漫遊南丫偷襲西博寮

日期: 01/12/2018
農曆: 十一月廿六
地點: 南丫島、西博寮海峽一帶
艇家: 九叔
釣友: 鬼仔、力奇、彼得、朱爸爸、YY
天氣: 天晴、寒冷、東北風、五級
水流: 慢流、不俗
釣穫: 花惑 (磅頭x 1)、什魚幾斤

是咁的，今次釣行係鬼仔吹雞既。事緣其實就係佢兩個月前已經同左我講話放假新年期間會回港十天，咁當然想出去釣返個魚大家多個回憶，於是著手預備。可惜天氣不似預期，本來約好哂艇期都因為起北風天寒地凍又落雨而被逼取消。臨時睇睇日歷及天氣預報，終於決定膽粗粗今日東北風5級都照出、旨在大家開心一天。已經有幾年無搵九叔，諗返起成十年前佢已經係一位老人家，咁十年後既今天佢咪更加係一位白髮蒼蒼既老人家囉；所以鬼仔打去搵佢要艇期時都怕呢位老人家已經退役，不過還是該慶幸的就是九叔還是身體健康的一位老人家呢。

朝早約左鬼仔一同前往魚餌店攞蝦，在碼頭時已經見到佢口中擔心會是不太健康的老人家九叔已經一早在等著了，於是落艇過對面街渡碼頭接埋其餘幾位人士就正式出發！九叔問我地有無想釣邊度，我地宗旨就係從來都尊重艇佬意見，不要問只管信。不過當九叔車我地去南丫島果邊時我就暗地裡同鬼仔講左句：南丫島從來都同我無緣份，釣親南丫島都係呆滯居多呢。所以我個心已經冷左半截了；需知道未出發前大家其實都係雄心壯志，尤其係彼得，因為佢一早係群組訊息入面話左要一雪前恥，誓要奪得今次既大魚獎咁話喎。

不過南丫島呢個地方其實就係一個荒蕪之地，而我就艇未停定時已經同大家講話呢度就係香港漂亮既一個離島叫南丫島，大家今日將會圍住呢個度遊一周船河(暗指剩係坐船，釣唔到魚)，而果然大家到達第一個釣點之後都真係只有呆滯。只有我稍為好一點開了個齋，是條石狗仔。其餘人除左九叔之外係第一個釣點都是靜坐。去到第二個釣點大家都仍然係靜坐，除左我同九叔釣了幾條小石狗之外，其餘人士都仍舊開不了齋。呢個時候鬼仔決定將什麼大魚獎的都拋諸腦後，一心只求有返幾條魚仔上釣開個齋開個心先；於是佢就將釣餌由生蝦仔改做剝殼蝦仁了。此舉果然有效，很快的佢就加入左「齋已開」行列啦。無咩魚釣大家就係度吹水，但係有一個人一直不發一言，果個係就阿力奇哥啦。咁唔駛估都知咩事啦，平時既佢一定會呱吱呱吱既，但係而家就鬼死咁靜，一定就係中壓 - 暈船浪啦。去到之後個釣點佢終於都頂唔順要嘔啦，嘔完就舒服左唔少。我問佢今朝早餐食乜飲乜，一聽到佢話飲左奶茶，一聽到個「奶」字都未到個茶字既時候我就話唔怪得啦，逢係有奶類成份既野，對於那些唔係咁強耐暈船浪既人黎講根本就係毒藥，係必然中招的。魚就無咩點釣到啦之後幾個釣點，但係就仍然不斷聽到力奇作嘔既聲音。佢都真係有夠辛苦的了，前前後後足足嘔左成四次先至回到魂。不過講真除左辛苦一點之外佢都無咩蝕底既，因為其實到中午佢回魂為止我地釣到既魚其實都係寥寥可數，所以佢個大魚獎仍然係有希望既。

我地終於黎丁南丫島發電廠旁對住洪聖爺灣一帶既靜水位掃駁，係呢度唔好講話釣魚先，淨係風都已經細返好多同埋海面平靜好多，所以都見到力奇既臉色好返唔少，開始拎返起支魚竿釣魚之時仲會有返兩句說話，我見此狀才放心一點，心知佢應該終於是挨過了。大難過後，必定有福，視乎大小而已。咁佢係呢度就先有小福，接連中返幾條石狗，立即大叫要追回上晝失去既光陰，仲要釣多一點煲返啖魚湯補身，畢竟今日大量流失元氣。釣多兩條開始驕傲既佢又同彼得打口水戰，事關彼得其實釣到中午，都只係釣到幾條放生大小的石狗，所以能夠見到佢地吵吵鬧鬧，我都覺得放心起來。

口上吵鬧，但係力奇又真係做到野，接連釣左幾條石狗之後竟然比佢起返條火點仔，都算叫做新郵票。不過唔理佢咁多住啦，因為兩分鐘唔夠就到鬼仔抽魚，佢仲笑笑口咁話呢條終於大條過之前既石狗少許啦，一上水，大家都「嘩」左一聲，不得之了，係一條巨型石狗！真係有好幾年無見過咁大條既石狗公啦。力奇見到都話呆左，話未見過有咁大條石狗公喎。大家即時都更有戰意，我同鬼仔，甚至力奇都不斷有魚仔上水，我數一數直頭多過上次同佢力奇之友維港無火車坐 https://yy08.pixnet.net/blog/post/106403149 時佢釣到既魚既總數。事後同佢講返佢話佢今次比較掌握到竅門，無論試底同等魚試餌同起手既時機，都拿捏得比上一次好，所以釣技同魚獲都有所進步。

離開左發電廠我地車左去榕樹灣一帶，但係都無咩料到，於是九叔車到黎北角咀附近，不過仍然都無料到，望下個鐘都成三點鐘啦，再唔搏就今日真係乜都無大家只能平分返個大魚獎喇。於是九叔決定盡地一煲，一於出航道試下搵花惑。不過呢個釣點既問題就係要走鬼，好似寒雨青馬偷襲馬友 https://yy08.pixnet.net/blog/post/106269538 咁樣要睇住海事處既巡邏船黎避住釣。但係真係釣花惑呢永遠都係要係航道位先最多最密同大條，所以無辦法，走鬼都要試。果然一去到第一口餌鬼仔同九叔都已經中魚，鬼仔中條古惑仔，而九叔果然抽返條腳板花惑上黎，佢見今日都抽到花惑，即時仲同我話前幾日個車個客先中條斤零黃花賣左成千銀呢。唔理花惑定黃花先啦，大家見到有魚即刻都好振奮同埋即時醒哂，但係無奈呢個時間九叔見到遠處有隻巡邏船往我地方向駛過，於是即刻叫大家收繩退回航道邊躲避，但係無辦法，鬼叫一埋到黎真係即刻無魚食餌咩。咁所以一睇到架巡邏船駛開左，我地即刻九秒九衝出去，然後九秒九落餌，呢個時候我都已經唔知大家既情況啦，即係知道好專心咁望住支竿同埋身邊有唔同既人起魚咁。然後終於輪到我啦，嘩，好似好重咁喎，支竿都彎哂，終於頂到上黎，原來中哂兩飛，唔怪得咁鬼重啦，上面石狗下面腳板花惑，真係認真有手感。力奇本來仲大叫話哎呀阿Y比你贏左啦，點知唔夠三十秒就聽到佢話「都係無野啦，比彼得贏左啦！」正在忙於解魚既我即時回頭一看，嘩，磅頭花惑一條呢！大家即時概嘆大魚獎將要傍落他人了，但係唔顧得咁多啦，一日未完場一日都仲要把握時機，一日都仲有希望。不過首先就又要走一走鬼先；而重新返到位置之後既我，好快又有魚食餌啦，忍佢兩野，等佢食深一點然後一抽，中魚！又係頭先我中果條既重量，一路收既時候有幾次都輕左以為無左，其實應該就係條魚追水上，終於比我收左條魚上黎，我本人就無乜為意，點知鬼仔同九叔一見到就話，黃花黎既！嘩，真係好意外、好驚喜呢！是海黃花呢，真係可遇不可求喔，金條都算係我既新郵票呢，以前細細個有無釣過就唔知唔記得喇，但係近呢十年釣魚既時光黎講就真係第一次呢！反正又唔係大條，金條價值不大，梗係拎返去同屋企人一齊分享美食啦！彼得見我咁興奮，心諗又唔係大條過佢可以贏到大魚獎，就問我地點解，咁鬼仔同佢解釋左海黃金就係金條咁解，佢聽完之後又話要中黃花，哈哈真係如果咁易中，佢地就唔會叫左金條啦。餘下既時間我地都無中過比彼得條花惑更大既花惑了，不過都再釣多幾次花惑仔，而彼得自己都中多條腳板花惑，可算是今日大贏家啦。而九返繞緊繩準備收工時見我岩岩落左餌就話比我釣埋果口餌先收工，咁我都「幸不辱命」咁中返條古惑仔埋齋先至完成是日釣行。

回程途中彼得開心得滯唔記得坐返埋來後面，搞到船頭食浪時佢中到應一應，我就笑笑口同佢講，等陣上岸即時頒個大魚獎比佢等佢即刻去買返條褲返屋企啦。而上岸之後我地就係碼頭來返個大合照並進行大魚獎頒發儀式，而我地今日既南丫島漫遊釣行就正式完結啦，想同鬼仔釣魚，又要等佢出年返黎先有得玩過啦。

晨光