嚴寒櫃底折了兵

日期: 01/09/2021
農曆: 十一月廿六
地點: 櫃底
艇家: 阿鴻自駕
釣友: 阿鴻、華仔、泰倫斯、YY
天氣: 天晴、東北風四級、天氣寒冷
水流: 慢流、水質不俗
釣穫: 青鱸x1(斤半x1)、石玤(磅頭x 1 )、濃湯寶(磅頭x 1 )

是咁的，上星期新年再探櫃底做魚僮 https://yy08.pixnet.net/blog/post/106489327 入完櫃底我龜左之後，本身今個星期見天文台話連續幾日都天氣嚴寒就打算休戰一星期的；不過阿鴻打黎話佢因為有事辦要返會國內一趟，而因疫情關係離港抵港都要有家居隔離令要自我隔離十多天，那來回一趟不就要一個月了嗎？既然係咁，真係要同阿鴻提早呢個星期黎個農曆新年前最後一釣啦。打電話問下華仔，佢又得閒，夠三個人，即時話比阿鴻知等佢同老闆留艇。除左我地三個，阿鴻仲喺我地個釣友群度招左一位朋友仔，佢一路見阿鴻成日在櫃底都咁好魚，想跟阿鴻入去試下。其實佢自己有隻釣魚艇，但係奈何隻艇比較大隻入唔到櫃底，所以今次我地仍然都係要租艇。

天文台早於一星期前已經預測到這個週末及之後幾天都會是天氣寒冷，不過既然要釣，我地要做既就唯有係做足保暖措施。還好出發當日陽光先生都出來了，所以無左果種好寒既感覺，比之前一天好多了。講開我地出發之前一天，其實阿鴻亦都有同其他釣友入左櫃底，而天氣就比我地出發既呢日要大風同埋基本全日都係陰天咁。結果全日大約應該有幾口食餌，阿鴻上左條4斤紅魚，而另一個釣友則斷左一口。咁我地其實見到佢地咁樣既賽果都心中有數是日唔會有太多食餌架啦，再加上今次又有新人初探櫃底，所以我都諗住可能又要做陪釣小魚僮呢。

由於阿鴻尋日釣魚所買嘅大眼仔唔夠生猛同埋殼又唔夠硬，所以佢今日就決定自己入三聖去另一間魚餌鋪拎魚餌，希望蝦仔生猛點，能夠吸引更多魚食餌。不過因為路段遠左所以佢返到黎青衣時都已經成9點鐘了。不過唔緊要，如果肯開口，釣少半個鐘都無問題，就好似我初探櫃底撞爆石 https://yy08.pixnet.net/blog/post/106451761 果日咁，遲左成個鐘入去都可以三點幾就收工完場。好啦，咁上左艇我地就直奔櫃底，不過阿鴻話想趁落流先釣一下五號碼頭，稍為作開發途徑，畢竟九號碼頭成日都入而且係最容易入到，所以愈黎愈多人入去作釣，難保魚穫不會受到影響。我就無問題，反正都係咁樣釣，朋友仔話乜就乜囉，大家都係想開發多一些位置嘛；既然係好事，梗係唔怕做。於是我地就先入左五號櫃底，呢度比九號果面窄、而且「樓底」較矮，所以唔係成日都入得黎釣，係要趁水夠乾先入到黎。阿鴻話佢係呢面中過牛屎立，所以我地都係車左去佢中過魚既位置作釣，不過就無食餌，一路係度磨到十一點都唔見有一口食餌，再加上流水漲到差唔多我地要縮住頭釣，於是我地就決定繞繩返番去我地九號主場啦。

過到黎九號，空間闊落左，再加上頭段釣點個海床都比較滑底，於是我就開埋個炮架、擺埋支竿上去一於釣多隻蝦，務求多個機會有食餌。不過首先有口嘅唔係我，而係華仔，但係佢就連續兩口都錯失左；跟住阿鴻都有口，但係亦都唔到釣，估計應該都係立魚多。我同華仔都發覺，當隻艇飄到去一些位置係外面陽光射到入黎夠哂光的話，就會偶爾出現食餌；然後如果較陰的話，好似就魚都唔多開口咁。另外，由於我釣手繩得黎又開左支竿，所以不時會釣緊手繩時都要拎一拎起支竿試一試底、務求隻蝦夠貼底(加多一米以減少掛地甩蝦)。如果大家有多幾口魚訊的話，可能我都仲會較專注我副手繩，但係過左果一段食餌之後，大家都靜左落黎，所以我都較頻繁去為我支竿試底。話說我又拎起支竿試完底番放低然後揸返副繩係度邊釣邊食野啦，咁食緊野咪望住支竿囉，忽然見到支竿頭震左幾下喎，即時已經醒哂同埋放低個麥記包，跟住再放低埋副手繩準備拎起支竿去對付條魚；點知我都未擺好架步，已經見到竿頭一野就沉左落去，然後就繼續往下沉；唔諗咁多即時伸手想去拎起支竿啦，因為基本上呢個時候一係已經中左魚一係就一抽即中；點知我一拎起支竿、都未到抽魚、頂魚果下，突然之間「啪」的一聲，支竿竟然炸了！第一時間我嘅條件反射係「嘩條魚唔野小喎，好野，趁條魚應該仲係度未甩未走，快點徒手收佢返黎先」，於是即刻伸手想去揸起竿頭前面嘅布繩，心裡面想著準備同條魚搏鬥啦；點知一拎條布線上到手，卻感覺到條魚嘅戰鬥力根本唔係果回事，衰點講句真係毫無還擊之力，撈箕都可以唔駛點用。我之後基本就係一路咁收繩，好快就見到魚影喎，一開始以為係牙點，再望多一眼原來係石玤，咁真係多謝善信啦；跟手都叫在旁邊嘅泰倫斯幫手撈一撈魚，話哂都係石玤丫嘛，；就係咁樣，磅頭多一點嘅石玤就咁樣上左水啦，真係估唔到開齋果個會係之前一路都無魚訊嘅我喎，真係有點爆冷嘅味道呢，哈哈。

有魚起到，大家都精神返唔少，因為通常有得第一條都會有第二口食餌的；磨多一陣華仔又有食餌，不過又係唔到釣食剩個蝦頭，無辦法，唔到釣真係無得講，唯有即刻落過隻蝦再博下睇下會唔會返口食餌啦，不過就無再食落黎，其他人亦都一樣無魚訊。釣多一陣都無料，我就叫阿鴻索性繞繩車前點去我地芝麻斑秘位果面試下，同時我都叫華仔同泰倫斯揸緊副繩；尤其係泰倫斯，因為佢係櫃底新人，分分鐘就係佢有驚喜的呢。不過唔知係咪天氣凍左水又凍左些嘅關係呢，係呢頭玩左大半個鐘都無食餌喎，咁我地唯有收繩再去前面嘅釣點啦。本來就車去前面另一個排口位，不過途中經過一個位有陽光射到入黎櫃底，於是同阿鴻講不如係度試下啦，話哂尋日阿鴻口大紅魚都係在陽光出來的時候中的，咁可能這邊的魚都比較喜歡在有陽光的時候食餌吧。釣左一陣，今次到阿鴻有食餌喎，佢都有叫我睇架，咁就見佢竿頭震左幾下，然後阿鴻就提起左支竿少少，以準備等條魚食落黎就抽竿。跟住竿頭震多一下就見到竿頭沉落去，然後阿鴻一抽竿，支竿就出現左美麗的弧度了，諗住阿鴻可以同條魚玩番兩野啦，我仲起身走去拎部攝錄機諗住拍片，點知支竿滿左弓然後阿鴻一收繩跟住就沒有然後了… 收返上黎，唔係斷繩呀，原來係抽條魚唔入；咁我同阿鴻講係呢個情況之下就算勾返隻蝦落去都無用，條魚基本上都唔會食餌了，因為剛剛果下阿鴻抽竿其實已經抽起左條魚個頭，只不過係打條魚唔入，但係已經夠嚇親條魚了，所以機會錯過了，只能夠等下一條魚了。不過既然呢度有魚食餌，都梗係勾過隻蝦掟落去睇下有無其他魚喺附近肯趁有陽光時開口食餌啦。但係釣多一陣都真係再無魚訊，咁我地唯有再繞繩然後就車到去差唔多跑道嘅轉角位，由果邊往回飄溜。

釣到呢個時候阿泰倫斯都好似無乜魚訊，我同阿鴻都開始講笑話會唔會今日佢唔算係新人而係代替左阿勝個龜位而來呢，哈哈。呢個位我地釣左一陣都係無料，阿泰倫斯又問起我地成日講嘅五大恆星喺邊度，於是我地就繞繩又再車過去果度釣啦，不過無論係金、木、定係水、火又仰或土，都仍舊係無食餌，我地都真係無乜辦法；我直頭手繩釣到家陣一口魚訊都未有，而阿泰倫斯都釣到恰著左。諗諗下，都係唯有車去一些位置係有陽光射入黎嘅地方吧，釣左一陣，泰倫斯都起番身了，我同佢講佢根本無蝕到，因為我地大家都無魚食過餌，只係勾左一兩次石，而佢隻蝦則仍然活生生咁係水底游緊水。

不過有些東西就係整定嘅，當大家都對今日嘅情況心裡打左個底，甚至覺得今日可能連新人都無運行嘅時候，咁啱我又望過去阿泰倫斯果面，見佢收緊魚絲，雖然佢無出聲，但係我一睇就知怇中左魚，於是我就同阿華仔講話泰倫斯中左魚啦，然後我就走去拎撈箕，並在旁邊等做小魚僮。終於都見到魚影啦，原來係青鱸一條，跟住我就插個撈箕落去兜魚，點知第一下竟然唔中，然後泰倫斯修正番，帶順番條魚之後，我就迎頭一撈，一條接近兩斤嘅青鱸就咁樣上水了！原來，櫃底新人大酬賓呢個傳說係真架，無論係點樣惡劣嘅環境，呢個優待始終都維持住，個傳說仍然都無被打破到！見到有青鱸喎，諗住會有多一兩口，所以我都即時換過隻生猛嘅大眼仔落去睇下會唔會到我有食餌，不過呢個位就真係再無食餌了。

然後我地又繼續往前車去另一個有陽光射進來嘅位置，呀，落餌無耐就見華仔有食餌，不過佢今次唔係唔到釣而係抽唔中，上到黎係蝦都無埋，跟住我話呢個情況同阿鴻果下抽唔入條魚唔同，今次係條魚順利偷到隻蝦，所以可以落餌博佢貪心再食埋黎。跟手唔夠幾分鐘今次終於輪到我有魚訊，係全日手繩嘅第一口呢；首先我就感覺到隻蝦跳左一下，然後已經即係定過神來揸住副繩，跟住隔左幾秒就感覺到有野吸住左隻蝦咁，我就由佢繼續搞隻蝦但就帶返緊副繩，跟手就感覺到清脆明確嘅魚訊、往下一拉，然後我一起手，竟然．落．空！只嘆自己技術唔夠之餘亦都唔夠運仔，即時再勾多隻蝦落去希望會有返口食餌，不過唔單止我，連其他人都無再有食餌了。大家都有點失去信心，連平時信心滿滿，熱血樂觀嘅阿鴻都釣到開始懷疑人生，會思疑一下今日究竟係咪真係要還魚債，槓隻小烏龜。我話會唔會係你尋日中完大紅魚呀？上次阿勝中完大紅魚之後連續龜左兩次，連食餌都無乜；尋日你又係中完條大紅魚，今日可能又係要承受番個後座力喎；咁我當然只係講笑啦，但係連咁正面樂觀嘅「積極鴻」都有動搖嘅心態，可想而知今日情況真係有點唔樂觀。望下個鐘，就黎三點，我地就話釣多次芝麻斑位，再無食餌我地就可能要離開櫃底出去釣了，因為潮水開始漲起了，如果唔離開的話分分鐘我地就會頂頭同埋離開時會比較麻煩。既然返到幸運之位，再加上有陽光射得入黎，我地都抱有僅餘嘅信念去釣，不過釣左成半個鐘，圍住果幾條柱轉來轉去都真係無食餌，於是我地決定離．開．櫃．底！

本身阿鴻就想過青衣油庫嘅，但係因為泰倫斯4點幾要上岸走人，所以我地就話下次先過油庫，今日就先過青荃橋同埋荃灣西對出果堆泡度睇下有無放生魚釣。出左黎仲話釣放生魚呢，用大眼仔我就真係無乜信念嘅，喺橋底釣左陣大家都無食餌之後我地就過浮泡果面釣啦，釣左陣，啊，華仔竟然話有食餌，然後佢起手又係唔到釣食剩個蝦頭。跟住阿鴻都話有食餌，但係就應該唔大條，只係見支竿震下震下然後就無左下文。釣多一陣大家都無魚訊，泰倫斯有條新人魚又夠鐘埋岸，於是我地就先埋碼頭放低左佢，然後再出去另一面嘅浮泡作最後衝刺。出返黎繼續挨住泡釣，我都仍然係無食餌，至於華仔就都好似有食餌喎，不過就起唔到手；但係睇黎華仔喺最後階段都想同阿鴻分出勝負咁喎，釣到而家都仲咁好鬥志。我呢，釣到而家全日唔計條石玤雖然就只得一口魚訊，不過我都繼續保持正面態度，竿、繩並用，希望食個尾糊。而阿鴻車左我地過去加油船果面釣多幾分鐘之後就話佢率先宣佈投降收工，正式迎接兩個月以黎孵出嘅第一隻小海龜。就喺佢執緊架餐時，前面嘅華仔突然之間起手，今次佢係．真．係．中．魚．喎！見佢一手一手咁收上黎，應該就唔算好大條嘅，不過我都將我今日設定好嘅攝影機拎出黎拍片。本身今日呢套攝錄架餐係諗住拎黎影阿鴻的，話說阿鴻哥仔成日有魚食餌時都唔開定部機，然之後如果中左魚大大條佢又唔敢分神去開機要全力應付條魚，所以往往以係拍到斤頭夠水上，所以我就諗住拎黎影佢、影低佢中些好似大紅魚咁嘅級數嘅魚，又或者係斷魚片都好睇丫，點知就全日部機都係無機會用得著。而家既然華仔有魚中，點都開機影影佢啦；只見一手一手咁收，好快就見到魚影，原來係一條磅頭牛揪，華仔連撈箕都唔駛用就輕輕鬆鬆彈左條魚上黎。上到黎佢笑笑口話條魚好玩同埋幾有力之餘食餌仲有點古惑同詭異，不過佢最後都忍到手等條牛揪黎一下重擊，然後佢終於喺今日幾次又錯失又唔到釣嘅情況之下黎個標尾會。我見到咁就話今日估唔到我地四個人要打龜嘅竟然係阿鴻哥仔，睇黎佢真係要還魚債了。中完條魚，華仔鬥志再次提升，不過我地釣多一兩個浮泡都係無食餌，所以都係決定鳴金收兵，結束是日釣行。

睇返今日釣況，再加埋尋日阿鴻埰嘅魚穫，可能真係天氣凍左所以魚都收口較少食餌；又可能係最近多左艇入黎櫃底釣魚，所以櫃底都開始出現枯竭嘅問題，所以阿鴻都話要開始發掘新地方，就係趁流水啱嘅時候過去其他號數櫃底開發新排口，不過一切都要等佢在國內返黎先可以再作打算。今日釣況雖然欠佳，不過都保持到迎人入櫃底有禮物收嘅傳統，都算係認真唔話得，希望下次如果阿丹有機會同我地入去時都可以秉承傳統，收番份新人大禮物啦。

陽光明媚