女將兵團初征夢幻釣場

日期: 11/23/2019
農曆: 十月廿七
地點: 青龍頭一帶
艇家: 大妹姐
釣友: 大表妹、細表妹、阿丹+ 女友、YY
天氣: 天晴、東至東北風三級
水流: 慢流、水濁兼水凍
釣穫: 夢幻魚 x 1(兩斤半)，石玤x 1(斤半)、細鱗x2 (斤半x 1、6兩x 1)、什魚一堆埋單11、12斤

是咁的，如果各位有買開六合彩的話，咁你可能會明白每當有金多寶六合彩時、早買早享受的那種感覺，即是愈早買，就愈多時間可以幻想中獎的情況，以及你會如何去花呢筆可觀嘅金多寶彩池的獎金。而今次釣行，其實對於我地黎講，同樣都係有類似既情況出現，因為今次我們很早便定了要艇釣的日子，然後預早了差不多整整四星期就預約了艇家了！咁係因為大家太耐都無釣魚，都覺得係時候要聚一聚，出海止止痕，狠狠的釣它一天，所以雖然很忙，但在大家都給出一些空閒的日子之後就揀訂了這一天。而由於預早了那麼多，天氣是較難預估的一環，心想以往不論釣B記的維港、又或是香港仔九叔的南丫一帶，這些海域都頗受天氣情況影響，而如果咁早預約了，到時又天氣不好的話，那就一是掃興取消，一是夾硬頂硬上了。同阿丹左諗右諗，反正佢都想試下新艇家，於是我就提議不如去青龍頭出艇，因為青龍頭位於香港西面，屬於我地稱呼為西水的海域；而西水因為地利關係，冬天時香港吹的東北風較少會影響這片海域，所以只要不下雨，冬天時還是可以放心的在這邊作釣。唯一的隱憂就是這個釣場的釣況可算相當飄忽，有時充滿驚喜，但有時也會讓人失望而回；不過釣魚就是這樣的了，沒有話包生仔，包有魚的，總是充滿著未知數的；但這不就正正是釣魚的樂趣之一嗎? 咁平衡左各方面之後，再問問幾位女將，她們也沒有異議，不怕路程遙遠又有機會釣況不理想之後，我地就決定左「遠征」青龍頭了！

但係青龍頭我都無釣好耐，除了年頭同鬼仔黎過一次之外，基本有好幾年都無釣過，所以都唔係好認識呢度既艇家，咁點樣算? 有兩個選擇的，第一就是問鬼仔、搵返上次西水坐火車爆惑賀新年 https://yy08.pixnet.net/blog/post/106424041我同佢出艇的艇家；另一個更大膽的，就是我平常不時上網睇香港釣魚的視頻，而有幾個釣魚界的網紅我都有睇，咁有一次睇到其中一個出艇青龍頭，喺條視頻入面佢有叫過個艇家的名字，而我上谷歌搵又真係搵到呢個艇家個名同電話，就係咁樣，我同阿丹都話反正都試新釣點，唔爭在試埋新艇家，一於就揀呢個艇家吧。就係咁樣，我地最後決定揀左從網上視頻睇到，名叫「大妹姐」嘅艇家。呢個對我黎講真係新體驗，我真係未試過會落一隻艇係全船人都未釣過的，而我地都係果日去到碼頭打電話落艇之時，先至叫做第一次望見大妹姐的盧山真面目呢。

好了，艇家也決定好了，接下來當然就是研究釣餌呢個重要議題啦。以往呢個陣容出艇，我地都係會預備沙蝦仔及秘醃蝦仁，有時仲會醃埋些少南極蝦呢。但係今次我同阿丹講，青龍頭呢個地方，釣場大、釣點多而且各有特色，就係睇艇家會車我地去邊度釣，有些釣點就專搏撈箕魚，有些釣點則專心釣魚仔(當然偶有驚喜)，有些釣點就專釣惑魚，咁我地今次黎到，梗係想比一些唔同嘅體驗大家，所以我決定會買一些大眼仔去搏下；另外當然都會買沙蝦仔，始終唔係人人唔怕悶可以肯勾頭蝦釣足大半日都無半口魚食餌的。但係我同阿丹都有左「覺悟」嘅心，所以一於突破自我，買大眼仔作釣。咁本黎就係咁樣就算數架啦，但係呢，呢個世界有樣野叫做「整定」，就係出發前幾日呢，阿丹行開街時就係灣仔的一些雜貨鋪比佢搵到一些有唔同顏色選擇嘅花紅粉，咁鍾意嘗試新事物嘅佢呢就買左幾包唔同顏色既花紅粉，有紅啦、黃、綠，但就無佢想買既紫色，因為缺貨喎，不過已經夠了，始終蝦仁只係我地既後備「秘密武器」而已。咁佢買得蝦仁染色，就自然順便會買埋虱目魚，用其內臟再壓碎，取其汁，醃製蝦仁，成為又臭又腥又染左色、極似嘔吐物的秘醃蝦仁了！命中注定上天要阿丹整蝦仁，就注定冥冥之中蝦仁自有佢既角色同存在嘅意義了，呢個係後話了。

由於一早就已經計劃好行程及約定了艇家，所以有距離釣魚當天有頗天的日子給我們倒數；就係咁樣我同阿丹不時就會討論到當日的情況，比如話如果阿邊個中魚，咁阿邊個就會負責撈魚，阿邊個又會負責影相拍片；另外又幻想著當天會出現的魚種等等，總之就係充滿憧憬，好不興奮！

咁終於黎到釣魚嘅大日子了，嘩，之前那一晚可能我的潛意識有點太過興奮，搞到我失眠，無覺好訓，只係小睡得兩三小時，其實都真係幾大鑊。不過唔理啦，總之無唔知醒，出到去地鐵站集合，大家都相當準時，於是就一同坐地鐵出發。而唔好以為喺地鐵我地就會小休啊，我同阿丹仲要幫阿大表妹手將佢隻絞上線。事關阿大表妹上次釣完魚之後終於下定決心買了橫絞，至於魚絲則我幫她決定要了炭絲而不用布線，因為怕佢用唔慣會容易勾石，而布線則是比炭絲麻煩勾石時不能直接用手去扯斷魚絲，所以為左我同佢嘅方便，我最終為佢選擇左用炭絲。咁於是係地鐵上我同阿丹一個就負責拿著線碌，一個就負責用魚絞收線，終於把線都上好了。地鐵到站後，大家買完糧水，我地就坐小巴直達青龍頭了，在碼頭旁邊拿了事先預定好的大眼仔蝦餌之後，我地就落碼頭、打電話比大妹姐叫佢黎接我地了。

八點半落艇，唔駛八點四十分已經到達第一個釣點，不過我邊有可能咁快可以作釣呢，大妹姐落餌開始釣嘅果一刻，我先啱啱好拎哂堆架餐出黎，綁好自己用黎勾頭蝦嘅果副手繩；然後就係幫兩位表妹開始綁釣組了。我一開始只顧著綁釣組，只叫阿大表妹去把魚絞上到魚竿上並將魚絲都穿過導環，然後等我綁好天平釣組再駁上零圈就可以作釣了；但係我忽略了的是，首先今次係佢第一次接觸橫絞，其次是一路以黎都係我幫佢地綁好哂佢地只需要專心釣魚就可以了；所以佢對點樣正確上好魚絞穿好魚線是沒有全盤觀念的，而佢亦在沒有詢問我的情況下就穿好了，結果就是魚絞上反了，然後到她上好了絞、我又將釣組駁到去零圈之後，才發現，原來她也不知道要將魚絲從魚絞的出絲孔那個地方穿出來；結果當然又要剪掉釣組，重新再綁過了。應付完大表妹，當然又要幫細表妹綁釣組了。不過細表妹就上次已經釣過橫絞了，所以佢就順利的上好魚絞穿好魚絲等我的天平釣組。本來大表妹那邊已經可以開始作釣，不過佢又唔係好識用隻橫絞，同埋設定磅頂和剎制的鬆緊度，所以佢等我幫細表妹整完之後就叫我幫佢手搞搞，咁我設置好，就順便勾隻蝦落去試一試，出絲都叫順暢，無炒粉之後，就收返起比阿表妹佢自己玩了。咁我見佢地都開始釣魚了，我就準備拎我支竿出黎準備開竿，點知架餐都未拎哂出黎，已經聽到佢地叫我個名了。原來大表妹首先勾石，需要幫手。好啦，到搞掂左大表妹呢面，扯斷魚線又幫佢綁過個簡單嘅子彈鉛加賴腳單鉤勾蝦仔嘅釣組啦，埋位唔夠一兩分鐘又到細表妹求救了，不過佢因為係布線，所以我唯有用個手碌幫佢繞幾圈布線借力再扯斷佢；所以咪話如果連大表妹副繩都係布線咁我就真係有排煩了。

其實，喺我幫緊兩位表妹既同時，我都聽到阿丹女友阿煎都有向阿丹求救，因為佢都勾石呢，不過我都已經忙到不可開交，所以暫時無暇理會他們倆口子了。由於出發前我都同兩位表妹講過話佢地釣左魚都算好一陣子啦，但係仲係唔識綁勾同埋綁鉛，希望佢地好好學習及記住，好等我同佢地釣魚時唔駛全天候照顧佢地，所以細表妹斷左線之後都有叫我再教佢綁多次鉤。而又喺我教緊佢綁鉤既時候，大表妹又唔知點解隻絞又少少炒粉了。咁怱怱向細表妹示範完如何綁鉤並幫佢綁好之後，我就著手處理大表妹隻絞炒左粉既魚絞了。可能呢個釣點比較多石啦，我仲解緊魚絲既時候，好似阿丹都勾石了；咁呢個釣點石位係比較多，但食餌又唔算密，咁大妹姐見全船人都先後勾過石，可能覺得我地呢班人程度未夠啦，於是佢就叫我地繞繩，車過馬灣果面北灣近牛爛咀果面試釣。佢仲講左句呢面少些石，沙石底應該會易釣一點了；而細表妹一來聽不太清楚，二來其實佢都唔係好識分這些石口沙石地的排口分別，於是佢就問我話呢度係咪即係沙地無石咁呀? 問者就無心，就係大妹姐聽到就以為阿細表妹比說話佢聽，話佢有石位排口唔車，車黎這些少碎石底的釣點作釣，於是佢就講左句話，石位又話勾石，沙地又話沙地，真係難搞喇。咁我梗係盡量都唔想艇家唔高興啦，始終雖然我地係客，但係佢先係對呢頭最熟悉嘅果位，佢開心，我地就容易中魚，容易開心嘛。於是我就是但搵些話題就去同阿大妹姐吹下水，等佢分心。本身我就想勾頭蝦釣魚先會一早唔搞魚竿就去綁副手繩既，但係既然呢個釣點比較少石口位，咁魚仔機會較多，咁我就決定都係用魚竿釣陣魚仔先啦，始終班女將們係需要一點時間黎熟悉及適應一下，去找到釣魚的感覺，如果唔係就算帶佢地去返較多石的釣點亦都只會繼續不斷勾石的。

喺我終於開好魚竿落得餌釣魚時，阿煎呢個時候就另過黎同我講話嘩你終於開好竿可以釣魚嗱。望一望手機，差兩分鐘十點，我諗都真係破左我最遲開始落餌釣魚時間既紀錄了。不過無辦法啦，女將們遇到困難，唔通坐視不管咩。只不過今次佢地遇到既困難比平常多一點嗜；而且呢個釣場亦算係比之前佢地釣開阿B記既釣場算係難度提升了一點，勾石較多亦無可厚非的。唯一我要抱怨一點就係佢地仍然都係未熟悉點樣綁鉛同綁鉤，呢個對都釣魚釣左好一兩年既佢地黎講真係有點說不過去呢。

由於一路都太忙既關係，所以都無理到邊個開左齋、起左乜野魚咁啦，不過印象中唔計大妹姐呢，我地戰隊今日開齋既就應該係阿煎喺呢個較少石的釣點起條石狗仔為是日打響頭炮的。跟住其實其他人陸續都有魚訊及起魚，不過魚仔太細，我地都即釣即放。可能係咁，大妹姐又叫繞繩，我地再度轉陣、往燈籠洲果面作釣。係度都見到唔少艇仔同埋散團嘅大船係附近作釣，不過正如大妹姐話齋，呢幾日都比較靜局，唔似上星期每日都仲有幾口撈箕魚中下咁，所以魚訊唔多，亦都唔見周圍的船有點樣起魚。不過呢度就較為淺水，比較易釣，雖然比剛才的位置多了點碎石，但隨住大家熟習了一點，找到多少釣魚的感覺，頻頻勾石的情況不再復見，反而大家多多了一些魚仔釣到，大細表妹都相繼開齋了，而我亦都係度執返幾條石狗仔同釘仔。

雖然話少左勾石情況，但唔等如無既；咁今次又到阿煎了。咁阿丹其實就想訓練一下阿煎、等佢有所提升，所以佢就未有郁手幫阿煎解石，反而是從旁指導：首先伸直支竿，竿同魚絲平行了，等魚竿唔會受力，然後鎖緊磅頂，跟住向後扯，利用杯身的力量將魚線扯甩。喺阿丹指導既其間，我都叫兩位表妹好好的觀察及學習，因為呢個方法比用手套和手碌解石較為方便、快捷，不過如果唔掌握得到竅門，又確實係會害怕整親支竿既。不過某些人總對某些事物係較有天份既，因為轉頭無耐就到阿大表妹勾石啦，佢就想試一下剛才所講既解線技巧，不過試左幾次都唔成功；咁阿細表妹見到有「練習」既機會，就叫我幫手拎住佢支竿，然後佢就嘗試一下；吖，又真係比佢好快就搞得甩喎，然之後佢仲同我講話，喂阿表哥，點解以前你無教我地呢個方法呢，方便得黎又快趣喎? 咁我都係果句啦，我點知你地邊樣叻邊樣唔叻? 而且呢個技巧我其實都唔係掌握得太好，我都怕會整傷我支竿所以我都好少用，咁我梗係用返我平時比較熟手同有信心既技巧去幫你地啦，係咪先。以前次次都係我落手去做，我梗係用我最快最熟手既方法啦，不過而家開始想你地有所進步，所以開始減少落手去幫，而盡量希望你地會自己透過實踐、有所體驗同提升，所以都會介紹埋其他唔同、但可行既方法呢。

可能見燈籠洲向汲水門一帶都係得一些魚仔的魚訊，於是大妹姐又再轉陣，車到青馬橋對開、在馬灣航道邊邊作釣。其實一般黎講呢，能夠出到航道中間，又或者好似馬友旺季時、很多艇聚集到青馬橋底咁樣釣就對釣況比較有利，不過由於海事處的巡邏艇如常在附近監視和巡邏，所以所有艇都基本上只在航道邊等機會。咁我同阿丹講這裡一帶往往有無限可能性，加上我地本身出發前都預左今日會揸大眼仔，，而且魚仔又唔密口都係要等，咁反正都係等果一口食餌，不如搏一陣大眼仔，睇下有咩料到咁啦。於是我撈左幾隻大限仔比佢，然後我亦都放低我支魚竿，攞番今朝一早綁好左但未用過既手繩出黎，揀隻中眼仔就飛落去，希望有魚會黎八下都好。

出發前已經講話，以往勾沙蝦仔做餌，有魚食埋黎，多數係魚仔，但如有大魚食埋黎，則是驚喜；但係用得大眼仔，基本上食得埋黎，條魚都差唔多要用撈箕架啦。所以少左魚仔搞餌，再加上其實本身魚訊都唔密，而表妹地佢地又相對氏穩定無乜問題要我幫手，所以我呢個時候先叫做開始清閒，可以拎部電話出黎播下歌仔，播下黃子華棟督笑咁。阿煎見我竿都放低埋，直頭以為我中場休息，實則我就係隻手揸住副絲，到地抽番起之後就由得隻蝦喺下面游，然後自己就食下早餐，飲下野。無錯，我係到而家先叫做得閒食野，哈哈。食食下野，見到阿丹竟然有動作，心想難道有驚喜? 但係睇佢支竿的拉力又唔似中到好野喎，結果收到上黎，竟然係一條石狗！佢即時話有無搞錯，我勾隻大眼仔落去，點解會中返條同隻蝦差唔多大既石狗上黎架？我都覺得好神奇，亦都唔知佢點可以做到，哈哈。

咁鍾意不斷作出嘗試既阿丹，呢個時候又好奇心起了，於是佢就拎佢包秘製蝦仁出黎話想試下用喇。咁佢今日就準備左兩包蝦仁既：一包就係染左黃色、好似食完咖哩嘅嘔吐物咁樣；另一包就係染左紅色，後尾比阿大妹姐話似豬紅咁既紅蝦仁。阿丹先揀左黃色果包黎試，不過釣左成寨唔好話舊餌仲原好無缺，直頭佢話魚仔都無埋黎搞過，所以第二寨一開始佢就轉左用另外果隻豬紅蝦仁了。點解我咁清楚? 其實我本身就無乜理佢用緊乜既，但係就係喺呢一寨作釣時，忽然我見佢一抽魚，然後支竿就已經有拉力的彎起來了，咁我即刻拎起手機開左拍攝功能、交左比阿表妹叫佢影之後我就走去拎撈箕、侍候在旁等待撈魚了。本上黎都估緊會唔會係牙點呀、紅魚呀、細鱗呀等等出發之前同阿丹幻想過今日會中魚既魚種，點知條魚一見光，竟然係石玤！我撈箕都未對準條魚，阿丹就繼續不斷收魚，我當然即時叫佢減慢收魚速度啦，始終撈魚就係唔想比條魚出水時感到驚慌不斷擺動而令到有機會嘴部的牙齒界斷魚絲又或者勾得唔實爆嘴而甩魚嘛，所以等佢控到條魚埋黎我撈箕可及的地方我就即時插撈箕落水將魚「一網成擒」！就係咁樣，斤半肥仔石玤順利登艇！咁我就問佢係咪用大眼仔餌啦，佢就答我話係用紅色蝦仁中既，表妹地聽到都笑笑口話咁唔駛買大眼仔做餌啦，條魚連生蝦都唔食係要食蝦仁呢；咁所以各位明白點解我而家咁清楚阿丹佢係用紅蝦仁中魚啦? 咪就係中完魚大家都不停係度討論呢個話題，而阿丹甚至幫阿煎換左釣組，由釣賴腳勾單門沙蝦仔，變成平時釣B記用的天平釣組，上下兩門勾都換上豬紅蝦仁作釣。咁中到魚就當然係皇道，不過如果釣兩門鉤，通常我就會上下兩門盡量用不同釣餌，多數是上蝦仁，下生蝦或紅虫，務必讓魚兒有所選擇，食得安心，我亦中魚有得開心。

望下個鐘，十一點七，終於有點成績。而見到阿丹中完魚，大家既鬥志即時被燃起，畢竟釣魚都係講士氣，係需要一點戰績黎鼓舞大家既呢，哈哈。咁我唔理其他人用咩餌啦，我就繼續揸中眼仔作釣。點解唔用大眼仔而要較細隻的中眼仔? 因為我覺得如果勾左中眼仔，就算斤頭魚甚至磅頭魚都可以食埋黎，咁如果我目標魚都係牙點，細鱗、紅魚等，中眼仔會較有利吧。不過呢，今次有動作既並唔係我，而係大妹姐。其實大眼姐都無乜特別大動作既，不過我都見佢就左幾手魚，正想拎手機出黎影既時候，佢可能怕羞，即刻加快速度收魚，然後自己用個細撈箕一手包辦，到上水我先見到係斤半細鱗一條！我問佢收得咁輕鬆既，原來佢雖然用沙蝦仔做餌，但係都用到成10號絲搭8號賴腳，唔怪得咁輕鬆就可以收伏架火車仔了。嘩，望下個鐘，十一點十。十二點都未夠，喺十五分鐘內突然有左兩條撈箕魚，即時壓力減低，士氣再度提升。而阿細表妹亦都向由今早不時發訊息詢問釣況既阿媽們報告，並告知我阿媽今晚有魚返歸，事關我地由約好釣魚日子的那一天已經告知阿媽會去釣魚，而阿媽又例牌的會準備好飯局，及等我們帶魚穫返去加餱，好等大家有個完滿的一天。

咁話就話有條上得碟既斤頭魚嗜，但係時間尚早，唔通咁早就揸流灘咩? 而且我都尚未中魚，梗係要繼續努力啦，雖然釣魚唔一定要祈求魚穫，但係心態豁達得黎卻一定要積極，咁樣先至會有鬥志架嘛，呢個不也是釣魚的樂趣嗎？不過有人士氣旺盛，有人則睡意來襲；阿煎就話知你地中魚又好咩都好，總之睡魔一來，佢就放低魚竿，拉好冰箱塾腳，倒頭就睡起來。大妹姐見佢就咁樣比太陽曬住都照訓，唔忍心佢曬燶，於是拿出縮骨遮叫我遞過佢比佢，等佢可以遮住太陽黎訓，認真貼心。

果邊廂有人訓得好開心，呢邊廂只見大妹姐又有所動作了。而且今次見到大妹姐就魚既動作更大，問佢駛唔駛幫手撈魚佢仲答話好呀，叫我幫佢撈。諗住正呀，大妹姐襯住流水起之際可以再下一城喇，同時亦拿拿臨拎埋部手機出黎拍片，補返剛才拍唔到佢上細鱗之遺憾。正係度邊拍片邊猜緊會係乜魚既時候，獵人見光了。但係，佢並唔係一條魚既形狀，因為佢係一條門鱔！即時放低撈箕、放下手機，由得大妹姐自己搞掂。門鱔望上去唔大，大約斤零，大妹姐將佢收上黎之後立即放入生倉，但係條門鱔真係好惡，就算係生倉入面都係保持其兇猛既模樣，細表妹打開生倉蓋望左兩眼都即刻把蓋關上，怕條門鱔可以逃出來並且攻擊佢喎。

咁我地就一路跟住流水咁樣釣，而呢個時候大妹姐見到海事處隻巡邏艇就未有出動，咁佢就由航道邊邊再往航道推進多一點，再繼續跟住個流水咁釣啦。我都係繼續勾隻中眼仔落去等運到啦。等下等下，忽然間我就感覺到條魚絲扯行左，有重量，但係明明就無食餌既感覺，我亦都當然無任何抽魚既動作啦。但係唔理啦，可能係我太過遲鈍有魚食餌食到入哂都唔知呢，總之而家就感覺到有魚中左係下面游緊啦。咁佢地見我有動作喺度收魚，又知我係用大眼仔做餌，梗係問我駛唔駛幫手用撈箕啦；但係我又唔覺得條魚走得好犀利會係大魚喎，事關我魚都唔駛就，每次都係一手一手咁收，於是咪同佢地講話唔駛用撈箕啦，條魚得果幾兩魚，附近咁多艇睇住，無謂搞笑啦，叫佢地安心等我上魚睇下係乜東東就算啦。雖然都叫段段有力，但一路收都好輕鬆；不過喺收到差唔多見光其實已經感覺到條魚掙扎嘅力度有所提升，之前咁輕鬆係可能佢跟水上，所以我基本上都無同佢真正搏鬥過而係帶住佢升水；而又可能心諗住又唔係咩大魚，根本就無個念頭去估係乜野魚，所以到條魚見光時我一睇，咩料長身白身的，唔通係鯊魚? 但唔好理佢係咩魚住，因為呢個時候我先發覺條魚原來唔止幾兩，而且佢仲好激烈咁樣掙扎！但係我又叫左佢地唔駛撈魚所以無人準備好撈箕在旁，咁點算好? 千鈞一髮、電光火石之間，個腦已經諗唔到咁多解決方法，所諗到既就只有將條魚就咁彈．上．嚟！即時將最後嘅魚絲收起並運勁將魚抽離水面，可幸個勢道尚算正確，條魚離開水面之後都係順住個勢往艇內方向降落，就算中途擦上了艇邊用以支撐頂蓬的柱架，魚還是順利落入艇內！總算有驚無險！呢個時候望真一下條魚同埋有思考嘅空間，先至發覺原來係我從來都未釣過嘅夢幻魚–馬友！夢幻魚顧名思義就係又好食又好玩又可遇不可求的魚，所以能夠釣到佢，真係事前諗都無諗過，亦都不在我同阿丹幻想中魚之行列，絕對係喜出望外！回過神來先至識講笑話點解頭先無人幫我撈魚架? 然後細表妹即時就話係我當初好輕佻驕傲咁話條魚得幾兩，無需大驚小怪，大材小用要用撈箕。呢個時候再望下條魚，幾兩魚? 兩斤幾兩就差唔多！哈哈哈！再望真小小條魚同埋諗住解魚鉤，先至發覺個魚鉤根本係無勾到條魚個嘴，而係勾住左佢嘅下巴！唔怪之得我剛才明明無感覺到條魚食餌就只有感覺到突然一下子有野衝左埋黎然後我條魚絲就可以走了；咁都好，證明我唔係真係釣技退化得太利害，而且，今次終於到我行魚運了！可能係關乎我今日特登著住印有老表愛犬的汗衣，所以佢保佑我，賜予呢條夢幻魚比我。成件事真係好夢幻好唔真實，亦都可能係因為我太耐無中過撈箕魚啦，以往呢一兩年都只係幫人撈魚，又或者係佢地中左魚需要我幫手上魚而交比我控魚收魚；但係講到由我自己一手包辦由中魚到上魚，真係好耐無試過了，個感覺差唔多都開始遺忘了。但係咩都唔緊要啦而家，經過剛才果一刻，所有感覺即時返哂嚟了！

望下鐘，十二點四十分，今鋪真係半晝多少少已經一定夠魚食了今晚。即時叫細表妹幫手影返兩張人魚合照，順便再發給屋企報告今晚的魚穫有著落了。然後一邊回味住中魚嘅片段和感覺，一邊繼續勾多隻中眼仔落去希望趁住流水啱哂、一不離二，執多一條半條撈箕魚咁話。咁我中完條咁夢幻嘅魚之後，其他隊友當堂立即醒神起來，包括剛剛我中魚時還在和周公捉棋的阿煎。不過撈箕魚就暫時未再見有了，但係細表妹倒是連中沙鑽、烏絲、同惑仔。果然釣魚有時係需要士氣帶動的，哈哈。

勾得大眼仔就注定繼續只有靜靜地等，呢段時候都係睇住其他隊友中下仔咁，釣下釣下，忽然見到阿煎有動作喎。驟眼睇以為佢又勾石了，因為佢自己都係咁同阿丹講話又勾石，要幫手；但係佢收緊磅頂繼續收線呢，又比佢慢慢咁收到喎，而且條線仲會郁添，睇黎唔似係勾石喎… 咁可能佢習慣左怕勾石夾硬扯會頂壞之竿啦，所以佢收線收得都幾慢下，不過我望落去支竿仍然都係有弧度，即係有相對重量嘅。咁我同阿丹見到咁樣，我咪叫阿丹撈箕侍候囉，我就拎部手機出黎拍，準備影低上魚一刻。點知上多一陣，就聽到阿煎講話「咦，點解好似無左重量咁既？」，再望望佢竿頭的弧度也消失了，證明重量亦都消失了，即意味著「魚」甩了。咁我地嘅結論猜測就係佢收得太慢，拉扯力唔能夠長時保持，就比條魚有喘息嘅機會同趁虛跑掉了；咁當然，一日唔見影一日都唔百份百肯定係魚或其他生物，不過以經驗黎睇就係佢中魚但無乜點抽魚，所以已經無打穿魚嘴亦勾唔實，而再加上收得慢，所以最後條魚趁有虛位時就走掉這個情境最為合理了。點都好啦，上唔到黎既魚就係最大最好嘅，唯有汲取教訓再檢討，轉化為經驗，咁以後就會知道點做了。

釣下釣下我地已經由青衣船廠對開果面嘅馬灣航道慢慢一寨一寨咁釣返到過左橋底了，不過就仍然無乜好野中到，咁大妹姐就叫繞繩走位，車去嘉頓對開一帶再碰運氣。咁講返啦，其實當我中馬友既時候已經講話青龍頭除左馬友，仲有得產法國馬友，即係我地叫開爛肉梳嘅魚；咁爛肉梳好玩就好玩，但就真係好玩唔好食，所以一般就算中到，都懶得用撈箕撈佢。咁我地呢車到黎呢度，不遠處就見到有另一隻釣艇，有個釣友就拎住撈箕係度侍候，睇佢隔離果位釣友上魚，不過一路收魚到差唔多上水就見到條魚跳水，即時肯定係爛肉梳了。我就見得多，當年亦玩唔少，但係同船其他隊友都未見過，所以睇得津津有味，尤其見到條魚明明呢一刻係艇既左邊跳出水而吸引了撈箕侍候的釣友的注意力，但轉眼間條魚又在艇右方跳出水，而那位釣友卻仍然係注視著左面，睇到我地都想話比佢知其實條魚已經跳左去另一面了；又其實我亦覺得中魚的果位釣友也從知道中的魚是法國馬友之後就已經放棄左拎魚之心而改變主意想盡情享受中魚之樂，所以一路都由得條魚起勢咁飛，起勢咁掙扎，反而享受了中魚既感覺就已經足夠，拎唔拎到條魚本身已經唔再重要了，哈哈。咁大妹姐當然都有睇埋一份啦，咁除左法馬同爛肉梳既稱呼之外，其實條魚仲有個名叫「哽死貓」，一聽個名就知係講條魚難食同多骨、餵貓都嫌浪費咁啦；咁佢當時見到條魚飛出水又聽到我話係法國馬友時就答我話「係呀，哽死貓黎」。咁呢個名對隊友們黎講當然亦都係新奇事物啦，咁阿丹一聽到個咁有趣既名稱，就問大妹姐條魚叫哽死貓，比貓食既話係咪真係會哽死食貓咁，聽完佢咁問我同細表妹已經笑左出黎；點知大妹姐又真係答佢話「鬼知咩，我就未見過有貓哽死，總之就餵貓貓都唔理咁啦」，即刻笑到我地成艇人好歡樂呢。呢位老人家又真係幾可愛喎真係。

笑下笑下，忽然見到阿煎又有動作，只見佢就不停咁收線，再睇下佢支竿既弧度今次就唔係咁大，不過又唔會係一般魚仔既大細咁，我於是即時就走去拎部手機去拍片架啦；不過真係算係相對輕鬆，亦都加上可能汲取左經驗唔敢怠慢，所以阿煎今次收線收得好快，絕對展示出唔想比條魚有任何逃走既空間既決心。所以我手機都啱啱按下拍攝唔夠兩秒，條魚已經上左水，正確係離開埋水面添！原來係一條小細鱗，可能佢好興奮，急住同阿丹報告，所以就咁由得條魚係空中搖動；我唔想有任何「不愉快後續發生」即係條魚甩返落海，於是即時叫阿煎快快趣將條魚收左入艇內空間先再做其他動作。不過明既，走失左條魚咁失落而家比佢轉頭中返個安慰獎，係會激動同興奮既！咁都好，喺阿丹既關注底下挨住緊張同壓力咁耐，終於都叫做有返點成績，吐氣揚眉一下。

釣多一陣果一帶流水開始急，加上又唔係多魚訊，大妹姐又叫繞繩走位，話過返馬灣果面釣。咁其實就剛剛流急都幾難釣，放放下絲又可能已經勾左石，咁大表妹喺解勾時就魚絲炒粉了，向我求救；反正我都轉左手繩揸大眼仔諗住搏多條撈箕魚，索性叫佢用我果支竿算數，返屋企先慢慢幫佢解決炒粉既魚絲，同再研究幫佢換布線定點。啊，佢一用我支竿，又比佢係新釣點好快中到魚，佢話我支竿更輕更敏感喎；咁我唔知啦，我就未用過佢支竿，不過以負鉛黎計其實大家應該相約，不過我支竿個調子就更加軟身同「淋」，可能係咁所以佢話比佢果支更好手感喎。咁咪好囉，啱感覺就最好啦，一於加把勁釣多幾條喇。咁其實呢個釣點我都認得既，就係馬灣淡水灣、石仔灣呢頭魚排對開一帶，就係上次我同鬼仔黎釣魚最後一小時爆釣雞旦惑既果頭啦。可能大妹姐都想帶我地過黎釣返堆惑仔爽下先返屋企掛。

咁其實一開始都無刻意釣惑既，又可能流水未係時候，所以剛剛過到黎時都仲未見目標魚出現；咁我見反正都仲唔係密口，梗係繼續同阿丹一樣勾頭蝦搏好野啦。釣下釣下，大表妹上左條魚仔上黎，同池魚仔都幾似，但我就唔識叫乜名，問大妹姐之下就得知原來係橫澤。咁充滿好奇心同諗頭既阿丹呢個時候就話想試下勾條橫澤黎做餌，咁佢就問大妹姐：「大妹姐，我可唔可以勾條魚仔黎做餌呀」大妹姐：『可以』丹：「咁那些大魚會唔會食餌架？」姐：『我鬼知咩，我又唔係魚我點識答呀，乜你既問題咁難答都有架』真係聽完以上對答之後全船人又再爆笑，呢兩位朋友仔都真係相當之可愛。

咁橫澤同大眼仔都未有魚理會啦，不過逐漸就開始見到大妹姐有些雞旦惑中到了，而且中魚速度開始頻密起來，大妹姐就講話呢一帶既惑魚係食退潮既流水既，而家起流就啱釣啦。跟手細表妹都有上返一條半條，然後大表妹都有了，佢仲邊中邊話我支竿感覺好，上惑就非常有手感添。我見到魚訊密左，尤其大妹姐基本上落去唔會超過兩分鐘就會有動作，咁我見到咁既情況，即時由勾頭蝦改為平時用開既上下兩門釣組，然後繼續上蝦仁下蝦仔。換完釣組落到去都唔夠半分鐘已經有食餌，未上到黎都知已經係古惑仔，係等見樣就肯定係雞旦惑咁囉。再睇一睇，係食上面勾，即係中意食蝦仁，即時食生倉撈多幾隻已經瓜左既大眼仔上黎，剪開，剝殼、上勾，又飛落去繼續釣。落到去又係差唔多唔駛半分鐘就有魚搶餌，又中。跟住用返同一舊餌落去、又中。總之連續用左同一舊餌接連上左成五條惑仔舊餌先至消弭掉。至於下門鉤隻蝦仔則係完好無缺。於是我就索性兩門鉤都用哂大眼仔蝦仁，不過都係上門鉤中魚。得出既結論就係呢堆惑仔既覓食層其實唔係食到最底，反而係落到底拉返起一尺至兩尺。所以難怪我同大妹姐上魚既速度會比表妹們快得多。呢個應該唔關釣魚技術事，因為惑仔其實都係有食餌你抽都基本幾下一定有一下中的；重點應該就係我同大妹姐既上門鉤都能剛好去到呢箕雞旦惑既覓食層，所以一落就接餌、一落就接餌。我同大妹姐上多幾條魚之後就即時提醒其他隊友。咁以單鉤作釣既表妹們到底後隨即收起多一點，果然中魚既頻密度即時有所提升，只見大表妹呢段時候即時只有專心的默默抽魚、中魚、起魚，然後又再抽魚、中魚，同埋起魚。但係點解講咁耐都無提到另外兩位隊友既名字既呢? 首先，阿丹見到中既魚量其實都已經算接受了，所以佢只係一心想求多條撈箕魚，所以佢係一路繼續用緊大眼仔做餌既，因此雞旦惑係同佢緣慳一面的。咁但係阿煎呢？明明已經用緊兩門鉤用緊阿丹既秘醃蝦仁啦喎？對唔住，堆雞旦惑真係對呢堆似豬紅既嘔吐物唔多感興趣；最搞笑係大妹姐見人人有惑中，係得阿煎用豬紅蝦仁就無魚中之後講話「你再繼續用呢舊咁鬼核突既野釣魚，釣到完場都唔駛旨意有魚中」，可見豬紅蝦仁係幾咁唔得大妹姐關心呢，但係明明之前條石玤係用豬紅蝦仁嚟中架嘛，哈哈。咁我同表妹就梗係笑爆嘴啦，但係阿煎就覺得唔甘心，誓要中返一條半條黎證明其實舊魚餌都唔係咁唔討喜啫。不過其實大妹姐講得無錯既，其實如果釣兩門鉤，正常都會勾兩種魚餌，除非你已經證實到果一種魚餌係非常得食，否則真係應該考慮轉一轉換。釣魚既野好多時真係唔到你鬥氣的，再加上以我觀察其實阿丹幫阿煎勾既蝦仁魚餌實在太大粒，所以比較難去吞食；要知道其實惑魚類基本係唔會試餌，只要佢地一見到魚餌又肯開口就會即時吞咬，所以其實魚餌啱啱好係佢地既吞食大小，再剛剛包住隻鉤就最易釣到佢地了；而最後我諗都係阿煎釣既泳層仍然係去到最底，或者佢真係太緊張，所以佢無吸收到我地既溫馨提示小貼士。不過就係我地其他人起起落落魚線之際，皇天不負有心人，最終都比佢中到一條雞旦惑了！足以證明到其實呢款魚餌都係有惑仔肯食的。不過我都係想表達出，釣魚其實應該順住個勢，尤其跟住艇佬一般都無壞，比如釣組，賴腳長度，鉛既重量，以及釣餌，最好都盡量跟隨，減少標奇立異，除非你係旨在做試驗或者非常有信心又或者對該釣點一帶非常熟識等等，咁就可以按自己既經驗來作決定。要不然，一般新手的話，我建議則是「隨波逐流」比「堅持己見」會稍為優勝。始終艇家就日日釣，而且仲要係呢一帶釣魚，對釣點既環境同魚種都會有相當既認識，信佢既經驗絕對就係艇家值釣既地方呢。

點都好，釣惑都係講流水既，所以喺呢一個鐘入面我地黎左個小爆釣，總之唔計堅持用大眼仔既阿丹之外，人人都有魚中啦；不過流水最啱既時候真係一落去就咬一落去就咬，而且比較大條，釣到後段時間雖然都係枕住有魚食餌，但魚既整體大小已經有所下降，就係咁樣一直釣到五點，魚訊開始減小起來，亦都夠鐘收工了，所以大妹姐亦都宣佈我地是日既青馬之旅已經黎到尾聲了。大家收繩之後大妹姐就車艇返去青龍頭碼頭果面對開，然後就係撈魚時間。由於寄惑仔眾多，而古惑仔之名既由來就係因為佢地會不時發出呱呱呱之聲，所以其實個生倉一路都呱呱之聲不絕於耳，到撈魚時揭開生倉蓋之後聲音更加係黎到頂點。撈完魚後，大家執好野，同大妹姐道別之後，我地今日既釣魚團首次遠征青龍頭終於落幕了。大家今日都釣得很開心，感覺上魚種比較豐富，而且青龍頭一如我開首所講，絕對係一個夢幻釣場，雖然有時都會有打龜既時候，但係絕對係充滿無限驚喜既釣場。而今日幸運獲得派彩既就有我同阿丹；希望下一次其餘既隊友都可以中下撈箕魚，感受一下夢幻釣場既魅力吧。

落艇前梗係要嚟返個誓師大合照