都係諗住唔會諗住釣花惑，係睇下會唔會有啲大條嘅黑鱲同埋班條釣到下，所以都無乜預期會有食餌。但係新到排口可能就真係有啲餓鬼黑沙係度，所以我一落餌就即刻感覺到有食餌，噠噠兩下，再拉一下，隻棕蝦就比魚偷左。趁個位仲對到正，即時勾隻棕蝦落去再砌，又係差唔多一落就即啪，又係噠噠兩下就比佢拉走左；連續兩口食餌都逗唔到，認真失策！跟住可能啲魚已經畀兩隻中蝦餵飽，所以就無食餌，連其他惑魚嘅食餌都無，於是我地又再車去下一個排口。

如是者周圍車啲排口，都係一個排口執一兩條花惑，不過朗仔都終於執返條黑沙。然後之前掛住晾番啲雨衣嘅阿康呢個時候搞掂哂啲雨褸之後即時都中返條黑沙了，我就講笑咁話專心返釣魚既阿康真係寧舍唔同，真係會吸魚嘅。

華仔本本都勾蝦仔但都無乜料，我就一路叫佢話加入我勾下頭蝦啦，佢話讓住賽先，想蝦仔中返條花惑先再黎勾頭蝦搵大魚。點知釣左咁耐都無乜花惑中到，佢就轉架餐勾頭蝦。無幾耐真係有食餌，不過可能啲黑沙唔夠大條又或者好精口，所以唔到釣，於是華仔唯有出動秘技 — 卑鄙鉤釣法，啊又真係比佢砌條斤頭黑沙上嚟喎，真係唔到你唔服。

至於阿甘，則又青虫又南極蝦都無料之外用返蝦仔卒之都中返條黑沙仔，唔駛龜。繼續不停有魚繼續釣、無料轉排口。終於車到有一個排口，去到尾時就開始有魚食餌，首先中魚嘅係阿康，又係一條黑沙。跟手返寨又係去到排尾時又有魚食餌，諗住贏硬大魚獎嘅華仔見到阿朗呢個時候起手，要就魚，再上水，係一條約斤半鬆啲嘅黑沙鱲，睇落去剛好贏左華仔果條半個馬鼻呢！再返寨又係排尾有魚食餌，今次係華仔有食餌，點知起手收左兩下之後甩左！睇個勢絕對係會贏到朗仔剛剛上水果條，不過上唔到水無辦法啦，唯有繼續再釣。不過之後就搵唔到黑沙，再返寨都係阿康執多條花惑，於是釣多寨我地又再轉位。

跟住個排位好有趣，無魚食餌，但係釣釣下我就感覺到有野係咁拉，咁嘅拉法都似係墨魚；咁既然係墨魚梗係慢慢收，不過有一兩口都係收到一半就鬆左口。跟住釣釣下，今次又係有野扯住我隻蝦，不過力度更沉，睇嚟係一隻大墨魚，收左兩下我見佢都仲扯得好實，於是就叫撈箕，然後就繼續一手一手咁收，船頭阿康聽到我大叫就已經去拎大撈箕，然後就遞比坐我隔離，慢慢收緊副繩嘅阿甘，我就不以為意啦繼續一手一手咁收，終於就見到隻墨魚跟到上水面，嘩，巨物一隻，睇落都成4斤幾5斤，點知阿甘仲未準備好撈魚，我唯有鬆返些少隻蝦，希望隻墨魚會攬耐啲；等多幾秒，阿甘終於拎好撈箕過來，不過佢可能經驗唔夠，只見佢慢慢插個撈箕入水、在墨魚的尾部那邊慢慢兜過來，點知阿墨魚大哥呢個時候忽然醒覺，鬆開左我隻蝦，然後輕輕一噴，就避開左個撈箕，然後慢慢潛回大海，剩低你眼望我眼嘅阿甘同埋我。無辦法啦，經驗不足，唯有吸取教訓，來個檢討、下次做好啲啦。不過轉頭有墨魚食餌嘅，竟然唔係用緊棕蝦嘅我同華仔，而係用蝦仔嘅朗仔；上到水面，華仔輕輕幫手一兜，一隻約6両重嘅小墨就上水，但係我同華仔都話，連墨魚都比朗仔中埋，真係比佢玩哂啦。哈哈。

繼續作釣，又唔見墨魚食餌，我地就轉去另外嘅排口，但就真係好有趣的是除左果個排口之外，全日都無排口遇到過墨魚食餌，但係果個排口就真係起碼有成5、6口墨魚食過餌。釣下釣下，時間都差唔多，我地決定又車返去今日正午時開始作釣的那兩個排口睇下撞唔撞得返今朝食餌但唔到釣嘅果幾口黑沙。第一個排口係無嘅，但係第二個排口釣釣下，華仔又有起手，不過又係收左兩手就甩左，注定破唔到朗仔今日條大魚獎。釣多陣，又夠5點，又係時候繞繩走人。

雖然今日我真係龜左，但係其餘朋友仔都總算執返身彩有啲魚釣到，咁樣輕輕鬆鬆釣返日、嘻嘻哈哈吹下水咁樣其實真係已經夠開心，果啲要拋到七彩又濕身嘅，都係留番比熱血嘅釣魚人去玩喇，哈哈。點都好，下次釣過啦朗仔，到時你應該就已經順利畢業返黎香港，跟住我地就可以都定期做世界喇。