YY08的部落格

日期: 10/11/2024

農曆: 十月初十
地點: 櫃底
艇家: 朗仔自駕
釣友: 朗尼、饞嘴力高、朗仔、YY、
天氣: 三號風球後轉一號、東北風4級
水流: 不俗、水質尚可
釣穫: 紅鮋x 1 (斤半)、石蚌 x 2 (斤裝 x 2) 、什魚幾條、埋單4斤

是咁的，話說昨天先剛同朗仔釣完 維港，因乜解究會連釣兩日、今日又出發呢？其實本身早一個月呢，饞嘴力高見到佢朋友仔、即細表妹跟我同朗仔出海釣魚、開心又有魚，咁佢最近難得有空又想玩下解下壓，咁就問我會唔會有得帶佢出海釣魚，咁我就問佢想去邊度釣魚，佢可能見過表妹們入櫃底釣魚有得之餘仲有種尋幽探秘嘅感覺，所以佢捨棄釣維港名物而選擇咗入櫃底釣魚。咁好啦，一於就問朗仔邊日得閒啦，咁朗仔果面亦都有妹豬朋友仔想釣魚，咁就啱哂啦，於是大家夾好左日子之後就揀定左初十呢個星期日出發了。

出發前幾日睇天氣預測，颱風銀杏會在香港400多海里附近掠過，所以有機會都成三號風球，妹豬們都有問究竟係咪繼續，咁我同朗仔就決定釣埋星期六先再決定。雖然星期六傍晚相對日間又真係起左風，但我地預計銀杏到左朝早都應該會過左香港，唔會真係太大風，最多就係落吓大雨咁，但我地嘅釣場係櫃底，咁其實又可以避雨，又無咁受風浪影響，咁問過妹豬佢地都想去之下；難得大家夾到期，咁就一於照原定計劃同譚仔訂艇，星期日出發。

因為始終都怕朝早出發天氣較差，咁盡量隻船坐少啲人就可以車得快啲又無咁上浪，咁我同朗仔就決定分頭行事 — 佢同妹豬朗尼去汀九譚仔果度拎艇；而我則同力高去楊屋道街市買蝦之後在荃灣西碼頭等佢地，集合之後再入櫃底。咁樣就算大風浪少少，四個人都只係車十多分鐘就可以入到櫃底，比起4個人一齊喺汀九車半個鐘，會係舒服同安全得多。安排好哂，為安全起見、始終都同朗仔講話一切起身睇下天氣狀況作最後決定。

朝早起身望下個天，唔算好差，而且風都唔算大，好似比尋日出維港時風勢已經有所緩和，咁就一於如常出發啦。我同力高喺街市會合咗之後就入去買蝦了；可能呢因為銀杏襲港，無漁船出海作業，所以野生海產價格飆升，所以我地最後揀左基圍蝦同草蝦兩款養蝦作餌。買齊魚餌，我同力高就行出去荃灣西碼頭，而朗仔同朗尼亦都剛剛從汀九揸咗隻艇過來；咁就啱哂，落艇、放埋啲大蝦入生倉，就往櫃底出發。

其實未落艇喺碼頭已經完全感覺到天氣已經好轉咗唔少，無乜風之餘，連個海都無乜浪花，相比尋日喺維港同交倚，真係差天共地。落到艇我都同兩位妹豬講話佢地運氣真係唔錯，明明兩日都係一同三號風球，但係今日天氣明顯比尋日好得多了，睇嚟今日有啲運行；之後就睇吓妹豬們會唔會都可以釣到魚了。

是日朝早係退潮，一路會退到十一點幾，由於水位低，所以我就建議朗仔先入平時少去啲、位於葵涌果面嘅櫃底先；因為果面因水位問題係普遍會少啲機會入到去，咁理論上係會多啲「陀地魚」留係度。咁一於就去 上次同阿丹斷魚嘅位置試下運氣先啦。

一到埗，朗仔就教朗尼基本釣魚技巧 — 原來朗尼從來未釣過魚，咁所以對釣魚嘅有關技術係一竅不通。唔緊要，朗仔即刻嚟個速成班，而我就幫力高穿線綁架餐。我一邊綁鉤一邊講笑話，今日有兩個新手，唔知邊個嘅「新手運」會更加強可以先拔頭籌甚至係釣得最多呢。由於朗尼真係未釣過魚，我地怕用大蝦的話中到大魚佢會唔係好識應付，所以朗仔就先幫佢勾隻沙蝦仔做餌，諗住比佢釣返一條魚仔體驗到作釣、食餌、抽魚上魚嘅感覺先。咁我都一於幫力高勾隻蝦仔落去先。點知剛幫佢勾完蝦仔、到我自己開始綁鉤之際，忽然見到朗尼話好似有魚食餌拉落去咁，由於佢未釣過魚，咁我地都唔知佢係真係有魚食餌定係勾左石，所以朗仔即時出手幫佢逗一逗副魚絲；拉左一下朗仔就已經話係魚嚟，咁我怕朗尼唔識扯魚，於是幫佢收左兩手；隊左兩手知道條魚都無乜機會走甩啦，就過返手比朗尼繼續收；由於水淺，所以拉左兩手條魚已經見影，跟手朗尼直接引拔條魚上來，嘩，係一條斤裝石蚌呢！真係快手，我連架餐都未綁好朗尼就已經中魚，不禁開口話「乜原來釣魚係咁容易嘅咩」。真係好波不如好運，果然新手入櫃就係會有新手運、有派彩！

既然有魚，梗係唔好比佢停，打完卡即時勾過隻蝦仔落去睇下有無第二次食餌。而我同朗仔則用基圍蝦做餌，睇下有無其他大條啲嘅魚食餌。我地挨住個水流釣，呢個時候釣緊嘅位置就到左上次斷魚嘅果幾條莊柱附近，釣釣下，忽然我就感覺到有魚食餌拉左我隻蝦一下，我下意識就起手，當然唔中啦，而我正懊惱緊點解有魚食但唔中之際，條魚竟然唔忿氣再度攻擊我隻蝦，不過呢口食餌都係唔到釣；收繩上嚟睇下隻蝦，咬爛咗蝦頸但就無剪到蝦頭，而且條魚無一口食中隻蝦同鉤，應該都係啲斤頭放生魚嚟。開齋不成，換過隻蝦繼續釣，但係果條柱無食餌，咁我地就移去後面果一兩條柱繼續釣；釣左一陣、來回返左流一兩次，我又感覺到有魚輕輕咁拉左我隻蝦一下，我即時揸緊副繩聽魚，但係條魚就無再進一步嘅行動。返流再由前面條柱慢慢掃過去，睇下佢會唔會再攻擊我隻蝦啦，但係呢個時候有動作嘅竟然係力高；只見佢起手一抽，跟住就中魚，然後一手一手咁收上嚟，又係一條斤裝石蚌！嘩，真係好喇，釣咗先一個鐘，兩位初入櫃底嘅妹豬釣手都已經順利達成開齋目標，我地即時無哂壓力，今日嘅釣行目的已經初步達成了！而家睇返，頭先食我餌都應該似係石蚌，第一次攻擊左我隻蝦兩次都搶唔哂，第二次就嘗試拉下我食蝦發覺應該隊唔入所以放棄然後走去隔離食隻蝦仔、然後就上釣了。如果係咁樣嘅咁我都覺得唔中魚都可以接受吖，畢竟我嘅目標都唔係呢啲魚仔。妹豬們聽到我話呢啲大細嘅石蚌係魚仔都覺得有點誇張，但係事實就真係用得大蝦做餌，目標都唔會係呢啲斤裝魚吧。

既然中魚，一於返寨，但係就未有食餌，而呢個時候朗尼見已經中到斤裝魚之後、都想挑戰一下再大啲嘅魚，於是就叫朗仔同佢換鉤同埋勾過隻大蝦落去。而力高則繼續用蝦仔作釣，令艇仔保持繼續有人釣蝦仔嘅狀態，可能叫兩飛，比啲魚有得揀蝦仔或者大蝦去食。由於未有食餌我地就繼續由隻艇流去後面嘅柱，釣左一陣，又到力高有動靜，見佢一逗一收繩，一條火點仔就上來了；睇嚟剛才見到朗尼咁快中魚當旺所以掂下佢膊頭痴下佢啲運氣呢一招真係見效喎，哈哈。

釣多陣，無食餌之下，見到都12點幾，大家決定釣到1點就返過青衣還晏晝食。咁得返唔長時間，就唔去其他地方釣，就一於返去今朝朗尼中魚果頭附近再掃下柱就算。釣到上次斷魚果條柱，我同朗仔隻蝦同時都被拉扯走左，但係可能條魚真係唔大，所以連拉兩下扯走左隻蝦但係都唔倒釣。連偷兩隻蝦，估計條魚都飽哂，所以跟住圍住條柱再掃都再無動靜。於是我地就繞繩車返青衣上岸買麥當奴，而朗仔送左我地上岸之後就繼續留守隻艇，順便釣魚。果然我地買完外賣返嚟落艇之時，佢就笑笑口叫我地估佢啱啱釣到乜魚，我打開生倉蓋一睇，原來係一條沙立同一條牛秋仔，真係快手。睇完魚，合番埋個生倉蓋我地就起程返櫃底。不過由於潮水其實係愈來愈漲，所以我地決定就唔車去葵涌櫃底果面，而係入返去平時釣開、「樓底」較高嘅青衣櫃底果面。

話咁快就車返入櫃底，咁我地就梗係開餐先啦；能夠喺櫃底食嘢開餐，果個氣氛真係幾開心。食完晏我地就繼續作釣，朗仔就轉左用蝦仔，而力高則步朗尼步伐、轉用大蝦。釣左一陣都無食餌，我就話不如移位去出水口果面參觀一下，順便果度其實都有排口可以釣。釣左出面條跑道一陣都無口，正當我同朗仔諗住試下釣入面條跑道而繞繩時，忽然我感覺到「搶手袋」嘅食餌，跟手下意識舉高隻手頂住唔比條魚絲鬆而有虛位，之後回一回神嘅我呢個時候就放低繩碌、揸返條魚絲收魚。由於條魚都係高上嚟食餌半水中，所以收多手都已經見魚影，跟住朗仔幫我一兜，一條斤半有多嘅紅鮋就上咗嚟了。好嘢，我都開齋了，唔駛連龜兩次。

上左呢條魚我地都係繼續移去釣入面條跑道，不過就未有食餌，於是我地又移位去青斑位釣，但係釣左幾寨都未有食餌，於是我就話不如轉位，順便比妹豬們參觀一下入面寫左啲有趣字眼嘅地標。

喺轉角位我地釣左幾寨都無料，睇下個鐘都成四點，於是諗緊究竟係車返去青斑位釣，定係去牛屎位釣，結果我地就揀左車去青斑位釣。不過因為水就繼續漲咗唔少，所以我地就釣埋最入面果條跑道，釣左陣，忽然我又感到一下強勁嘅「搶手袋」式食餌，但呢個時候嘅我已經完全沉淪咗係朗仔播放緊嘅強勁音樂當中，完全係聽歌模式大過釣魚模式；所以喺無乜準備嘅情況之下，條魚食餌，我又無反應抽魚，佢又唔自動中嘴之下，隻蝦就比佢搶走了。既然有魚搶餌，一於圍住果堆石附近再釣，但係可能魚已經食飽，所以都無再食餌。釣咗幾寨最入條跑道之後我地就移返出去釣其他兩條跑道，可惜一路再釣都無再食餌；即使呢個時候全部人都已經換哂大蝦作最後衝始，結果都係徒勞無功。但係大家其實釣到最後，個氛圍都有啲變左 - 由釣魚模式變左去放鬆、聽歌模式。所以之後再釣唔到魚，大家其實都係一樣咁享受。

就係咁樣，我地今日嘅妹豬初嘗釣魚作戰就嚟到尾聲了。由於力高同我都各自有約要趕去食晚飯，所以就唔跟朗仔佢地車返汀九還艇、而係喺荃灣西上岸走人。今日雖然魚獲一般，但兩位妹豬都能夠中魚我地都覺得已經係達成咗最基本目標。而且今日能夠出發去玩之餘、仲要無乜風、無乜浪、無落雨，簡直就係運氣爆燈！要知道尋日，朗仔同我喺維港同肥肥佢地釣魚時，個情況係差幾咁多。所以真係好感恩我地能夠順利出發之餘、仲可以舒舒服服，又有嘢食，又有歌聽，仲有三幾條魚仔中吓，其實真係已經好好彩呢。希望下次我地再出嚟釣魚，妹豬地可以有啲更強勁嘅食餌，同埋中魚嘅體驗啦。