YY08的部落格

日期: 09/11/2024

農曆: 十月初九
地點: 維港西對及交倚對開海面一帶
艇家: 朗仔自駕
釣友: 肥肥、阿安、阿邦、阿康、朗仔、YY、
天氣: 一號風球後轉三號、東北風5至6級
水流: 慢流、水質一般
釣穫: 細鱗 x 3 (2斤 x 1、斤半 x 1、 6両 x 1)、黃腳鱲 x 1 (2斤) 、紅沙鱲 x 1 (斤半)、什魚一堆、埋單十斤

是咁的，話說早兩個星期突然收到肥肥電話，話好耐無見又成日話想約埋去釣魚，問我擇日不如撞日不如就嚟緊個星期六，不過問埋其他朋友仔之後有人已經有約，於是就大家即時睇下之後果個星期六有無期，而大家睇完之後都可以於是我就即刻問朗仔星期六有無期比到我一齊釣維港。朗仔又得閒阿康又可以咁就一於上阿康隻艇出維港啦。

平時都釣開九點落艇，不過朗仔睇過潮汐表之後就問我地可唔可以早返半個鐘頭出發，因為流水就在朝早，如果錯過左就可能之後釣況都會比較平淡；咁問完大家都無問題就一於8點半中環碼頭集合。

出發前幾日睇天文台天氣預測已經知道有個颱風「銀杏」會吹來香港，所以一直都有留意住佢嘅走勢，睇住佢呢幾日其實能量都有加強到嘅，不過可幸嘅就係路徑最近都係大約在香港400公里邊緣掠過，所以出發前衡量過後我地都決定繼續成行。前一晚就轉左掛一號風球，天文台預計當日大約下午傍晚就有機會改掛三號風，咁我地見即係都係一號風球釣到大半日，無問題嘅，咁難得約到人齊，大風少少都照樣出發啦。

喺中環碼頭集合完落到艇，車去釣點都唔駛五分鐘，因為我地就喺碼頭對出海面展開我地今日嘅釣行。吸收左上次 戰地 嘅情況之後，我決定都係趁有流水之時用手繩開個齋先再轉用魚竿，所以一到埗，我同安仔就已經手繩準備好，等朗仔車定個位話落得繩我地就同時落繩作釣。至於阿邦同肥肥就用竿釣，所以都在慢慢整緊架餐同釣組。不過釣魚呢啲嘢又唔係一定話你早到早落餌條魚就係食你先嘅，反而多數呢就係睇個流水方向同隻艇嘅方向。正如上一次我坐艇中間嘅位置，在加上運氣同實力爭咁啲，所以最後只能夠全日做戰地記者。今日我決定再坐同一位置，因為都想我帶嚟玩嘅朋友仔可以有魚中；而我則唔係太在意話一定要中到魚，相反做戰地記者同佢地拍下珍貴一刻嘅片段亦都一樣咁開心。

釣左一寨全艇人都未有魚食餌，而肥肥都仍然好優哉悠哉咁樣整緊佢嘅釣組。不過到佢落得繩之時，我地全艇人都仲未有食餌，所以可以話佢係無蝕到嘅。而肥肥今日坐嘅位置，就係上次先拔頭籌嘅林生坐嘅位置；上次林生快到我都仲綁緊釣組佢就已經上魚。今次唔知係咪又係坐呢個位嘅肥肥開齋先呢？果然肥肥落繩都未夠五分鐘，只見突然佢支竿就已經彎哂，跟住肥肥一路收，一路爽叫，頂左無耐，就見魚影，嘩，竟然唔係大熱門細鱗甚至黑沙鱲，而係一條沙鱲！雖說呢個位不時都有沙鱲出現，但通常都係手板到腳板大細較多，至於而家呢條有成斤半級數嘅，又真係較少出現。點都好，開齋嘅，再一次係坐「頭流位」嘅人士，真係無得唔信數據。

既然有魚釣到，一於繼續喺呢趟跑道繼續作戰，我都講笑咁話肥肥坐住個頭流位真係要好好把握，啲魚應該會食佢口餌先。返左幾次寨，今次又係突然聽到肥肥呻吟左一兩聲，跟住已經見到佢支魚竿彎哂，比剛才中沙立嘅時候彎得仲犀利，只見肥肥一邊頂魚一邊嘩嘩嘩咁叫，但係呢條魚嘅戰鬥力應該更加強大，頂左幾手，肥肥叫多兩聲，然後就沒有然後了。收返條魚絲上嚟睇，斷左綁陀個位，應該真係肥肥綁嘢綁得麻麻，同埋隻釣魚攪個磅頂調較得太過緊了，所以變左同條魚死力搏鬥無就到魚；咁啱條魚又有返咁上下戰鬥力，互相搏鬥之下就斷絲了。真係可惜啦，斷左條大魚之餘，仲要無得繼續欣賞肥肥頂魚嘅英姿吖嘛。

點都好，短短半個鐘唔夠，真係淨係得坐「頭流位」嘅肥肥有食餌，仲要食親都有返咁上下戰鬥力，真係證明位置重要性。呢個時候我就同坐肥肥另一邊嘅安仔講話我地其他人釣左咁耐無食餌，但守靚位嘅肥肥又做唔到嘢，不如安仔你坐佢個位開個靚齋啦。不過安仔就話比多次機會肥肥，都係遲啲先調位。

釣多一陣流水慢左、開始轉流，朗仔就將隻艇嘅頂流方向調轉左，我就講笑話係阿朗仔見到肥肥浪費左頭流位啲魚於是決定倒轉隻艇嚟候艇，自己同阿康守返頭流位。流水愈黎愈慢，我地今日個黃金時間都差唔多要完，全艇就係得肥肥食過兩口餌，睇黎今日都有啲機會唔太樂觀喎… 朗仔都開始話釣多陣就繞繩走位去昂船洲對出一帶釣其他魚。不過講講下，阿康就突然有食餌，抽魚上到水，一條幾両重嘅小細鱗就上水了。釣多一陣都真係無口，我地就繞繩轉位、離開中環碼頭一帶嘅釣場。

過到嚟昂船洲呢面，例牌問朗仔有咩目標魚，佢就話上星期係度執左十條八條斤裝青鱸喎，咁又即管睇下我地今日會唔會執得到一條半條啦。我見全日嘅黃金流水朗仔話已經過左，呢面又係釣下魚仔機會多啲，於是就拎支魚竿出黎轉陣迎戰。不過魚仔都仍然未有食餌，我地釣左第一個排口一兩寨都無食餌，於是朗仔又叫我地繞繩移去下一個排口釣，呢個時候本身搞緊隻艇啲嘢嘅阿康正想收繩時，就話中魚要撈箕，睇佢要一手一手慢慢咁收，估緊會唔會係啲大條啲嘅青鱸定係黑鱲之時，收多兩收見到魚影，朗仔第一眼見話似大白鱲，再睇真啲，嘩，原來係大黃腳，上到水面阿邦幫手一撈，一條兩斤幾嘅大黃腳就上咗嚟艇入面喇。真係不得了，大大餅黃腳，完全估你唔到，條魚仲要基本上阿康放低左副魚絲去整野然後自己食哂隻蝦中埋嘴，真係「好波不如好運」又一見證。

返寨釣多陣都無，我地就移去另一個位。落繩無耐，到我好似有食餌，輕輕一抽，小魚一條，上到水面，原來是牛秋一條；雖然係魚仔，但總叫開左齋先，能夠係咁唔理想嘅環境中，成為第三個開齋嘅人仔，已經好唔錯架啦。釣多一陣無口就又移去另一個排口。釣釣下，我又唔係好覺得有食餌，但忽然就感覺到有重量，即時抽多下，然後就感覺到重重的，又道力又死實實，但又不至於係石頭咁樣、係會郁嘅；唔理啦，叫定朗仔幫手拎撈箕啦。慢慢收，終於見到魚影啦，原來係條小浦魚。雖然叫佢做「小」，但其實佢都有成兩斤重，撈完上來，影左張相做個紀錄之後就將佢放回大海了。釣多一陣無口，我地又移去下一個排口，跟住無耐阿康就執條良型黃釘，但之後都係無口。朗仔同我都係度諗緊跟住半日去邊度釣會理想啲，選擇一就係繼續係呢頭釣同埋過青洲一帶磨，守返一條半條細鱗、黑沙；選擇二則是車出去交倚對開搵下花或，如果搵到一箕魚嘅話，都叫有機會人人釣到三兩條，但如果搵唔到咁就人人當出去遊個船河吹個風咁。我就諗，如果守青洲呢面則相對疏口，就算守到一條半條，都會漏低其他人；如果出去交倚外又搵到啲花或，咁基本人人都有魚中到吖；咁佢地都唔一定要大魚啦，有魚中到都叫開心左先啦，咁一於就選擇後者 — 出去冒險搵花或啦。

於是我地繞繩，然後就直奔交倚外去了。來到釣點一帶，就開始搵魚，不過講得搵魚，就邊有咁容易第一個排口就搵到佢地啦，所以第一個排口係唔見有魚嘅。咁呢個時候都接近中午，我見安仔仲未開齋，就話安仔不如你同肥肥調位，試下有無運行；於是肥肥就讓出佢個位同安仔調位坐喇。點知世事往往都真係幾有趣，就喺佢兩個調完位，朗仔車左去另一個排口繼續搵魚無耐，調左位嘅肥肥呢個時候竟然抽魚，釣到一條石釘。咁樣我都真係唔知點樣講好了，睇嚟今日啲運氣都係跟住肥肥行，安仔反而係幫肥肥坐暖左張櫈之後比肥肥上魚呢。就喺我幫肥肥影緊條石釘之時，後面阿康都中魚了，上水一睇，係一條磅頭雞籠鯧，呢個排口一嚟到就執到兩條魚，好似唔錯喎，點知繼續釣落去，返多次寨、都係得果兩條魚，於是我地就又繼續移位啦。

去到另一個排口，花或仲未搵到，不過阿康呢個時候竟然又搵到條良型芝麻斑喎，真係開心仔喇。但係我地目標魚就未有，所以釣多陣無口我地又要移位。
去到新排口位，今次到我有魚訊啦，啄下啄下，忍佢，再啄一抽就中，有少少掙扎喎，但係果種掙扎又有啲熟悉… 上到水面，青雞泡一條，解完鉤就將佢放回大海了。返寨再釣，朗仔又中多條雞泡，咁於是梗係拿拿臨轉位啦。

如是者我地不斷移位搵魚，希望搵到花或群，但一路搵都未有目標魚，而每個排口可能就有一口半口其他魚種出現，所以肥肥都講笑話如果喺果一寨有人釣到一條魚，咁就可以安心咁等去下一寨了。

不停咁讓移位，交倚對開呢一帶朗仔都有成幾十個釣點，所以我地釣一兩寨無目標魚就會走位。走位走得咁快咁密，所以呢個時候朗仔其實都只係用住大機候車。而大約釣左十零個位之後，終於黎到一個排口之時阿朗話呢個係皇牌排口，之前都較多機會喺呢個排口搵到魚喎。落餌都唔夠一分鐘，只見阿康呢個時候抽左我哋嘅目標魚上來了；無錯，就係一條花或啦。果然係皇牌位喎！朗仔就話好啦終於可以落番部細機候艇啦，我就話睇定啲先，一陣落完細機點知真係得一條花或釣到咪搞笑。點知講完都唔夠兩分鐘，今次到朗仔起手，佢一中就已經知道係花或，然後解完魚之後就即時落番部細尾機了，因為我地可以係呢個排口度「發展」，搜索花或群嘅其他成員。呢一寨就只係得呢兩條，不過返寨無耐，就到我有食餌，輕鬆一抽魚竿，又一條花或上水，睇嚟情況唔錯，都真係有堆魚喺度喎。不過呢一寨就係得一條，於是我地就再返寨搵魚。阿康等左陣又中多條，然後又係無口又要返寨，跟住無耐就到朗仔中一條。即係其實應該就係有群花或喺下面，不過群魚就未夠大群，而且活性唔高唔會周圍搶食，所以真係要到排口某一個位佢哋先會食餌。

如是者，朗仔執一條，無口又再返寨，今次到肥肥中喇，然後再返寨無耐，阿邦都中返條良型花或開齋了。釣多陣靜左，我地就試下移去旁邊嘅排口，又真係好快比朗仔執到條花或，仲要大條過剛才果堆少少。佢解完魚再落餌，唔夠一分鐘又扯多一條花或上嚟，佢都話終於有一寨佢係可以中到兩條魚架啦，希望有第三條啦。不過世事無咁完美，啲魚食餌又真係喺個好窄嘅位置食，釣多三兩分鐘其實都已經過左，所以都係要返寨。跟住就派彩輪到我了，我都上到一條良型花或呢。數下生倉，都應該過左十條花或，就咁睇落，都比留在昂船洲、青洲頭外守一條半條撈箕魚化算，都叫多啲人有機會釣多一兩條魚。

釣多陣，朗仔阿康執多兩三條花或之後魚訊就漸轉稀疏了。加上呢個時候風勢都又再加強左，天文台仲話過多半個鐘就會改掛三號風球，咁我地就決定車去青洲一帶搵下黑沙同細鱗，睇下有無執多一兩條撈箕魚。

大家繞繩，頂住風浪，終於車到去青洲。守左一陣，阿康先有魚訊，抽左條火點上嚟。隔左陣，我都有食餌，但係我發緊呆，所以佢一拉我繩我就條件反射式收繩，喺無抽魚嘅情況之下，上左兩手條魚就甩咗，認真失策。繼續係青洲一帶守，終於又到朗仔有食餌。見佢抽完魚都要就番兩手，於是就拎定撈箕等做魚童。朗仔慢慢一手一手收，一條斤半細鱗就咁上水。要嚟嘅始終要嚟，釣維港點可以無維港名物出現呢？今朝果條鱗花就算啦，釣到嚟三點幾，終於出現左第一條撈箕級別嘅細鱗了。本身嚟青洲落繩果陣都同朗仔講緊話如果釣況一般，咁不如留返半個鐘比我返去中上環一帶守撈箕魚，睇嚟而家可以番係呢度釣就得了，起碼呢面都叫做有魚食餌，風浪又無上環果面咁大呢。

繼續作釣，只見肥肥支竿忽然又彎左，然後佢就係咁收，點知收左兩手，忽然就鬆左；原來肥肥同我一樣都係有魚食餌咬住之後無抽魚就直接收繩，收多兩手條魚鬆口之後就甩左，全程係無打實條魚個嘴。真係可惜，難得守到一條撈箕魚，又再次落空。釣多陣，有一下我以為勾石，正當我垂直支竿想拉斷條布線之際，我又好似拉得郁條魚絲喎。於是改為用手拉，又真係收得到，但係就實哂，睇黎應該係中左垃圾定石頭啦；點知收到上嚟，原來係一條油錐，見狀我都即時嘆氣，人地就釣細鱗，鱲魚，我就釣埋哂啲咩浦魚、油錐，真係笑左。

再釣左陣，我睇住朗仔做緊準備動作，即係有魚食餌啦，跟手見佢一逗，然後又要就魚了，見佢一手一手收都收左一陣，條魚都投咗降、好乖咁跟住上嚟架喇，點知呢個時候朗仔條魚絲繩尾比風吹起左然後落左海打左船尾車葉度、跟住斷埋… 就係咁樣，喺啲較為罕見嘅「意外」之下我地又失去左一條都幾乎可以斷定為細鱗嘅撈箕魚了。我地接連失去獲得撈箕魚嘅機會，時間又一分一秒咁流逝，莫非今日就係咁樣咁離奇嘅斷魚之後就要完結？望下個鐘，都差唔多5點、要準備回程了。朗仔都話釣多五分鐘就繞繩收工，就係呢個時候，只見肥肥抽竿，然後支竿又再彎哂，跟住佢就不停咁絞佢隻攪，但係佢磅頂調得過鬆了，所以佢不停地收，再加埋條魚不停咁游，所以條魚絲係繼續咁樣出緊絲，如果魚絲繼續太鬆地出杯，分分鐘又會出現甩魚嘅情況架啦，於是我就話你唔駛做額外事情架肥肥，你繼續收繩，我幫你調緊返個磅頂就得架啦；於是我就伸手同佢較緊返啲個磅頂，等佢可以收到魚絲嘅同時又唔會鎖得隻杯太緊。隻攪調整完之後戰力即時提升，肥肥呢個時候繼續收魚，條魚都乖乖地咁樣跟住上嚟，好快見到魚影，我幫佢一兜，一條兩斤嘅細鱗就上水了。真係全日啲魚都比你釣哂啦肥肥！但係點解要較到個磅頂咁鬆呢？原來就係因為今朝肥肥斷左口魚之後聽到朗仔話佢較到個磅頂太死，出唔到絲從而斷魚，所以就較鬆左個磅頂了，但係一時又較得太鬆，所以就造成頭先有點緊湊狼狽嘅局面；但係唔緊要啦，而家有人幫手之下最終條魚都有驚無險上到嚟，真係今日乜魚都比你釣哂喇。

釣埋呢口，我地都係時候收工走人，今日雖然天氣麻麻，風大浪大，流水又無乜，但係執到十斤八斤魚都算係咁了，最緊要係可以同到一班咁耐無一齊釣魚嘅朋友仔聚埋一齊釣魚，所以就算挨返少少風浪，釣況又一般，其實都仲係開心嘅。希望下次再出嚟釣魚，可以天氣又好啲，魚又多啲、人人都有魚中啦。