新年再探櫃底做魚僮

日期: 01/02/2021
農曆: 十一月十九
地點: 櫃底
艇家: 阿鴻自駕
釣友: 阿鴻、阿勝、華仔、YY
天氣: 天晴、東風三、四級
水流: 慢流、水質不俗
釣穫: 芝麻斑(兩斤x 1 )、烏頭x1 (兩斤半x 1)、青鱸x1(斤半x1)、紅魚(斤裝x 1 )、包公細鱗(磅頭x 1 )，埋單8斤

是咁的，因為上星期初探櫃底撞爆石 https://yy08.pixnet.net/blog/post/106451761 的爆釣，所以大家都好想再度出發、希望再次重溫好夢。於是相約呢個星期週末的一天再入櫃底尋寶，而我上星期爆釣完之後也向朋友仔分享了釣穫照，華仔睇了之後甚感興趣，所以今個星期一於叫埋佢黎，一於睇下佢會唔會好似我上星期咁樣因為係第一次黎而可以得到新手之運加持黎個個人表演。

今次我沒像上次般大頭蝦唔知醒，所以八時半準時同華仔會合好之後再到碼頭和阿鴻地會合然後直奔櫃底。黎之前阿鴻同我講話今日襯水乾，可以入去八號碼頭果面釣，咁既然有機會當然就去碰碰運氣啦，所以我地就先去八號碼頭睇下會唔會有好野撞到，諗住如果真係無的話先再返主場也無問題。去到釣點，大家即刻落餌作釣，本身用竿嘅華仔因為放左隻絞又未買得切合心水嘅新絞唯有用手繩作釣，原來佢今日係第一次用手繩蝦頭勾作釣，咁就啱哂啦，初探櫃底再加企頭新手，應該會有運仔行。我同阿鴻都講話我上星期第一次入黎都行哂運執到好野，今日輪到佢，應該點都要釣返一兩條魚，斷返一條半條先至有交代，哈哈。

果然，落餌都唔夠五分鐘佢就有食餌，不過可能係立魚，鍾意由尾食隻蝦，而又唔夠大口，所以又係食剩個蝦頭唔到釣，不過已經係好開始，起碼咁快已經有口食餌，證明呢面櫃底都係有魚存在的。諗住咁快有食餌，應該好快有魚上，不過食完果口餌之後大家都無再食餌，於是唯有繞繩再車前一兩百米去第個位試下。不過呢面始終就唔係主場，所以阿鴻信心都唔算好強，但係佢都仍然係非常樂觀，深信會有魚食餌。我就比較隨意，可能因為上星期爆釣左，所以覺得今日應該都係會係輪到第二位朋友仔會行運，不過我都係一樣保持著正面嘅心態，希望有人可以快點起到魚就已經非常好了。

雖然間中都有食餌，但係大家都好似未有一口真正似樣嘅，都只係幾口唔到釣的食餌，所以都係無辦法起手，所以只能夠繼續耐心等待。等下等下，又係非常正面嘅阿鴻率先叫話有魚食餌，望下佢支竿，吸下吸下咁，然後佢揸緊支竿遞起少少跟住條魚忍唔住終於一野索落去，佢一逗跟住中魚，見佢頂左兩手就已經無乜還擊之力在佢掌控之內，佢都幾乎好肯定咁話又係青鱸，再加上佢用成八號腳，所以都好輕鬆，一下一下就收到條魚見光，然後華仔幫佢輕輕一兜，斤半青鱸就咁樣上水了。輕鬆無難度，是日開齋魚係大約十點就已經搵到了，都算係有個好開始。大家見係青鱸，都紛紛精神起來，希望下面又有幾有幾條可以執到，不過就真係得一條，可能係今日嘅蝦唔夠大，所以鱸魚無乜興趣吧。之後各人有一兩口食落黎既都係唔到釣嘅食餌，我都係感覺到輕輕一咬然後拉一下跟住無得起手但拎返上黎已經得返個蝦頭了。如是者大半個鐘又過去了，都再沒有青鱸嘅蹤影了。但係呢個時候阿鴻又話有魚輕輕食餌喎，但係就硬係無重餌果下，然之後佢搵了一下食餌的時候一抽，吖，又比佢抽中左喎，跟住就見支竿彎左，然後就展演出美麗的弧度了，而個磅頂都有輕微出線嘅聲音，都頗為動聽；不過佢信心滿滿，再加上呢排都累積左唔少經驗，所以佢都悠然自得，一副食硬你嘅模樣，氣定神閒，慢慢將條魚收上黎。嘩，終於條魚慢慢見光了，我地一開始以為係馬友定係百花鱸啦，點知一睇，嘩咩料係烏頭！要知道烏頭會食大眼仔真係我就聞所未聞啦，真係要行運先至可以勾頭蝦都有烏頭食埋黎啦。今次輪到我幫阿鴻撈魚了，輕輕鬆鬆將條魚兜左上黎，然後我就將個撈箕交左比阿鴻自行處理了。烏頭真係吸引力大減，不過好好玩又係真嘅；而阿鴻解勾嘅時候一睇就見到原來隻勾係勾中左條烏頭隻眼而唔係中嘴，唔怪得會係大眼仔都中到烏頭啦。不過都應該係條烏頭見到隻大眼仔都埋去搞下佢，結果比阿鴻一抽竿就勾中左佢隻眼，所以都真係無辜得黎又幾抵死咁。點都好，行運的是阿鴻，條烏頭就注定新年行死運。大家都對阿鴻可以大眼仔中烏頭嘖嘖稱奇，然後都係唯有繼續釣魚，不過都係無乜食餌，我地就設定左時間十二點都再無魚食餌或者中魚就繞繩返主場，等開始轉流嘅時間就剛剛好，希望食啱流水魚兒都開口就啱哂了。

釣到差唔多十二點都無食餌，咁我地唯有繞繩，然後離開八號櫃，轉陣向主場九號櫃底駛去。喺車緊艇過去途中我地就同阿華仔講話咁樣唔得架，你今日第一次黎，點都要中返條魚，當係供會咁樣架，我就上星期已經中左大連尖，享受左「櫃底會」嘅入會優惠，阿勝就再上星期中左大紅魚；所以今日華仔你點都要起返條魚先得架，唔係以後點會仲肯黎呢；咁佢都係話唯有盡力啦，始終今日釣況一般，而且大眼仔又唔係好夠大，所以感覺大魚都唔多開口咁；有親食餌都係唔到釣嘅立魚食埋黎，平時會大口食埋黎既就只得今朝一條青鱸了。過到黎九號，我地先去轉角位嘅牛廣仔位試釣，因為我地就從果面附近入黎櫃底，所以就先掃呢面，等下再返去上次爆釣連尖、芝麻斑既位置睇下會唔會有好野可以執返一條半條。釣下釣下，食餌都仲未有，但係望去遠處呢，就見到有幾隻艇都入左黎櫃底，其中一隻就係釣界都頗有名氣、出名基本只帶女士上艇去釣魚嘅「大師自駕艇」、同埋另一隻專做散團嘅蔡仔艇。不過由於仲係隔得幾遠，所以我地都仲未有同其他艇交流而係繼續搵下魚咁，不過就暫時都仍然未有魚搵到。

首先同我地相遇嘅係大師艇，阿鴻都識阿大師所以就交流左幾句，大師第一句就問阿鴻今日斷左幾多口，真係搞笑。而阿大師就係釣蝦仔嘅，所以都係入黎搵下石狗，不過佢都話今日可能水凍，所以魚都唔太開口，就算係釣魚仔，佢都比平日釣少左唔少。佢地就釣入一條「跑道」而我地就釣最外果條「跑道」，所以傾左兩句我地就繼續各自在自己跑道繼續「搵食」了。而係蔡仔就係同我地一樣都係釣最外條跑道嘅，所以釣下釣下我地都終於相遇上了。就咁望過去見到佢地隻艇坐足六個客，都挺迫硤，有一個客直頭要坐艇頭，真係令人嘆為觀止。唔好話坐都已經迫啦，講真，平時就算唔駛坐到咁迫，釣都已經麻煩啦，一個唔覺意又會繞絲疊絲，而家見佢地坐到咁樣真係覺得個艇家真係麻麻，為左賺多一個半個客錢，就算令到班客仔釣到好勉強都唔理，所以要睇一個艇家係點，有時真係唔駛上艇都可以睇得到一點端倪。而班客仔唔知係咪無魚釣到定點啦，對我地呢面隻艇嘅野都好似幾好奇咁樣係咁望過黎，所以這些感覺都係令我對散團再提不起興趣嘅原因黎，就係有班西客再加一些好似「厄飯食」咁樣嘅艇家。

相遇而過之後佢地就繼續向前，我地就向佢地剛才釣過嘅位置作釣，諗住一路艇到去我地熟悉嘅排位。等蔡仔隻艇車遠左大約幾十尺，阿鴻同我就講笑話不如我地快點扮中魚，等佢地班人覺得我地會釣到魚但佢地成艇七個人釣左咁耐乜都釣唔到。我笑笑口問佢點扮呀，無魚喎，佢話好簡單啦，勾我地中左條烏頭落去然後扮中左跟住起返佢上黎咪得囉，跟住我話咁我地不如真係快快趣趣中返條魚實在一點啦。跟住我地就同華仔講話喂，係時候睇你表演啦，快快趣趣是但起條魚上黎剌激下果面班友仔啦。點知釣左幾分鐘，吖，華仔又真係突然起手喎，然後一睇就知佢中左魚啦，跟住我一面叫佢慢慢收唔好心急，一面走去拎撈箕係傍邊等佢上魚，話哂華仔都揸緊十號繩，所以要拎魚除左係過石斷果下之外應該真係無乜難度；話咁快就見到魚影，斤裝紅魚一條，我再叫佢帶條魚過黎我果面然後輕鬆一兜，條魚就上左黎。然後我地就成班人特登大大聲咁話正呀，大紅魚呀！本身蔡仔艇果面其實已經有人見到我地上魚不過應該就睇唔到係乜魚，所以我地而家再大大聲咁話中魚，即刻果面成班人即時望哂過黎，有些人個樣仲好似好葡萄咁，認真搞笑。

搞笑攞威過後，釣況又再次回復平靜，我地釣多一陣都見無料到；阿蔡仔艇佢地就入左中間條「跑道」、然後向我地呢面方向回釣、所以都係繼續比班客仔望住哂我地；於是我就同阿鴻話算啦，我地繞繩過去我地上星期那些中魚位度搵下魚啦，我真係好唔鍾意比班人牛咁眼望住釣魚，班人真係奇奇怪怪，令人感到唔多舒服。於是我地就繞繩然後車艇前到我地上星期中連尖附近一帶、睇下流水方向然後再車前一點等隻船慢慢流後到排位咁樣釣。其實就得我一個認得中連尖個位嘅，所以由我地黎到呢面開始作釣時，其實係未到位嘅；但阿鴻同我都諗住車前少少睇下有無魚食餌，因為上次其實一路釣時枕住都叫做有食餌，不過中魚就真係去到果個秘點先中咁樣。咁我地大約就車到前左幾支莊咁樣落繩啦，今日又真係無食餌喎，然後慢慢飄向我個中魚位時，我就提佢地要開始打醒十二分精神，因為真係我上星期就喺呢度有成三口食餌，所以應該真係會有個排位係度，終於到左我中連尖影相影到嘅果條柱啦，但都仍然未有魚食餌喎，點解呢？其實道理都幾簡單丫，我上次係中魚完之後比阿鴻影相咁個背景係而家身在嘅果條柱丫嘛，咁即係我實際中魚位置其實應該係在前面少少甚至再過一條莊柱啦。更正左個思維之後我就同阿鴻過應該係前少少先係中魚位，不過我地都係應該係呢頭打住轉咁樣前前後後、用手扶住莊柱天花咁樣向前慢慢移動會好一點，因為我地已經終於到位了。其實一到位我都總係心入面形住會有魚食餌的，不過現實就係有魚訊嘅果個係阿鴻，只見佢支竿震震下咁但又唔係食得好大力，阿鴻都要忍住手咁樣等左一陣跟住條魚先索落黎，阿鴻又點會比條魚得逞丫，一抽就中，然後見到支竿都彎得唔錯、幾靚仔咁，不過掙扎嘅力道就唔強，應該算係死口魚，所以我都唔知係乜，叫阿鴻開機拍片佢又話條魚有返些少重量唔敢呢個時候開機驚走魚，咁唔理啦，我就拎起撈箕準備做魚僮架啦；話咁快阿鴻就收到條魚上黎見到魚影了，嘩，不得了，係比我上星期中嘅果條更大條嘅芝．麻．斑！即刻插個撈箕落去兜左條魚上黎先！其他魚都可以慢慢來、走左都唔太可惜，但係芝麻班，仲要有成兩斤野，梗係要快、狠、準，拿拿臨咁樣兜佢上黎啦。啱啱剛才傾偈先話睇阿鴻黎釣咁耐都無見過佢有中過連尖、芝麻，但係我上次黎就中到，真係算係呢度嘅罕有魚，咁都比我中到芝麻真係好好彩，點知而家阿鴻又係同一位置中多一條芝麻，即係睇黎呢度個排位係幾聚石斑魚咁喎，竟然可以連續兩星期都係呢度起到芝麻班，真係唔知係絕對好運定係唔係純偶然性喇。

見到阿鴻中到芝麻班，大家流哂口水之餘亦都醒哂，我地亦都無再比隻艇向前流，而係打橫咁郁隻艇睇下會唔會有多一兩口好野食埋黎。呀，今次到我有魚訊啦，係一口好清脆嘅食餌，根本連試餌果下都無就直接食落黎抆左我一下，但係我就抽唔中，結果成隻蝦就咁樣比佢偷襲得手，而呢口亦係我全日最清脆、最接近中魚嘅一口食餌了，可惜的是我把握不住咁囉。機會嘅野有時就係可一不可再，你把握唔到，可能就會溜左個機會比人。就係我地不斷咁激勵緊華仔話佢第一次入黎點都要中番些好野或者中多一兩條黎「供會」之際，見到佢忽然有魚訊喎，不過起手就抽唔中，上黎無左隻蝦，咁梗係快快趣趣勾番隻蝦落去睇下有無得再食餌啦。吖，落去無耐華仔又話真係有食餌喎，不過梅下梅下咁，然後終於等到有口大啖食餌索落黎啦，跟住華仔一逗一抽，搞掂，中魚。睇佢起魚應該條魚就唔係好大條架啦，再加上咁粗繩基本就條魚想走都無咩可能，不過都係撈箕準備啦；今次就到阿勝做魚僮啦，而條魚好快就見光啦，斤裝包公一條，簡單入網、上水，就係咁樣華仔就完成左個人梅開二度啦，都算係唔錯啦，起碼到而家為止我同阿勝都仲係零入球。

雖然零入球，不過又唔係真係話好介意，始終釣魚心態就唔係執著要有魚，不過如果有就梗係更加好啦，但係而家睇到人地中一樣戥人地高興。我都想華仔中多一兩條，話哂佢都係第一次入黎，玩得開心點留下美好印象就非常好啦。而呢幾條莊柱位真係幾犀利，喺今日咁疏口嘅情況之下都派左兩條魚上黎我地艇。不過我地磨多一陣都係無再食餌我地就決定再車去另一堆柱位度釣一陣，睇下有無境，如果無境咁就最後返黎呢度兜多幾寨就收工咁。車返去前面又見到大師係中間條跑道，但係我地都係繼續在外面條跑道搵魚，可惜係呢面唔好話上魚，連魚訊都無，所以我地釣左幾寨之後都係決定返去頭先中芝麻班嘅果面再搵下魚。唔知係因為水凍啦，水流唔太啱啦，定係真係蝦仔唔夠大啦，我地係「芝麻斑位」磨左半個鐘都唔見有魚食餌之後我地就一路向前飄，但係飄多成個鐘都係無食餌，而蝦仔都係得返五隻手指數得哂，最後我地就決定唔再磨爛蓆，一於收工。就係咁樣，華仔嘅櫃底初體驗就完左啦；相比起我同阿勝嘅新年小龜龜，可以中到兩條魚都算係唔錯啦，尤其以佢第一次釣企頭黎講，都算係收貨啦。我諗下次我地嘅大眼仔如果可以大隻返一點的話應該會有多一兩口食餌嘅。雖然今日作為新年頭炮打得唔太響，不過可以同朋友仔出去玩番一日其實已經好開心，最緊要唔駛坐得迫唔駛受氣就已經好好了。希望我地快點可以再次過黎櫃底釣魚，睇下下次無新手嘅時候，邊個會行運仔、邊個會做魚僮、定係人人有魚中呢，哈哈哈。