力奇艇釣初體驗

日期: 08/19/2017
農曆: 閏六月廿八
地點: 將軍澳對開海面一帶
艇家: 自駕四匹仔
釣友: 力奇、YY
天氣: 天晴、西南風 2級
水流: 慢流、水質一般
釣穫: 扯旗立、池仔等什魚

是咁的，點解會有今次釣行呢? 其實事源就係一直以來我都叫阿力奇跟埋我一齊去艇釣，事關佢以往只在岸邊作釣，從未睇會到出海釣魚的樂趣，所以我不時都會叫佢跟我出去「見見世面」。咁終於佢都「就範」了，而我就又提議，既然佢將會同我以及我的朋友出去艇釣，咁對於從未有艇釣經驗的佢，先來個熱身可能會好一點，畢竟佢又怕在生寶人面前顯得什麼都好像不懂那般，當然其實根本沒有人會介意；但既然佢介意，咁我就同佢講話不如我先同佢玩一次自駕四匹仔去體驗一下在艇上釣魚究竟是什麼的一回事，並對他先稍作提點，好等佢到時出黎見到我的朋友時不會完全像個全新手一般；咁佢一聽到我提議，即時叫好，一來又有得玩，二來又有得黎個熱身預習一下。

咁好啦，預先揀好日子，然後就要準備一切了。由於力奇係新手，咁我梗係唔駛佢準備什麼特別既架生定乜啦，剩係叫佢買定幾粒鉛就可以了，連魚勾我都幫佢買就好了，免得大小不太適合呢。至於我呢，除左要補給一點小物同黑色勾之外，主要的，就係去準備蝦仁了。由於休魚期要到8月15日才完結，所以也不能太早就買得到，都等到成17,18日先見到期待已久既赤米蝦終於回歸街市了！這些海蝦可是足足闊別了街市三個半月呢！買好左蝦仁就梗係返去剝殼同埋醃製調味啦，其實配方都唔算特別，都係鹽、糖、麻油、雞粉、料酒、同埋蝦汁溝埋，同埋最好就用花紅粉染紅埋，咁就達至色、香、味、俱全了。

終於都到左出發既日子啦，同力奇係地鐵站集合左之後我地就直走碼頭搵九叔拎艇去了。話哂都成年無玩過，所以又要先熟習一下才起行，不過一坐上駕駛的位置，感覺已經返哂黎。咁既然準備好哂，事不宜遲，出發！原本直出上次七年之癢爆釣四匹 https://yy08.pixnet.net/blog/post/106356769 我同阿丹爆釣池魚的躉船，不過我地今日隻艇副偈性能真係麻麻，行一陣有時會死火，所以是日第一個釣點就係部偈死左火我地就隨緣係果度綁繩同埋落餌了，由於我負責開艇，所以我岩岩開始準備綁架生時阿力奇已經可以落餌作釣了。而佢岩岩落餌佢就話感覺到有魚食餌，我仲同佢講話可能係架艇飄緊拖住底拉拉下海床令佢誤以為係食餌，但係佢又講到似層層咁，跟手佢收絲上到黎竟然係 – 兩門勾都中哂魚！阿力奇即時興奮到大叫「老Y，我得左啦」真係話都無咁快，落餌都唔夠一分鐘就開齋，仲要係起孖！真係一個不得了既好開始呢！諗住繼續釣啦，但係由於我無著車又無落錨，中完魚搞得黎已經過哂寨，我落得餌黎都已經食魚訊，於是決定收起直駛躉船。今日我帶左兩支竿，所以開左支橫絞黎做主兵器，另外果支則諗住綁個池魚仕掛落去搵下有無池魚。未得閒落仕掛，支主竿就已經有魚訊，不過係電報員，但由於我地今日主要都係用蝦仁，所以隻勾都比平時勾生蝦用既勾細唔少，所以電報員都係要棄械投降，束手就擒。不過注重保育既我就梗係即時放生啦，一於落餌再釣。海入面魚仔眾多，所以好快咁我就中條扯旗立開齋落生倉喇，而力奇都唔輸蝕亦都抽返條電報釘上黎，當然我又係叫佢放生了事啦。跟住都不斷有電報魚訊，而我就邊釣邊綁仕掛，搞掂之後就即刻出動，希望搵到池魚，可以比力奇見識下我出發前同佢講既目標魚同埋當中既爆釣樂趣。可惜，事與願違，池魚未搵到不特止，雞泡魚倒是湧過來了，仲要一剪就剪走我成抽仕掛而唔係剪我勾，真係即刻又無得玩喇！雖然我仲有幾掛仕掛在手，但係既然剛剛放左幾次絲都未有池魚出現，還是等到釣到一條半條池魚時再冒險吧。

釣左一陣，偶有中扯旗，不過我見風好似唔算大，於是就決定解纜出去大海位附近既碎石排睇下有無機會搵下釘仔同紅衫。雖然話無乜風，但係對於我地四匹仔黎講都已經係一個挑戰，而且我又唔想貿貿然未搵到排位就落錨，所以唯有飄住釣；好在風真係唔算大，所以架船都只係順住一個風向咁飄，雖然有點快，但係我仍然決定搵到魚先落錨。話咁快力奇就中魚啦，而且今次仲有點驚喜，上到黎一睇，雞旦惑一條，佢話真係好開心，已經完全中毒了。又話估唔到岸邊釣魚同今日既經歷係差咁多，至少起碼密密有魚訊呢，哈。話咁快就又飄左埋岸邊附近，咁我見剛才位置有點魚訊，就決定返寨落錨。落餌無耐力奇再執多條瓜衫，諗住呢個位都算唔錯啦，但係認真黎講呢個位就有點當風，力奇話開始感覺有點搖曳，於是我比左粒白兔仔佢食，等佢無咁暈同埋繼續釣，話哂今日其實主角係佢，我都係想比佢體驗一下艇釣既感覺多過自己要過手癮。釣左一陣，魚訊唔係特別旺盛，但係就當哂風，所以決定起錨走人；由於唔想返頭先果面釣，於是決定駛到錨地有大船下錨的背風位作釣。啾呢度我地又有新郵票出現：竟然有條雙牙仔仔出現，這些能長到大大條的魚我緊係打個卡就張佢放回大海啦。之後都係得零星魚訊，我同力奇諗諗下，決定返去躉船附近一帶，不過今次就靠在旁邊的浮標試下咩環境。一到埗就已經有扯旗仔食餌，不過我就中條瓜衫仔仔，咁梗係放生啦。之後我地都係中緊扯旗仔時力奇突然中條金絲仔，而我就終於都黎個扯旗雙飛，不讓力奇專美。本來呢個位好地地，不過後來愈釣就愈多雞泡出現，搞到我地無奈決定轉位，咁都好，起碼比我有機會遇到之後全日算係最大條既魚- 手板金絲立一條！

釣多一陣，我見風勢有所減弱，同埋水流開始靜左，望下個鐘，先就黎3點。於是決定又再起錨開出去大海位飄住釣。釣釣下忽然覺得幾好似勾到野，但係又唔係魚，不過又有重量，咁就不斷收絲，上到黎水面，啊，原來係水蟹一隻，仲要勾住佢隻腳，注定佢無運行。繼續釣既時候忽然中返一兩條池仔，於是我提議力奇轉玩池仔仕掛，一於搵下有無得爆下池，事關如果唔轉釣組，今日如無意外都只會係繼續扯旗立仔同埋瓜衫仔同埋無限雞泡。就係咁樣，力奇轉左仕掛釣組作釣，我就繼續釣魚仔。落左都唔夠一分鐘，就比佢中到第一條喇！絕對係好開始，而且更加象徵性既係卒之比佢用假餌中到魚了。流水飄得快，一過左附近範圍就無乜魚訊，於是我又再返寨。今次不得了，仕掛一落到底力奇就大叫魚，仲興奮到話好重，又大叫「老Y」，叫到成個海面既人都知道我叫「老Y」啦。收到上黎，一抽3條！力奇真係開心到炸，不過影完相解完魚時就又已經飄離排口，又係要開艇返寨。真係估唔到連池魚都有寨口，咁但又無所謂既，至少返寨時我都有魚仔中下。之後我就繼續釣扯旗仔，力奇就扯池仔，最犀利果次直頭爆哂磅頂咁狂中四口，開心到佢呱呱叫，狂讚手感不得之了。而我倆就係餘下既時間分工合作，到最後臨收工時仲要比我執條手板瓜衫，認真喜出望外呢。

講返今日，出發前目標基本皆達成，首先要讓力奇體驗艇釣樂趣，二來又希望佢都中到下魚，三來可以比佢知道適合既工具係好緊要，而最後我希望可以搵到池仔比佢嘗試爆池既手感；以上種種佢都體驗得到，唯一今日未有終極大獎就係出動撈簊，不過能夠謗導到佢加入我地艇釣大家庭，已經算係我目標既達成。至於佢，則話今日釣到爆哂，亦好滿意全日既行程同埋玩得好開心。咁就足夠啦，不計較魚鑊，注重釣魚過程的樂趣，才是我所想帶出來的訊息。當然，有魚就更好了呢，哈哈。

出發！