化餌黨維港強搶利是

日期: 04/21/2018
農曆: 三月初六
地點: 維港黑角頭對開藍塘海峽
艇家: B記
釣友: 大表妹、細表妹、朱爸爸、阿丹、YY
天氣: 天晴清涼、東至東南風四至五級
水流: 慢流、水質不俗
釣穫: 沙立 x2 (磅頭)，黃釘、什魚一堆埋單8、9斤

「是咁的，黃釘日。完」呢句說話係阿丹給我地是日釣行既最簡短而又貼切的概括描述。

是咁的，雖然釣行真係可以用以上幾隻字概括描述，不過當中亦不乏一些細節位的，所以點都要交代一下吧，哈。咁我地今次釣行主要呢就係見好耐都無同表妹地出過海釣魚啦，於是就吹個雞諗住同佢地出海玩返日然後又食下魚飲下靚魚湯既。不過三月份因為大家都忙而細表妹更趁假期空檔飛左過英國探望佢個姨娚，所以最後都要排期排到四月中我地至可以集齊團友成行。由於早早就約定左B記，所以天氣係點都無得我地預計同埋選擇，出發前一星期睇天文台就話東至東南三至四級；跟住過幾日睇又話可能三級；但係星期五晚則明顯感覺到風起了，再睇天文台又話東南四級，離岸五級，即時心裡感到一點不妙，只因我地出海釣魚唔怕曬，唔怕落雨，就就最怕大風，因為會好影響丁架船既慇定性同舒適度，所以星期五晚見到咁既天氣我已經同阿丹講明天記得帶多件衫，自求多福喇。

另外，出海釣魚的事前準備其實一點也不馬虎，又要準備釣具，亦會預備釣餌；除左生蝦之外，我同阿丹每次出發前都會買好蝦仁，然後再醃製及染色等，工序繁多，絕對唔係拍拍屁股就起行出發那麼簡單呢。而今次除左蝦仁之外，我更加嘗試醃製南極蝦，因為黎緊五月份開始將會是休魚期，到時可能就好難買到赤米來做蝦仁作釣餌；所以如果南極蝦醃製成功的話，咁到時就可以用南極蝦代替蝦仁了。咁岩出發前兩日我同阿丹都稍為得閒，咁我又預先買好左蝦仁，於是連同我在家已經醃過的南極蝦一同帶去阿丹屋企再作後期加工。賽後檢討就覺得南極蝦可以再用多些蜜糖令蝦身更為結實，因為今次釣行南極蝦仔實在經唔起考驗，一遇到化餌黨強襲就立即消散；當然我係相信如果在平時還可以支撐得到，但係可惜今次既對手係瘋狂的電報員呢...

好啦，一於講返釣魚行程啦。朝早例牌嘉亨灣集合好之後就上艇了。一上到艇B記都已經話今日大風，未必出到白石。咁睇天文台話下晝風力可能會收細一點，咁B記就話先車出去黑角頭對開一帶，邊釣邊睇天氣情況再作打算。一到埗我都仲未幫表妹地綁好哂架生，已經見B記落餌同埋開齋了。真係快得咁緊要，落左去都唔夠兩分鐘就開齋，小黃釘一條。好喇，到我綁完架生出去釣啦，櫈都未坐暖就聽到朱爸爸話開齋了，原來係一條小牛揪，真係唔錯喇，咁快已經開齋，至少今日釣況都應該唔會太冷清掛?
跟住好快就輪到我同阿丹有魚訊同開齋了，係良型石狗喎，唔錯，今晚煲湯應該好快有著落啦。之後我再上多條石狗就到阿細表妹開齋了，只剩下大表妹一個人在艇內為目標努力著。不過都唔知過左無幾耐，阿大表妹都終於唔駛做「漏低既一個了」。咁多人都開哂齋，但係係喺頭果一兩寨，我地都仲未察覺得到今日將會比一股龐大既勢力所攻擊...

釣著釣著，就開始發現佢地既踪影了，因為我地接二連三都係釣到佢地，基本上可以話一落餌佢地就已經衝埋黎搶餌，唔比機會其他魚食餌咁樣。咁當然亦都有例外既，就好似阿細表妹呢個時候突然見佢抽左一手，跟住佢就話都幾重下，拉多兩拉都竟然話有點燒手喎，咁坐佢隔離既我就梗係代勞啦，一上手已經感覺到係魚黎既，不過攻擊力就有限，基本上都唔駛點就，只係慢慢的收就已經可以了；佢地係旁邊仲問駛唔駛準備撈箕，我則心裡有數啦反正副絲有成十磅，應該唔駛咁「勞師動眾」啦；終於慢慢收、慢慢拉就已經見到魚影啦，見到條魚都無一斤，決定直接彈佢上黎算數；於是，一條磅頭沙立就咁樣飛左上黎啦！真係好波不如好運，講咩都假，點解咁講呢? 事關其實係中呢條沙立之前，阿細表妹岩岩中完條黃釘，而口餌就比條魚整甩左個頭，咁我地兩個就話反正都係釣釘仔，唔駛換過隻蝦啦，勾返正佢咪釣得囉；跟住就掟返落去釣啦，然後唔夠兩分鐘，就撞左條沙立埋黎啦，咁你話喇，隔離我副絲兩門勾，有生蝦有蝦仁，都係唔夠隻爛蝦黎，注定係魚係要黎搵我表妹啦。不過今次係有進步架啦，因為細表妹今次係感覺到魚訊然後抽完魚之後叫我幫拖上魚，而唔係好似果次『霧鎖維港齊爆狗』https://yy08.pixnet.net/blog/post/106354723 咁樣中左大魚都唔知道呢。上完魚之後既細表妹真係風騷啦，即刻可以釣風流魚，話無哂壓力可以訓個靚覺先至起身再釣。咁都係果句啦，釣到魚你講乜都得架，哈哈哈。反而仲未有好野中到既其他人就要繼續努力啦。

不過之後我地遇到既都只係化餌黨，所以釣多一陣細表妹就真係首先休息去訓返個風流覺先喇。而我地就繼續同班化餌大軍搏鬥。不過呢班代餌大軍都總比另一批兵團- 扯旗仔兵團盥好架啦，起碼都唔會叫做真係細得可憐既，而且佢地咀大所以釣上黎都唔算困難，唔似扯旗兵團咁真係絕對地同你化哂所有餌但你可能一條都釣佢地唔到。就係咁樣，我地就開始左釣黃釘模式了，而如果你用蝦仁、南極蝦做餌既話，你係好多時都只係會比佢地化左舊餌而釣佢地唔到；反之如果你用生蝦仔的話，則較大機會可以將佢地釣上黎。釣到一條，你會想再釣，但當釣到一條，兩條、三條都係佢地既時候，你發覺你想遇佢地唔到好似已經係太遲了。之後B記都有車過唔同既位置，但礙於風勢關係，我地都係駛唔出藍超海峽黑角頭一帶既海域，而我地亦都只有繼續同黃釘大軍抗戰。

終於有一個時候，B記嘗試車去較多沙泥底既地方話要幫阿丹搵下瓜衫既踪影，但係瓜衫就未釣到住，稀客左口竟然首先比朱爸爸釣左上黎喎。阿丹見狀，又話要釣喎，我仲笑笑口講話邊有咁多左口呀，這些都係小貓三四隻、可一不可再的；點知呢個世界有樣野叫做信念，可能阿丹念力真係比較強勁同埋正面，就係佢口中唸唸有詞話「我要左口、我要左口」之際，真係比佢抽返一條左口上黎！仲要係朱爸爸中完無耐佢話想要之後就即時中到的第一條！我同細表妹都相視而笑，對佢既呢股神秘力量深感神奇同拜服。不過上完呢條之後就暫時都無再見到左口了。

是日星期六，亦是賽馬日，阿丹和朱爸爸都是馬迷，所以佢地一邊同化餌大家搏鬥既時候，亦都一邊係度研究一下馬經，其實都幾寫意。到之後賽馬開始左之後，阿丹仲拎左個隨身喇叭出黎廣播賽馬實況，令到氣氛升溫，亦令我地對不厭其煩既化餌大軍既容忍程度提高不少。不過細表妹就一於好少理，見到我地既魚訊都無甚驚喜，於是又繼續訓佢既風流大覺了。而想法多多既阿丹發現用蝦仁雖然會較難釣到黃釘亦會被化餌，但係佢一心想要既係紅衫魚，而如果用生蝦基本上係未釣到紅衫之前已經被黃釘仔搶劫哂了；再者，本來釣紅衫用蝦仁就是較為得食，所以佢決定一於放手一搏，兩門勾全用蝦仁，專注搜尋紅衫的踪影。而佢亦不時會用念力呼召紅衫，所以雖然今日係化餌大軍壓境，但係結果都係孝感動天的比佢釣返三兩條小瓜衫呢！

我地全日都係不斷就係黑角頭開外海域一帶作釣，一時靠近一點小西灣這邊，一時又試下靠東龍島那邊，總之就是希望可以邊釣邊等天氣轉晴收風再出打浪排，白石等釣其他魚；但係天氣不似預期，風根本就一點收細的跡象也沒有，所以到得兩點時我都已經對能夠離開黑角頭不抱有任何希望了。反而係希望係餘下既時間睇下會唔會好似細表妹咁樣搵到一口半口能夠突破化餌大軍食餌既沙立呀、細鱗呀食埋黎咁樣。不過等到既，唔係我，而係B記。佢又係一貫在我地出面忙於應付化餌大軍之時，佢就不知不覺的中左條沙立然後掟出黎，剛好同表妹既果一條湊成一雙利是；不過亦都係今日最後既一條沙立了。但當然當時既我地係唔會咁諗啦，而係對繼續有沙立抱有樂觀既態度啦。

沙立就無啦，不過之後都有新郵票架，就係阿大表妹中返條狗棍啦，而我亦都中到紅衫喎，不過我係用生蝦仔既殘骸中架，所以真係魚要食埋黎你擋都擋唔住。題外話，紅衫食餌其實和黃釘、石狗等不同，而中魚之後佢既反應亦都唔同，佢係會追水上來的；所以當我一抽一中時，我又感覺唔到條魚時我就猜測應該是中到紅衫了，畢竟應該唔會咁好彩會中到同樣中魚後會追水上的黃花或花惑吧。跟住B都仲有中返條紅衫，仲即時同阿丹講話好彩佢都執返條唔輸蝕咁添。無計啦，阿丹次次上船都一定會問B記可唔可以車佢去釣紅衫，所以我諗係B記眼中，阿丹就等如紅衫既代名詞了，哈。

釣到咁上下，咁屋企人又例牌打黎問有無魚釣到返屋企開餐咁啦；釣魚呢樣野就係咁神奇架啦，你聚精會神、全神貫注咁樣釣既時候呢，魚呢就往往都唔會食餌架；但係當你一分心分神做第二樣野既時候呢，佢地就會偷襲你架啦，就好似本身我釣緊魚咁耐都好地地既，跟住個電話打黎比細表妹講左陣都係唔食餌架喎，但係到阿細表妹一交個電話比我講既時候呢，講左都唔夠兩句，就突然感覺到一下猛烈既魚訊來襲了！我即時右手本能咁抽竿、左手丟低部電話，然後即刻拎住個魚絞收絲，感覺絕對比那些小黃釘強烈不少；最後上到黎原來係一條左口！細表妹即時話好彩你上到呢條係左口唔係化餌黨，如果唔係我實唔放過你咁樣對待我部電話(剛才一有魚訊抽完魚即時丟低佢部電話)；咁我咪答佢如果係化餌黨食餌我可能抽都費事抽啦，就係因為覺得下魚訊有返些少份量，我先會咁樣既反應啦，哈哈哈。

餘下既時間我地都只係繼續同代餌黨大軍作戰，阿丹就好不屑咁話，「經過今日之後，除左雞泡魚，我又多左一樣討厭既魚就係黃釘啦。」連朱爸爸都話成個海都係黃釘，可唔可以搵下其他魚釣咁。但係無辦法，真係除了黃釘，還是黃釘。所以阿丹最後都放棄了，亦都無奈咁樣話：阿歪，你個釣行遊記六個字可以寫完了，就係：『「是咁的，黃釘日。」完』，哈哈哈，無錯，如果唔係細表妹同B記中左兩條磅頭沙立，今日既釣行遊記我真係可以以超簡短的幾隻字就交代完畢。不過又咁講，釣行除左講釣到乜魚，過程其實亦都好有趣既，始終只有在釣行中經歷過的，才會有這種深刻的體會呢。我相信如果你如果黎過同我地一齊玩，絕對會明白這些釣行遊記都是有聲遊記，因為所有事情，甚至細節，都可以說係歷歷在目呢！

特製南極蝦:

第一次出水及醃味


第二次出水

再加南極蝦特別醃液

完成