YY08的部落格

20241012

日期: 12/10/2024

農曆: 九月初十
地點: 維港西對開海面一帶
艇家: 朗仔自駕
釣友: 大表妹、細表級、朗仔、YY、 (戰地記者揸事扒)
天氣: 天晴、東風5級
水流: 慢流、水質不俗
釣穫: 細鱗 x 5 (3斤半 x 1、磅頭 x 3、 手板 x 1)、雞籠鯧 x 1 (斤半) 、青鱸 x 1 (斤半) 、什魚少許、埋單十斤

是咁的，話說今次維港表妹釣魚團已經籌劃咗一年有多，因為原本上年已經計劃出發，但最尾因為一啲小意外所以只能延期。

今年終於等到朗仔喺外國返嚟，咁我梗係即刻再次安排今次嘅釣行。

八月尾嘅時候已經約定大家要攞日子出嚟夾期，最後就揀咗重陽節出發。不過其實我哋都有啲小蝦碌出現；就係本身我哋會上阿康隻艇，不過阿康就可能唔清楚我哋有咁多人而另外約多咗幾位朋友釣魚，所以最後我同朗仔只好喺將軍澳釣魚俱樂部另外再租一隻快艇。咁樣都冇問題啦，自己幾個玩自由度仲大咗添。

然後出發前幾日阿朗仔又話到時會帶一位攝影朋友做戰地記者，真係搞笑。

跟住再睇下天文台天氣預測，嘩，真係不得了，成四五級東風，即刻心都打個突，咁大風，情況可能真係會幾惡釣喎；但係冇辦法啦，咁難得大家就到時間，碌多少少浪都要出發㗎啦。

出發當日，約好咗表妹佢哋喺銅鑼灣集合，補給完之後我哋就行出避風塘等朗仔嚟接我哋。落艇之後再去埋尖沙咀接過戰地記者，我哋就首先車去中上環一帶開始作釣，事關朗仔早一日啲朋友喺中環碼頭對出一帶釣咗成三四十斤雜魚，咁我哋就梗係想去睇下會唔會有啲好嘢執到啦。

不過風大就浪大，再加埋船浪，情況都唔係太理想。況且呢個時間流水唔係好行得郁，釣咗一兩寨都冇食餌，再又加上有隻海事處巡邏艇喺附近，我哋於是決定車去昂船洲出水石果面釣，睇下避下風之餘又會唔會執到幾條火點。其實本身我同朗仔都計劃嚟呢度釣，不過呢度石口好嚡，係怕久疏戰陣嘅表妹們未釣到魚就先係咁勾石，所以先諗住比佢地釣下其他較容易嘅釣點、熟習一下、回憶返啲手感先過嚟釣；但奈何喺中航道一帶又大風又冇乜魚食餌，咁唯有早啲入嚟一路避風一路搵火點。

因為怕表妹佢哋會不停勾石，我決定幫佢哋綁咗子彈鉛加賴腳釣組，希望藉此減少損耗之餘又可減少勾石機會；至於我自己就梗係釣波子壓底。

當我滿心歡喜諗住睇下喺呢度會執到幾多條火點嘅時候，郎仔呢個時候竟然抽咗一條磅頭黑沙上嚟做開齋魚，真係估你唔到。

之後我哋繼續喺度釣，但係竟然一口火點食餌都無，朗仔話睇嚟都係早一兩日比人喺度爆完夾萬嚟。

既然冇食餌但係石口又鞋，咁我地決定離開呢度，車出去「華仔青班位」 一帶搵下雜魚釣。

呢度啲風畀昂船洲嗰邊大番少少但係都畀喺中航道果邊細。即管睇下釣落會有啲咩魚搵到啦。

第一寨就完全冇食餌，而車咗個隔離排口釣就叫做有啲魚仔化餌。化咗一寨餌之後返流再釣，今次又係朗仔起手，然後就見到一條手板大嘅細鱗上水。見到條咁嘅細鱗我就講笑話點解人哋釣就釣幾斤嘢嘅貨色，我哋就釣埋曬啲放生級別嘅大細。

之後都冇口我哋就又再車過少少去另外一個排口。釣咗一陣又係見到朗仔起手，今次係一條手板大花頭梅。

呢個時候，望下個鐘，都成十一點，而除咗艇佬以外嘅其餘三位釣手仍然一個都未開齋…

跟住再車過少少終於嚟到青班位，但係大家依舊係無食餌。點算， 唔通今日真係咁惡劣，我哋幾個都要鎩羽而歸？帶表妹們出來玩嘅表哥我開始有啲壓力，但係都只能表示無能為力。呢個唔係技術層面嘅嘢，而係上天嘅不可抗力喎。

跟住唯有叫朗仔再轉位，我哋見到不遠處有隻漁艇喺附近落網，並正對住我哋車緊去嘅嗰個位駛去，於是朗仔即刻加速搶閘，即時抵壘，壓正喺個排口上面。漁艇見我地「霸咗」佢地想落網嘅位置只好敗走改善方向往第二邊駛去繼續落網；而我地就梗係要好好把握呢個得來不易嘅釣點啦。

果然，隔左無耐，今次只見細表妹支竿有所動靜，呆左大半朝嘅表妹一時反應不過來，以為只是勾石，但係我同朗仔都見到條魚絲已經行緊，九成九係魚，於是朗仔都開口提阿表妹話「呢條係魚嚟架，唔係勾石呀你，快啲收繩啦」。表妹好耐無釣過魚，一早就早條有份量嘅魚，一時都唔係好記得點樣收魚；於是我只好從旁再次指示佢要一下一下咁樣收頂，而有點雞手鴨腳的細表妹都終於慢慢掌握得到，將魚慢慢收上來水面。我就梗係一早撈箕準備在旁等條細鱗一見影就兜佢上水啦。點解會話係細鱗？因為睇個條魚絲走水嘅情況，都有七、八成肯定會係細鱗了。果然一見魚影，係條磅頭細鱗呢！但係好耐無中過撈箕魚嘅細表妹根本唔記得左要等我用撈箕幫手撈魚，所以佢係直接想引拔、直接彈條魚上來。不過我見到佢想咁做時即時叫停，然後立即將條細鱗兜左入網拎上水面。就係咁樣，除左艇家之外嘅釣友終於開齋，而釣行前嘅其中一個目標亦都已經達成一半，就係希望今日表妹們都能釣到撈箕魚，而家細表妹首先達標！希望大表妹喺餘下時間都可以中埋撈箕魚咁今日就真係完全達成最主要目標啦。至於我釣唔釣到，其實都只係錦上添花〝畢竟我比佢地釣魚機會多咁多，難得佢哋出到來釣，梗係希望佢地可以中到魚先啦。

難得搵到魚，梗係唔好比佢停！即刻落繩繼續釣，但可能過左寨，所以朗仔都即刻叫返寨，仲話今次壓到個排口正一正，即管睇下係咪真係有運行先？大家落繩無耐，今次又係細表妹支竿有反應呢；只見釣釣下突然佢支竿就一下沉左落去，表妹仲以為係勾左石，但係我同朗仔都見到佢支竿頭彎落去之餘、條魚絲仲係走緊繩，所以朗仔都出聲同細表妹講話「放心抽竿同收線啦，係魚嚟架。」於是表妹就放心抽竿頂魚啦。今次條魚明顯比剛才條磅頭細鱗大呢，只見表妹收頂得比剛才上細鱗時更為吃力，而我則想比佢自己練習上魚而只係喺佢旁邊睇住佢一下一下咁收；但係可能佢磅頂同剎車都調較得有點鬆嘅關係，所以玩左一陣都好似無乜進展，條魚絲都仲有啲出剎添。正當我睇睇下、食花生之際，呢個時候我條繩都好似有野扯，咁我咪抽起魚竿，然後感覺到有魚走水，咪即時同細表妹講話「嘩，你中我又中喎。嗱，唔駛玩得咁辛苦架，放鬆啲，好似我咁慢慢一下一下慢慢絞就得架啦」就係咁樣我同細表妹兩個一齊收繩，收收下，見到魚影，但係只得一條，原來係細表妹磅頂較得太鬆、條魚周圍咁樣游，攬埋我副繩，搞到我都以為中魚！所以真相其實就係得細表妹一個中魚，而條魚就攬埋我副繩，跟住我就同表妹兩個都一齊各自收繩，間接咁樣合力夾手夾腳地收左條魚返嚟；咁既然知道只係得一條魚，咁我就梗係放低我支竿，然後去拎撈箕，幫細表妹兜魚啦！講返條魚，我同朗仔一開始都估係細鱗，結果上到黎見魚影時，卻見到係一餅雞籠鯧，不過唔理啦，都係咁樣撈架啦；指示細表妹唔好將條魚就咁掟上嚟、而係慢慢收到水面，跟住我就快快一兜，一條斤半有多嘅雞籠鯧就上左嚟喇！嘩，都真係幾大條喎。細表妹好野！釣得一條大過一條呢。

既然搵到個有魚嘅排口，咁梗係趁未玩爛之前繼續磨啦。返寨繼續釣，今次見到朗仔起手，係一條雞魚仔，而我都即刻有食餌，輕輕一抽，魚唔大但都做開齋魚啦，上到水一睇，手板火點仔一條。朗仔見到即時就話「嗱，咪有火點囉，不過唔喺入面出水石中咋嘛，哈哈」點都好啦，開到齋點都叫做好開始，希望下條魚會係撈箕魚啦。不過之後釣多一兩寨，都無食餌，我地又再移動去下一個排口啦，今次到我有魚食餌先，上水係一條大舅父。真係「人地就釣果啲，我就釣呢啲」嘅最佳體驗。放返條魚落海就繼續釣，但係都無食餌，望下個鐘，都十二點幾，風都仲係幾勁，見啲浪頭都仲係四五級得嘅白頭浪，暫時都係車唔到埋去中航道一帶作釣架啦，朗仔諗一諗，就決定過洲頭果面釣，睇下搵唔搵到啲細鱗、鱲魚釣到咁。

即時繞繩，車過青洲果面，沿途我地都唔可以全速車艇，因為風大有機會打浪上艇，所以都係慢慢車；大約車左十分鐘啦，終於車到釣點。朗仔話呢度個排口好大，有排玩，於是我地就車去深水少少果面作釣先。釣左寨無口，又再移位，朗仔就話呢個係皇牌排口位，呢度都無食餌佢都諗唔到點算好。通常我地唔會一開始就壓正排位而係慢慢喺排口邊一路釣上去，不過今次一到埗朗仔就話已經直接壓左上排頂喎，咁又即管睇吓有無食餌啦。大家一落繩，靜左成個上午嘅大表妹呢個時候即刻有反應喎，只見坐我隔離嘅佢無聲無色咁樣抽左一下竿，然後就見到支竿彎左，咁即係中魚啦，見佢收魚時都唔能夠輕鬆咁樣攪，咁條魚都應該有返啲份量喎；朗仔就話似係青鱸啦，呢個位早排佢釣完都係有青鱸釣到，而家睇個勢，唔似細鱗，咁估佢都係青鱸啦；大表妹繼續一下一下咁樣收魚，條魚唔係好識爆，但係份量始終係度，所以都只係慢慢咁樣逐下收上嚟；終於見到魚影啦，果然係青鱸一條！作為小魚童嘅我一早已經準備好撈箕，見到魚影，已經即時兜魚，但係大表妹可能真係太耐未釣到過撈箕魚，所以竟然諗住引拔條魚，還好我在佢引拔條青鱸之際，已經兜底撈住條魚。雖然條魚又唔係真係好大條，但始終用撈箕穩陣啲嘛。所以條斤半青鱸上左水之後我都繼續碎唸佢，話佢知釣到呢啲斤幾兩斤嘅魚時，盡量都唔好就咁飛條魚上嚟，而係應該穩陣啲搵個撈箕兜一兜，以防萬一。

大表妹上完條青鱸，我都即時鬆一口氣，因為今日釣行目標就係令到大細表妹倆個都可以中到撈箕魚，而家佢地兩個都起碼一人一條斤裝魚，總算目標達成咗呢。完左第一個目標，就梗係設定第二個目標啦，就係睇下我地會唔會人人都呔到維港名物細鱗了。繼續釣，無口，於是就移去排口另一端，今次落繩無耐，我就見到朗仔起手了，不過佢一中完魚，並唔係自己上魚，而係交條繩比同佢傾緊偈嘅戰地記者。見到揸事扒喺朗仔嘅指導之下一下一下咁樣收，而朗仔由中魚一刻都幾可肯定條魚會係細鱗，於是大家都係度等睇條魚上水一刻。見到魚影，果然係一條磅頭細鱗，於是朗仔撈箕都唔駛就叫揸事扒直接飛條魚上來，就係咁樣，我地生倉又多一條維港名物了，雖然，唔係表妹們中到，但點都好，起碼都叫搵到魚，可以放心係度繼續磨。

釣左一陣，今次輪到大表妹有反應啦，見佢又係靜靜雞咁樣抽竿，然後又要頂魚，點知頂左兩下，跟住聽到一聲「慘叫」，就見佢條魚絲無哂拉力，應該就係甩魚了！收返魚絲上嚟，原來連條鉤都無埋，咁即係中魚之時頂左兩下就比魚條𠝹斷左魚絲啦。以朗仔都幾肯定條魚係細鱗嘅同時，我估計都係條魚已經食到入扣大表妹先至有反應逗魚，然後條魚副牙呢個時候咁啱就剪左到繩、整斷左條魚絲而甩魚了。真係可惜，差啲就可以比佢地玩到多條撈箕魚，不過點都好啦，其實大表妹都叫中左細鱗架喇，只係唔好彩把握唔到啫，吸收左經驗，下次應該會進步架喇。

釣左一陣，我條繩有野拉喎，但係又唔似魚食餌，朗仔都話好似有墨魚喺下面攬蝦；咁係啦，基本我呢口都係墨魚黎，於是慢慢引隻墨魚上嚟，叫表妹地準備撈箕，然後引到隻墨魚上水面之時，細表妹則慢慢伸個撈箕落去，墨魚見狀，即時噴水，嚇得細表妹縮手。等佢回一回過神，隻墨魚仲喺水面未走，顯然好貪心想搵返剛剛隻蝦；細表妹再伸個撈箕落去想撈佢，可惜對唔慣用撈箕嘅人嚟講其實真係唔易，最後墨魚仔只有不甘心咁樣逃離現場。其實我都無預計過佢地會撈到隻墨魚，不過由食餌過一下我已經知道隻墨魚唔大隻，咪唔出聲由佢地自己玩下囉，反正拎唔拎到我都無咩所謂，我嘅目標好明確，就係魚！走左口墨魚之後，都無乜食餌，我地又再移位了。

一個排口都有時有啲位多石有啲位相對少石，咁通常我地都會一路釣一路報告比大家知，等大家有個心理準備試底可以試密啲定係輕鬆啲。咁樣我地又係一路釣一路「互通消息」啦，然後釣釣下我就話「喂，開始上石啦」，咁表妹地都有輕輕提高釣組嘅，跟住過左唔夠半分鐘，就聽到細表妹「哎」咁嘆左一聲，正常佢以為又係勾石之時，朗仔話唔係喎，魚嚟喎，放心抽啦，跟住細表妹就又係一下一下咁樣收魚絲啦，果然，又一條磅頭細鱗上水了！嘩，細表妹，今日最佳釣手仲唔係你？釣親都撈箕魚喎。

不過食埋呢口餌之後，我地喺呢個位都係得我一條放生大舅父，於是我地決定繞繩去下一個排口釣。車左中山公園對開大海位，釣左大半個鐘，都係得我一口手板石崇釣到，望下個鐘，三點幾，唔通真係今日就係咁樣玩完？我又覺得唔會嘅，釣魚嘅野，一日唔完場，一日都仲有希望嘅，上星期櫃底我同阿丹咪又係磨到5點幾先開始有奇蹟食餌黃金時段。

不過釣到成4點，都無口，咁啱之前兩點幾阿康打電話過嚟問朗仔釣況時，知道佢地係中上環果面釣緊呔到4條細鱗，咁我同朗仔就話，見風收返細咗少少，留返兩寨時間比我返去中上環主場搏殺，事關今日就剩低我一個仲係未有似樣少少嘅魚釣到，雖然話好想表妹地釣到撈箕魚啫，但都可以照樣分返一口半口食餌比我㗎嘛。

呔埋中山公園排口都無食餌我地就繞繩直奔主場位置，表妹地都未知呢度嘅主場威力有幾強，但我都叫表妹們換隻大啲嘅生蝦落去，睇下搏唔搏到粗野。至於我自己，兩門釣組就唔駛講啦，底果門我仲一次過勾夠兩隻蝦仔，希望可以比啲大魚垂青，一個唔覺意食落嚟咁我就真係標個尾會啦…

魚我就未有得中，石就有得勾先，釣左陣，我就上門果一門勾左石，整斷左，不過唔理啦，我都費事綁過直接同下門勾換過隻蝦就繼續釣，爭取時間吖嘛。落左隻蝦都無兩分鐘，突然好似有口食埋嚟，我自然反應一抽，跟住就感覺到條魚絲係咁去，即時已經提竿同攪魚，但係條魚個來勢真係有點猛，我隻攪個剎車只有出線嘅份兒，我只能魚用手指壓線杯勉強等啲魚絲唔好出得咁快，然後盡可能咁樣收頂…收得幾下，條魚又爆，魚絲就又出剎車了，嘩，唔通中牛廣？個勢唔嘢少喎，就咁睇條魚都起碼兩三斤呢，但我根本無時間諗太多，只能夠專心應付條魚，同埋個線杯，收得幾下，又要手指壓杯，收多幾下，又要頂魚，就係咁樣，收下放下，條魚都叫離哂地、諗住可以慢慢收伏佢啦，點知呢倨時候又有小狀況出現，就係我隻攬突然之間空轉左，應該係齒輪轉空左食唔到另一個齒輪，所以突然之間絞唔到絲！隨之而嚟嘅狀況就梗係條魚絲虛左啦，我都即時慘叫左一聲，心諗慘了，條魚無了，因為以往唔係未試過虛完絲之後走左條魚呢；不過唔理得咁多了，隻攪虧虧地，都係用手拉下條魚絲睇下咩環境先；拉頭一兩下都係虛線，到拉第三下，又感覺到重量喎，咁即係條魚仲未走啦，雖然知道係布線用手扯係會燒手㗎啦，但係對龜左全日嘅我嚟講，呢個時候仲邊理得咁多，於是二話不說，兩隻手都揸住副布線準備一手一手咁收魚絲，可幸嘅係，條魚剛才同我喺用竿搏鬥嘅時候都消耗得七七八八，所以當我手執魚絲嘅時候，其實佢都無乜力還拖，我所需要做嘅都真係只有一手一手慢慢將佢收上嚟。好了，終於見魚影啦，原來唔係牛廣，而係火車頭！帶條魚去一早準備定撈魚嘅朗仔果度比佢一兜，一條接近四斤嘅細鱗就上艇了！就係條魚上到艇之時，我都不自禁咁樣大聲講左句，「唔好漏低我吖嘛」釣完大魚係開心，但係我諗到嘅係要趁有流水又埋到嚟排口釣就要好好把掘，即時剪咗啲因為用手扯布線而亂哂嘅魚絲，然後就落副手繩繼續釣。點解唔用竿繼續釣？因為無時間比我再慢慢綁好個炭線駁布線嘅繩結了，所以只好用返手繩釣魚。

返寨繼續砌，又到我有口魚仔食餌，一逗一收，手板沙立仔上水，講左成日都無沙立，結果最後釣到嚟差唔多收工，返到主場先終於搵到一口。釣到5點，我地就要埋一埋上環放低戰地記者，因為佢趕時間走人，而我則同朗仔講話難得有口，不如搏多一兩寨，咁表妹地又唔趕時間食晚飯，於是我地又車返出去繼續釣，不過之後都無再食餌了，就係咁樣，我地今日嘅「表妹們久休復出試水團」都終於完結啦，雖然今日因為大風，令我地唔能夠喺主場一帶守魚，但係就算喺其他位置，雖然釣況麻麻但又總算比表妹倆各自都中到撈箕魚，尤其細表妹更加唔止中到一口添，所以我都感到好欣慰。始終自己釣魚都成日有得釣，但佢地就唔係成日玩，難得出到嚟，梗係想佢地中魚多過自己中啦。而家結果又真係佢地又有得中，我又標到個尾會，係返條火車頭埋黎過足癮，認真唔錯。而且，同時呢條細鱗食落佢地兩個嘅其中一個度，相信情況都會非常狼狽… 而家咁樣比我中由我自己玩，都算係完滿結果呢。希望下次大家再約到期玩時，唔會又好似今日咁樣咁大風，限制哂我地釣點嘅選擇啦。