YY08的部落格

日期: 06/10/2024
農曆: 九月初四
地點: 櫃底
艇家: 自駕
釣友: 華仔、阿丹、YY
天氣: 天晴、東風四級
水流: 生流、水質不俗
釣穫: 青斑x 1(斤半)、紅鮋x 1(斤半)、籃瓜子x 1(斤裝) ，埋單4斤

是咁的，自從阿丹早幾年同我去完青馬同阿濤釣魚之後，過不久佢就移居外國生活去了。佢喺當地都有不時出海釣魚，但係釣嘅魚種同埋釣法都同香港係不同嘅，所以成日都話掛住香港釣魚嘅時光。咁適逢佢呢排有事要返黎香港一趟，佢一早就已經同我講定左回港嘅日子，叫我揀定日子同佢去釣魚；咁梗係無問題啦，反正我見佢移民之前都無試過同我入櫃底釣魚，今次一於就帶佢入去尋幽探秘搵下魚啦。問埋一貫櫃底隊友華仔，佢都得閒，咁就啱啦，組隊完畢，只等出發。

我哋都係約左喺我地買餌大本營 — 楊屋道街市集合。買左兩斤稍細嘅棕蝦仔同埋一斤基圍蝦之後，我地再去一帆補給少少鉛同勾之後就坐的直往汀九去拎艇。

喺阿譚度拎完艇我地就直劈櫃底。今日潮汐大約十一點朝早有個小高水，不過因為近來每日嘅大高水主要都係喺夜晚，早上嘅漲潮其實都唔算係好高水，所以我地都可以勉強入到去櫃底，但係就暫時只能釣「樓底」較高嘅九號櫃。

我同華仔都係先用棕蝦，因為可以順便掃埋啲體型較細嘅放生魚。如果好似以前咁樣用草蝦，大基圍，基本上啲磅頭到斤裝嘅放生魚都較難隊埋嚟之餘，連啲大條少少嘅鱲魚都一樣好難到釣。而家用啲細棕蝦，感覺比啲斤頭魚食埋嚟就輕鬆啲。至於阿丹，佢則繼續發揮佢鍾意冒險同嘗試嘅精神；佢係選擇左用出發前兩日我同佢喺漁具鋪買嘅鐵板假餌作釣，咁都好呀，叫多飛，睇下啲魚鍾意揀真餌定假餌。

最近幾次釣況都一般，有時都守到半晝打後先有魚，但係今日反而又唔係喎。釣左一陣，坐係我隔離嘅華仔突然揸緊副繩、一副「聽牌」嘅模樣，然之後見佢一抽，中魚、頂兩手，跟住條魚都已經乖乖就範跟住上，到水面見魚影時阿丹就將佢輕輕鬆鬆兜上水，一條斤半紅鮋是也。真係快手，開釣都係半個鐘未夠，華仔就已經先拔頭籌了，果然係一貫有魚運嘅釣手。

滿以為咁早開到齋，跟住又上緊流頂，應該都有多一口半口執到掛，點知釣到成十二點、開始轉流，都仲係果一口食餌；唔好話中魚，而係真係得果一口食餌。我地都叫勤力走位，不同「跑道」都有試過掃，但又真係無食餌，連去幾個以往有魚中過嘅位都係未有食餌，唔通真係咁大鑊，一條到尾？但係釣魚就係釣一種信念，一種唔放棄唔認輸嘅信念，尤其今日暫時都仲係用緊假餌嘅阿丹，佢就更加對呢度嘅魚始終係會食佢隻假餌保持住一種信念，即使我都同佢講話我地買左好多蝦，好大機會釣唔哂，拜託佢幫下手燒咁啲蝦餌；佢都係堅持想試下用塊鐵板搵到一口食餌先喎。不停走位，不停重複的鐵板嘅動作，往往見到嘅都只係「的」緊一個空虛，但係皇天不負有心人，又係阿丹一個往常嘅「的」鐵板動作，但係突然就見佢竿頭一緊，跟住一丹一抽，中魚！然後佢繼續收魚，跟住條魚到水面佢都無等待我地幫佢撈魚，就自己引拔飛左條魚上艇，嘩，係一條斤裝籃瓜子斑啊。呢條魚係我喺櫃底第一次親身見到有人用假餌上魚，雖然之前個朋友仔都話用過假餌中魚，但見我就真係第一次。而阿丹中完魚之後都話呢條魚係佢第一次用假餌中嘅魚呢！真係不枉佢嘅堅持。不過諗返起，其實我同華仔、阿鴻佢地之前用基圍蝦玩拋寨，咪又係同假餌道理差唔多，啲魚都係見有餌狀嘅物體就撲出嚟食餌啦，邊有時間比佢諗係真定假呢。

雖然有魚中，但都真係又係絕無僅有嘅一口，搵多一陣都無食餌，車左去轉角位掃都無食餌之後，我地就研究不如早啲出去青衣油庫一帶作釣，睇下會唔會執到啲黃立鯧呀、星鱸呀、同埋其他魚咁。反正阿丹都未去過，難得返到嚟釣魚，不如就一次過帶埋佢去油庫同埋果邊嘅莊底見識下啦。

即時收繩起行，出左櫃底，經過中石化油庫對出石駁位時，我就又想試下會唔會呢度係有食餌嘅，始終咁多貓眼石，感覺真係會有魚咁樣。但係釣左幾寨，都係無魚食餌。咁我就諗住收繩起行，車去船廠同蜆殼油庫果面繼續探索之時，華仔呢個時候就話佢有啲事需要先行撤退，問我邊度可以最快放到佢走。咁睇一睇個地圖，點計都係車返青衣會係最方便之選，於是我地就掉頭往青衣渡輪碼頭駛去。

終於放低左華仔之後，我研究一下如果要車去船廠果面又要用上大半小時有多，咁其實呢個時候都兩點幾，車到過去都成3點，而且喺果面我又無話知道咩特別嘅釣點，咁不如近近地車返入櫃底釣，仲可以有多啲釣魚嘅時間呢。再加上其實而家都已經係落流，再低啲潮水嘅時候，我地仲可以過對面櫃底其他碼頭度釣呢。一於就咁話啦，什麼船廠油庫，都係等下次先再去吧，而家就先返入九號碼頭搵魚啦。

入返去九號櫃，我就叫阿丹試下釣生餌，始終佢都玩左大半日假餌，係時候都可以試下用返大蝦睇下會唔會口。但係車左幾個較有信心食餌嘅位都無口之後，望下個鐘又望下個潮水表，再望下對面碼頭嘅水位，衡量過應該夠入之後，我就叫阿丹收繩，跟住二話不說就往對面駛去。

果然，我地嚟到呢面櫃底都係剛剛夠位入，駛入去之際我同阿丹都要烏低哂身先至剛好夠入，入到去其實就會相對有返少少鬆動嘅空間，咁就啱哂，即刻落餌，但其實都唔係好深水咋喎，相比返九號，我地呢個位應該較淺，勉強入到去之後但都係得大約十尺水，比起剛才九號果面釣緊都有十來二十尺來得淺。唔理啦，入到嚟，淺水都照掃啦，難得呢面唔係時時入得，應該會較多機會執到一條半條嘅。掃完十尺一帶都無我又車埋啲去入面啲莊柱，大約水深都係得七、八尺，一於繼續掃。掃掃下突然見阿丹之竿有異動，跟住阿丹一抽，就見佢支竿即時彎頭，然後佢就頂魚，我則放低副繩拎定撈箕等佢條魚出現，我再提佢千祈唔好引拔，真係有機會爆嘴㗎，尤其條魚睇落又唔係細。水咁淺，頂左兩手條魚入唔到石，就可以宣布佢輸左啦，跟住阿丹繼續收，立馬就見到魚影了，係一條青斑喎！跟住我睇準魚頭一兜，魚就被撈上來了，係一條斤半野生海青斑呢，認真靚仔，絕對同黑媽媽的放生級別係一個天、一個地。犀利呀阿丹，梅開二度喎，真係新手入櫃係有啲運仔喎，食兩口拎足哂兩口，爽啊。

中完魚，大家精神一抖，繼續搵魚，知道呢度個地型係一個較緩嘅斜坡咁樣慢慢又七、八尺深到十來尺。不過掃多一陣都係無食餌，望下個鐘，都成4點鬆啲，得返約一個鐘，決定去另一面櫃底繼續作戰。於是我地又收繩車去另一個櫃底度作釣啦，而家水位又低左，我地入櫃底又輕鬆左，不過呢度又比剛才嘅釣點深返幾尺有多。唔理啦，一樣係咁釣架啦。繼續周圍掃，一開始我就往裡面多啲柱嘅位置數，希望透過不斷痴住啲柱可以搵到一口食餌。話時話，釣到呢個時候四點幾，我都仲未有一口食餌；今日會唔會真係打龜之餘，連一口食餌都唔比我㗎？掃完埋面，都仲未有食餌，於是移出少少掃另一端，望下個鐘，都成5點，心諗釣多一兩寨都無，5點15分就收繩走人。但係睇下潮水表呢個時候又係轉流時間，心裡面總係形住可能仲有機會都未定。正係度忐忑緊最後呢幾寨掃邊幾個位好之際，我副繩忽然有口食餌，感覺到佢慢慢拉我繩之時，可能我已經靜左成日根本無諗過會有食餌係食埋我度，再加上我分左心係度諗緊去邊幾條柱掃位搵食餌，點知呢個時候佢拉我口餌，我只係下意識咁樣收繩而無抽魚，所以收起左條魚兩手之後就甩左！應該係佢鬆返口而我又無抽魚打實佢個嘴所以比佢走左，真係失策!! 既然有口，更加唔捨得走，認得佢係邊個位食餌，所以即時換過隻蝦落去再釣，隔左幾分鐘，我好似感覺到有一口食餌，收返上嚟一睇，隻蝦被剪剩個頭！真係可惡，等左全日都無口，呢幾分鐘我釣到唔係好識反應之時，竟然幾分鐘連食我兩口！但係我都無好好把握得到，完全浪費左佢地比我嘅「最後機會」。

雖然時間上係需要撒退返去還艇，但係難得等左全日終於啲魚開口食餌，於是都忍唔住繼續釣。落左隻蝦釣左幾分鐘都無食餌，莫非釣魚飽左？咁就車去下一條柱睇下有無魚，但係下一條柱都係無食餌，於是不甘心嘅我又再車返去剛才連失兩口嘅果條柱再釣。既然預得佢有機會食餌，我地都專心咁釣，車過左條柱無食餌就圍住佢一帶釣睇下會唔會游左去左近，跟住呢個時候我突然間又有一口強拉！但係我可能真係退步左定係慢左，我竟然來不及抽魚！結果就係比條魚成功地又再一次係我副繩度偷走多一隻蝦！搞乜呀，阿Y，你連續錯失左三口食餌，唔好話上唔到魚，係連中魚都中唔到喎，認真失敗喎。唉，失敗還失敗，時間夠哂還時間夠哂，都係唔噴氣要繼續釣，於是又再繼續勾隻棕蝦落去。至於阿丹，呢個時候則勾左石，拉返上嚟之時，斷埋個布線駁炭線繩結，但係如果要再綁返一個結，對於唔熟綁結嘅我地嚟講應該都要一啲時間，所以阿丹衡量一下頭先中嘅魚嘅大細應該都唔會食到頂斷絲咁犀利掛，於是決定布線直出綁子彈鉛再出炭絲瀨腳繼續釣埋餘下時間。

釣左幾分鐘都未有食餌，我就試下移隻艇去條柱嘅一邊，睇下會唔會有食餌。喺另一邊都掃左兩三分鐘都無食餌，就沿住條柱咁移返去柱嘅原本有食餌果面，我都下意識一手揸實啲副繩，一手就扶住條柱拉隻艇過柱。就係呢個時候，只見到阿丹揸實支竿放低少少再一抽，跟住就見到佢支竿即時彎哂向下，然後阿丹嘗試舉起支竿頂魚但係根本頂唔起，跟住我只見到佢大叫住我個名，眼神係向我求救再加有點絕望嘅感覺。跟住我已經盡量將隻艇拉返去佢果面，希望就返啱支竿個角度比佢可以頂得起條魚；而佢副繩係布繩，我都唔敢伸手去拿繩扯魚，所以我都無太多可以再做到，只能夠用睇住佢繼續同條魚「搏鬥」。但與其講係搏鬥，不如講話係睇住佢比條魚老強！因為佢呢個時候根本係一手都攪唔到，只係隻攪不停咁出剎車。拎住支竿頂多兩秒，然後就沒有然後了！收返上嚟一睇，連粒陀都無埋，即係就係甩左布線綁子彈鉛零圈果個位。無辦法，好早之前我都有同佢講過布線直接綁陀係會有機會索唔實而甩繩，但係一來佢未真係試過因為咁樣而斷魚，二來剛才時間緊逼，綁得個結嚟都無時間釣了，所以只好勉強湊合布線駁零圈釣住先。點知世事嘅野有時真係整定，釣左全日，架餐綁好哂，佢就無食埋嚟，最後幾分鐘，斷左架餐無時間綁過勉強釣住先呢，佢就大大條食埋嚟！仲要係食有瑕疵釣組嘅果一個，而唔係食理論上架餐應該唔會輸嘅果一個度。如果呢條魚食落我度，佢應該唔可以好似老強阿丹強得咁輕鬆；我起碼都可以同佢還一還拖，先再定輸贏都未遲。但係釣魚邊有如果，我都已經先有三口把握唔到，所以怪誰呢？短短一個小時唔夠，食左四口餌，但係我地竟然一口都拎唔到，真係飲恨。

不過點都好啦，時間真係唔容許我地再磨落去啦，加上條魚咁樣老強阿丹，其實都已經受左驚，理論上都唔會再開口了，所以我地只好懷住深深不忿嘅心情，收拾架餐，打道回府。就係咁樣，我地今日嘅阿丹初次探索櫃底之旅終於都完結了。而阿丹都終於體會到我地成日講櫃底有怪獸、係會斷魚嘅呢個傳說了。而佢雖然釣到一個足足可以令我地講足十年八年嘅大飲恨，但同事亦都感受到櫃底嘅威力同魅力。我地回程坐車嘅時候佢已經話想又再入去釣魚了，但係無辦法啦，今次佢返嚟時間有啲位，所以，唯有等佢下一次返嚟香港嘅時候我地再入過去釣魚啦。希望到時我地大家都準備充足之下有食餌，有搏鬥，唔駛輸啦。