20241020
日期: 20/10/2024
農曆: 九月十八
地點: 維港西對開海面一帶
艇家: 朗仔自駕
釣友: 樂仔、忠仔、阿康、林生、朗仔、YY、
天氣: 天晴、東風5至6級
水流: 行流、水質不俗
釣穫: 細鱗 x 11 (2斤 x 3、斤裝 x 5、 磅頭 x 3)、黑沙鱲 x 1 (斤半) 、白鬚公 x 1 (斤裝)、青斑 x 1 (磅頭) 、什魚少許、埋單十七、八斤
是咁的，話說早個星期同表妹們釣完同一釣場，但當日天氣麻麻風亦幾大，而我同朗仔唔想佢地釣得辛苦，所以都無乜點釣主場位置，只係游走維港西面其他一帶水域搵魚。結果好彩執到幾條撈箕魚，但係都只能叫做勉強合格。之後果日收左風，朗仔又同其他釣友出動，執成半擔魚，認真誇張；所以佢就叫我今個星期又再出動，仲話流水唔錯，雖然天文台都報成6級大東風，但係佢都話有信心應該可以執到廿斤魚，於是我就決定一於同佢癲多次，5、6級大東風都照樣同佢出黎維港釣名物。
結果全艇人早上圍住我輪流開齋，而我係真係一口食餌都無。早上釣完，全艇執到成10條撈箕魚但無一條關我事，而下晝其實都知轉左流之後流水只係麻麻，唔會奢望有咩魚執到。結果下晝全艇都係執多兩三條撈箕魚之後就收工。而我，全日則釣得幾條魚仔，可算是近年新低點。而最誇張嘅地方就係，今日唔係釣況好差果隻全艇無食餌；相反，唔計林生一到埗我竿都未開好就已經中條細鱗之後幾分鐘就梅開二度中多條黑沙咁旺，其他人都枕住有食餌而真係只係剛好地瀨低我一個。所以釣魚嘅野真係幾邪門，而我則再度發揮強勁嘅龜仔本色。
唔講咁多，由於今次我真係無乜魚釣到，好鬼得閒咁睇其他人中魚，所以剛好每次上魚我都有用手機影到短片，所以就索性剪左片當做戰地記者採訪片段咁樣呈現比大家睇。
唔講咁多，附上YOUTUBE LINK 一條:
請先 登入 以發表留言。