YY08的部落格

日期: 12/08/2018
農曆: 十一月初二
地點: 南丫島 下尾灣一帶
艇家: 九叔
釣友: 朱爸爸、朱伯伯、大表妹、細表妹、YY
天氣: 天晴相當清涼、東北風四至五級
水流: 中等流速、水質不俗
釣穫: 什魚一堆 埋單4、5斤

「是咁的，今日係魚竿新手班同集郵日。」

是咁的，上次表妹齊聚圍攻古惑仔 https://yy08.pixnet.net/blog/post/106423753 之後表妹地就表達過話想買竿釣魚既想法了，可能是嫌用手繩每次收繩都要費時用勁，而且稍一不慎又或遇上大風亂吹魚線就會糾纏在一起、亂作一團；然後又要費時失事咁樣解結；這事就算在家中做都已經會嫌煩，何況還要在一搖一晃的艇上呢? 所以佢地就決定投入魚竿界既懷抱啦。咁有左呢個念頭當然又心思思想去買架餐同埋出發啦。咁我地就討論住出發既時間，由於十一月大家都忙，咁就唯有十二月先出發啦，而大表妹又唔想太遲會天氣凍的關係於是就提議月頭出發，咁細表妹又得八號這個星期有空，就自然不作他選了。揀完日子就到了揀去邊度釣既決定啦，咁佢地出艇咁耐以黎都係只上過B記隻大頭艇，咁我就問下佢地會唔會想試下其他類型既選擇，比如話較小型但靈活性同作釣方便性更高的快艇。細表妹就話跟大隊既，大表妹就話如果有得選擇又就到期既就想嘗試一下新體驗；咁得啦，即刻搵九叔約期。

早左兩三個星期預約，當然未知天氣情況，唯有自求多福啦。剩下可以準備既就係去準備好架餐同埋魚餌了。由於細表妹要公幹既關係啦，所以我就和大表妹先去選購裝備了；出發前我已經大約幫佢地預先睇左幾款比較適合佢地既入門裝備，然後再比資料同相片佢地睇過下先再出發﹗本身佢係睇中左我介紹既其中一款既，後來去到鋪頭度拿了幾支竿來試之後，卻發現另有所好，就是我原先介紹給細表妹的那一支。咁佢就諗住等埋細表妹有空時再一同購買。至於魚絞方面佢就話未有主意，決定釣魚當天試用過我的直絞同橫絞先再作決定；無問題啦，反正自從我轉左用橫絞而返唔到轉頭之後都有多幾隻直絞一直放在家中閒置做後備絞，咪借比佢試用完先再決定，無謂買左之後又想轉會而浪費。

出發前十日睇天氣都仲話無乜問題，點知到剩返四五天就話會有季後風來襲，真係命中注定，時也命也。咁大家最後都決定如期出發，咁我就如常去買蝦仁同埋南極蝦做足準備囉。而由於細表妹最後都實在忙到抽不開時間來和我去買架餐，咁於是我就幫佢揀左一套裝備比佢過目，感覺優良就敲槌購買了。

然後黎到出發當日早上，果然因為季後風在之前一日的傍晚來到，氣溫比前一日一下子跌了都有五、六度，不過大家早有準備，著得暖暖的，所以都還是很可以的。出發前一天問過九叔可唔可以車青洲航道一帶釣花域咁，不過佢就話到時睇天氣再決定，畢竟如果大風的話就只可以去南丫島附近一帶的背風位作釣；咁我當然係信艇佬既決定架啦。今日咁大風，所以出發後九叔都係直車南丫島的下尾灣，因為佢位於南丫島既西南面，正好就是避開大東北的背風位呢。

天氣比想像中好，來到背風位，當然風較少，但即使遠望海面都唔見有明顯的白頭浪，證明風勢也是可以接受的。另外更加令人恩惠的是，天空是較晴朗的，沒有要下雨的跡象，這已經很感動了。畢竟就算無乜魚釣都唔駛挨風抵雨嘛，哈哈。果然，魚訊係比較稀疏既，由於我要幫表妹們綁架生，所以就算數達釣點之後我都唔係第一時間落餌作釣而係繼續綁緊架餐的，不過到我終於綁完自己個釣組落得餌釣魚時，眾人都仲係未有境況，唔好話中魚，就連魚訊都未有。不過又咁講，表妹們佢地都需要一點時間去學習同適應點樣用架餐去釣魚，雖然佢地在新手帶挈爆波叔 https://yy08.pixnet.net/blog/post/106144657 時已經用過魚竿釣魚仲爆釣添，但係畢竟都已經係好一段既時間之前了，再加上魚場同海釣實戰有所不同，所以更加要慢慢適應。首先中魚的還是九叔，小牛揪一條，總算是為是日個生倉破零開齋。不過之後大家又係繼續等待了；然之後到我首先有魚訊，輕輕一抽，有點感覺，之後佢追水上，到再有感覺時已經係佢上水既一刻，竟然係一條馬友郎。印象之中應該唔算是我的新郵票，但就肯定表妹們佢地同我釣咁多次魚都未見過啦。所以呢條魚對佢地黎講係今日既第一種新魚種呢。釣多一陣仍然魚就未見縱影我就同下表妹地打氣，細表妹話佢要中魚先，因為大表妹一向都係默默耕耘型，咁一於繼續耕耘多一陣先收成咁話喎；點知，接住中魚既就係默默耕耘開既大表妹啦。上水果刻佢就話石狗釣一條，細表妹係後面見狀加左句：「咁細條都比你釣到」哈哈！我話唔理啦，總之係開齋魚就係好魚啦，點知九叔見到就開口話唔係石狗公黎，係石獅黎喎，叫我地小心，唔好解魚，就咁剪勾放落海就算。咁我幫佢剪左勾放左條魚之後細表妹就又要綁過勾喇。今日要讚既係佢地終於學識左點樣綁勾了，縱使其他釣綁都係未識綁但至少已經肯去學習綁勾，絕對係好開始。畢竟如果我唔係度又或者忙緊其他野唔得閒時佢地而家都識得自己搞掂了！至於條石獅，絕對又係新郵票黎！嘩，今日頭三條魚已經有兩條係新郵票，真係夠哂特別啦。

不過之後再釣下釣下都仍然未有進展，咁九叔就話繞繩車埋發電廠果邊試下咩環境啦，始終呢面石駁位多點石底，始終應該有返多點石狗公食下餌既。果然到位無耐就到細表妹開齋中開光魚啦，上水係石崇一條，又係新郵票！其實出發前同阿丹講開會黎釣魚如果出南丫島我就話魚應該唔多，但就希望釣到石祟，始終南丫島特產黎，差唔多次次黎都執幾條；果然今次黎到又有人釣到！然後埋左黎石位作釣，魚訊果然多返一點，不過對於魚竿新手既表妹們黎講就比較吃力，勾石既情況亦都多起來，我就比較忙喇，而佢地又釣得比較膽戰心驚咁囉。但係魚與熊掌，當然要富貴險中求啦；率先叫做求中既算係我，因為今次我有魚食埋黎條魚餌都唔試埋黎一擔就走，我輕輕鬆鬆一抽就中魚，然後就有一陣小小的掙扎力，但都叫做有得爽下，可惜就係水淺，爽得十零廿秒條魚就見光了，手板沙立一條，算係認真唔錯了！跟住就到朱爸爸中魚啦，睇佢竿頭都有返少少重量，佢見我中完沙立就話不如上多條沙立啦，不過上到黎就係一條良型石狗！總算叫做開齋啦。 咁我同細表妹跟住都有石狗中到，但卻係微型石狗；細表妹仲話唔明白條魚點樣可以食到隻比佢細只不過係一個頭既生蝦仔呢。好啦，呢邊就中石狗仔，果邊朱爸爸又有魚中啦，今次竿頭抖動得更利害，當然淺水魚惡，但係上到黎一睇，又係一條長過手掌既大連咪。對於我黎講就唔算新事物，但對表妹們黎講，原來亦係新郵票。而且連咪釣得多，今次呢條過哂手板又真係算係幾大條呢！梗係要同朱爸爸影相打返張卡，好比遠在美國的小朱睇下威威啦，哈哈。不過好戲，原來仲係後頭喎...

之後我地係度都有返一些石狗中到，而朱伯伯亦都終於開齋了，而且仲要連續起左幾條石狗公添，而我除左石狗中到之外，仲有火點釣到，雖然都係常見魚種，但係都算係表妹們釣魚時未見過既魚種黎喎原來。釣多一陣，都係疏落地偶有魚訊，咁九叔於是又叫大家繞繩，車返去下尾灣對出大海位試下。首先中魚既應該係大表妹，默默耕耘既佢剛才在發電廠石駁位勾石勾到怕，勾石多過中魚；而家出返黎大海位，即刻醒神唔少，首先中魚既就係佢喇，原來係一條白域，雖然唔係我既目標花域，但係都叫做又一個好開始丫。然後過多陣返寨無耐就到細表妹中魚啦，以為係域啦，點知上黎係一條瓜衫喎，我即刻話要影相然後傳比阿丹睇，事關大家識佢咁耐都知佢最朝思暮想既就係紅衫呢，哈哈。頭先中連咪打卡既朱爸爸既好戲呢個時候就上映啦，又係見到朱爸爸竿頭起勢抖動，我以為係花域定立魚啦，點知上手一見，原來係一條良型頭鱸喎，真係絕對又係一張新郵票喇。呢頭剛剛同完朱爸爸影完相，岩岩放低部手機，果頭又見隔離既大表妹抽魚啦，仲要又係竿頭係咁震，明顯同之前佢中既小魚唔同，上水見光，狗棍一條，仲要腳板咁長，唔怪得咁好飛啦，總算佢都體驗到用竿中魚既爽歪歪感覺了。呢段小高潮，可謂一閃即逝，係今日較為疏口既釣況之下，如果錯過了又要等好一陣子了，可惜我就把握唔到機會上車啦，唯有下一輪啦。靜左一陣，返左幾次寨，到我終於有魚訊啦，我仲叫埋細表妹睇，因為我發覺佢地往往有魚訊時就會急不及待揚竿，就算未有明顯的那一下要抽魚的魚訊佢地仍然會揚一揚魚竿，咁樣係會導致本身食緊餌既魚可能卻步唔再繼續攻擊魚餌的；咁我見今次有魚訊，於是就叫佢睇我支竿既震動幅度同埋動作，點知我又竟然抽唔中呢一下有明顯既動作，認真失策。不過好彩，呢口唔中，過多陣都仍然係我有食餌，今次我唔理啦，等佢食到夠先抽，一中又係會走水喎，水深點，享受多一點，見光上水，又係同我剛才中既果條差唔多大既手板沙立一條！剛才既小高潮無我份，而家總算都係叫做比我中番條魚補數。表妹地見我用蝦仁中到魚，於是都話要轉用蝦仁，不過我地係呢個位就無再中魚。

跟住我地又轉位去到大海位另外一個近住浮泡既位置作釣，話都無咁快，就見到轉左用蝦仁既細表妹中魚喇。我見佢支竿都係咁震，佢仲笑笑口咁話好過癮，上到黎一睇，原來係扯旗仔一條，不過係一條差唔多有手板大既扯旗立，比以往我地釣到、只有「五蚊銀」大既扯旗仔仔大得多呢！然後今次咁岩我見到九叔又上左條良型瓜衫，然後好快又到朱伯伯中魚啦，跟住就又到細表妹中魚啦，今次佢支竿仲震得犀利過頭先、樣又爽過頭先，莫非係瓜衫或者立仔? 上到黎一睇，又係新郵票黎喎！我話佢知係惑魚黎，佢就答話未見過既，都唔似平時釣到既惑魚既；我話係呀，因為呢條係三牙惑黎架，因為其嘴有三顆利牙而得名呢；就係咁，佢又一張新郵票入手了。但係今日既新郵票仲未出現完喎，事關過左一陣到我中魚，上水一睇，係靚仔鐵立一條，絕對又係一條佢地未見過既魚黎呢！之後我地係呢個位都有零星中魚，執返幾條瓜衫咁，之後魚訊靜返落黎之後，九叔又話轉位啦，就係咁我地就往是日最後一帶釣點駛去。

在駛過榕樹灣駛到石角咀對開一帶時，大表妹忍唔住想進攻了，於是問我可唔可以幫佢由單勾釣組變成我在用的雙勾釣組，當然無問題，我之所以之前無幫佢地整呢個釣組，係怕佢地因為未熟習用竿釣魚而容易掛底勾石，而勾石扯斷之後又要成個組釣無哂，咁就真係綁一大輪而又好快勾石斷左真係會好無奈的。不過而家既然唔再釣石駁位再加上佢都叫比今早初初用竿時熟練了一點，所以我就幫佢立即改變釣組。不過未綁好已經到釣點，我就比我果支竿佢玩住先，順便比佢試下用橫絞既感覺，從而決定要買那一款魚絞作釣。而我就穿用左佢支竿之後就順手拎黎作釣，比較一下佢支竿同我果支既分別。不過其他唔講住，用得耐橫絞突然一下子轉返用直絞，原來真係幾唔習慣呢。不過都無咩時間再比我試下支竿了，因為我到完場都無用過佢支竿中到魚呢，唯有等下次先再試過支竿先可以比到感覺同用後報告啦。至於大表妹，好似佢都無用我支竿中魚，但就發生左一段小插曲，就係佢中左地球，但係初次用竿既佢又唔係太識分別，咁岩我個磅頂又調較得比較鬆，所以佢一路都可以收到線又好似有頂魚既感覺，直到我見佢收左一陣魚線隻色都無改變我先察覺到原來佢係中左地球呢！睇落好似好好笑，但其實對於魚竿新手黎講一點都唔算陌生，所以今次都可以叫做係比大表妹上左一課，吸收左一個另類體驗呢。

就係咁樣，我地今日既魚竿新手訓練團就係呢個大東北季後風吹襲下但又唔算好差既天氣情況之下結束了。總括黎講，今日既釣況真係好一般，但係往好方面諗，我地尋日睇天氣預報都擔心今日天氣情況會好唔理想，但係結果出來又唔係想像中咁差，起碼全日一滴雨都無落過，而且其實真係唔係好凍，最多就係大風左同埋凍左好幾度，令到我地釣唔到一些較理想既釣點同埋魚既活躍程度都大大減低左，但係今日既魚既大細其實又算唔錯，至少大家都有得爽過幾下；而且魚種可算是非常的多，令到佢地既釣魚集郵簿多左唔少印章，希望佢地以後會愈釣愈進步，郵票愈儲愈多啦。而今次既快艇新體驗又係一個唔同既感覺，亦令佢地改變左釣快艇較為搖晃同埋唔安全既想法，同埋亦令佢地感受到在重心較低同近水面既釣魚情況其實更為理想。不過可能去唔到我想艇佬去既釣點啦，所以大表妹就問我關唔關艇佬問題，我亦有解釋話可能係關乎天氣的事，因為以往我地去釣魚時，九叔都會問我地想去邊度釣的，但係今日我諗真係天氣唔好對佢太多限制了，始終佢隻艇又真係唔算大隻，所以受天氣影響既情況會更大。不過點都好，今日能夠好好咁完成左佢地既新手魚竿訓練團，仲人人有魚中，仲有得爽過幾口上魚感覺，我都已經覺得可以接受了；希望下次再來時可以去到理想既釣點同埋更加密口，然後就梗係人人有魚中啦。

 
新架餐入手
  
 
上埋布線
 
醃製南極蝦
 
醃蝦仁
  
做好準備
 
細表妹開光魚 - 石崇

朱爸爸與大連咪
 
我條靚仔火點
 
細表妹中瓜衫我影完即刻傳比阿丹睇

  
朱爸爸中頭鱸
  
大表妹的大狗棍
 
好好玩既三牙惑
 
我又中多條沙立仔

好靚仔既鐵立

努力中
 
努力中
 
嘆住釣
 
嘴裡明顯三隻大牙既三牙惑

 
清蒸雜魚
 
又滑又有魚味既石祟
 
香煎雜魚