六級遠征長洲獵鱸團

日期: 01/29/2021
農曆: 十二月十七
地點: 長洲外、維港
艇家: 濠仔
釣友: 阿濤、朗奴、鬼教授、阿斌、馬里奧、YY
天氣: 天晴、東北風五級、後轉六級天氣清涼
水流: 快流、水質不佳
釣穫: 百花鱸x1(4斤x1)

是咁的，對上一次和阿濤釣魚都已經係五個月前嘅恆濤二對二決戰青龍頭 https://yy08.pixnet.net/blog/post/106451245 了，所以當阿濤又再在群組吹雞話釣魚時，雖然睇天文台天氣預測話會係比較清涼同埋吹強勁東北風，我都抱住和朋友仔聚下舊再加釣魚的心態出發，反正同阿濤去釣魚都係揸大餌，都係「一係有、一係無」，無就好平常，有就當驚喜咁啦。

本身都見大風諗住就咁釣下維港就算，點知出發之前果晚阿濤喺群組發左一條阿長洲進哥艇喺長洲開外爆釣鱸魚嘅視頻，就問大家有無興趣改變計劃。咁大家當然無所謂啦，都係睇隊長同船家頭架啦，去邊都係照跟架啦，於是一致決定將釣點改為往長洲外泥墩位。話就話要跟，但係我睇完天氣就心諗阿濤子你真係識得揀日子啦，全個星期最勁風果日已經比你揀左黎釣魚，仲要出長洲外，真係要「天將降大任於我們也，就必先勞我筋骨喇」。唔緊要啦，要做大事就係要搏一搏！

由於要出長洲外，出發時間亦由優閒8點半改為晨早7點鐘，對於夜訓一族的我來說真係最大挑戰。因為我三、四點先訓得著然後五點半六點就要起身出發，真係會好唔夠訓，咁就會導致個人狀態更易暈船浪。但係因為真係習慣左夜訓，所以早一訓真係就算早碌落床都係訓唔著，最後都要搞到成四點先入睡。然後6點前起身跟住七點已經到達左筲箕灣碼頭落艇，等埋朗奴我地就過去三家村碼頭接埋其他隊友，跟住過隔離漁市場買埋基圍蝦，然後就直車往長洲去了。維港裡面都仲叫做風平浪靜，過左青洲開始已經有點風，不過可能仲未起哂風所以都還好，然後出到黎長洲都算係開始見到有點白頭浪，風勢都未去到好猛，不過睇天文台都話應該下晝就會起哂風。

唔理啦，到埗就梗係綁架餐然後落餌釣魚啦，可能時間尚中關係，我地到左長洲外都見唔到有船聚集；無乜理由架，尋日長洲進爆鱸魚條片放左上網應該今日會好多艇黎釣架？不過可能時間尚早吧，因為一般散團艇落船時間都成8點幾，咁出得黎都要9點啦，我地而家先至8點，無艇都唔出奇嘅。咁於是我地就大約搵個排位試釣啦，不遠處都見有一隻艇，心裡面都疊實一點，但係一日唔見進哥隻艇我地一日都唔知會唔會條片唔係新鮮片而係舊片而佢會唔會係尋日爆釣的呢。一路釣都未有食餌，釣到差唔多9點，濠仔同朗奴都話見到遠處有隻黃色快艇嘅縱影，一睇就知係進哥隻艇，於是我地即時收繩然後開艇過去果邊，車到咁上下先發現原來果度已經有好多艇聚集；應該係剛才其實已經有好多艇在釣，不過因為不是黃色，吸引不到我們注意，然後終於9點鐘進哥都在青龍頭接完客仔出到黎，所以我地先見到然後過黎。數一下，都有成十多隻艇在艇，除左進哥之外，仲有一隻黃色艇，原來就係進哥阿爸黎，然後再望下，嘩，連山歌仔都係度！真係好耐無見山歌仔啦，無辦法啦，我又無釣開外海，而且「打龜龜群組」都無哂釣魚活動，所以都好少機會落山歌仔艇釣魚了。再睇下仲有乜野艇啦，濠仔就話連長洲艇皇火勝、華貴都喺度，真係不得了！應該真係因為今日實在太大風出唔到外海所以就算一眾明星艇家都要留守港水。

釣下釣下，首先見到進哥隻艇有魚上，當然就係鱸魚啦，目測都係六、七斤大細咁，跟住無耐都見山歌仔隻艇就有魚上，都係咁上下大細。總之偶爾就會見到有艇上魚，不過就唔算好密咁，但係我地就仲係一口魚訊都無。再睇下中魚嘅艇用嘅魚餌，佢地應該都係用比大眼仔仲要大嘅大白刺或者海中蝦，咁所以其實佢地基本已經贏在起跑線上的呢。但係就正如濠仔話齋，用到成十蚊一隻嘅海蝦黎釣鱸魚佢又覺得唔係咁抵咁囉，哈哈。唯有寄望有些飢餓鱸魚經過我地堆魚餌時會張就一點食餌吧。不過釣左好一陣子，都係周邊嘅艇有食餌，但係都係未輪到我地。由於其實中魚密度唔係想進般高，所以釣下釣下，釣艇們都開始有點分散去搵魚，尤其甚有性格嘅火勝一早已經離開左主群去另一面搵魚，然後又見到佢連起兩條鱸魚，跟手友仔都過埋去，而我地都過去果面試下運氣。濠仔同友哥都叫有返兩句，於是問下佢地揸乜餌，原來佢地用比我地仲細嘅中眼仔做餌，所以都無乜動靜。但係釣釣下都比佢地執到條喎，真係點解到我地都仲未有魚架！哈哈。不過其實釣況係點我早就唔多理會，因為我其實黎到無耐已經開始中壓，所以基本都係勾完隻蝦飛落去之後試完底拉返起之後就放低支竿由得支竿等魚食訊。而釣下釣下時我又忍唔住打左一次誘餌，之後走去拎起支竿收返上黎先見隻蝦唔見左！聽甫奴講話佢頭先其實見到我支竿竿頭有郁動，不過咁岩我烏前就打緊誘餌佢就以為我係去準備抽竿，點知我回過神來就已經蝦仔被偷了，真係咁啱遇著剛剛。

望下個鐘都成十一點了，風勢又愈來愈大，濠仔都話下晝返去應該會更加風猛。阿濤就話釣多半個鐘無料到就返維港搵紅鮪。跟住過左都無幾分鐘，就聽到佢地問阿濤係咪有食餌，我望過去時就見到阿濤揸緊左支竿等食餌，即時拎起部攝錄機開機拍攝，跟住就見阿濤一抽，中魚，頂兩手已經輕鬆搞掂條魚，朗奴拎住個撈箕又細得滯唔好撈，於是阿濤索性就咁彈條魚上黎，反正佢魚絲夠粗，二來係鱸魚，甩返落海都唔可惜。上到黎睇下條魚，雖然瘦左一點，但係至少都有四斤以上嘅。釣到呢條魚之後，證明左我地嘅魚餌雖然唔吸引，都未至於臭嘅。雖然中魚，不過我地都係維持原定計劃咁樣釣多一陣見無食餌就起程，始終大風浪又唔係密口，不如早點返港內釣魚，順便可以上岸買晏食同埋避開之後會愈來愈勁風浪。

就係咁樣我地就繞繩然後直接往維港駛去，本身諗住喺尖沙咀碼頭停一停上岸買野食貪佢夠近，但係因為果頭風大，所以濠仔決定都係返去西灣河避風塘果頭比我地上岸買野食然後返黎一齊在避風塘入面食完先繼續釣，反正釣少一陣都唔會好影響今日嘅釣況。買完野食完點半有多，然後我地就車返出去鯉魚門對開個沉船排度搵紅鮪。濠仔話呢度起流就釣唔到所以睇下時間我地都係大約釣到三點半到四點就會完場，所以剩番比我地嘅時間都係得兩個鐘，希望呢兩個鐘可以好好把握吧。阿濤就話次次黎基本都會全船有一條半條魚執到，偏偏就係上次阿鬼跟黎果次就全船中伏，所以今日又係再次睇下係阿鬼呢度連龜兩次定係可以有人執到魚走啦。避風塘車出黎真係三分鐘到達，大家都即刻落餌；不過唔好講笑，下晝真係起哂風，我地連係維港嘅頸口位即鯉魚門口都感覺到強勁嘅風勢，而且都見到有白頭浪，相信長洲外真係更加犀利，我真係情願舒服一點釣下魚就算喇。不過返左黎港內同埋上完岸回氣，所以狀態都已經返哂黎。但係人就醒左啦，魚訊依舊都係沒有。好不容易先聽到阿濤話有食餌不過就試左一下餌就沒有下文。之後我地見到有水警經過，唯有埋駁邊釣左一兩寨，等隻水警入番水警基地我地先至再出番航道排口作釣。釣點其實好鞋，所以我地都不時勾地，終於有一次勾地之後我連布線都斷埋，於是放棄揸竿轉釣手繩；仲好啦，手繩應該更加好釣，唯一唔好處就真係呢度水深成40米，每次要收繩返寨我都要好攰咁樣收繩；但係我又唔可以就咁將魚絲收落艇度，因為好大風，所以每次都係直接收到手碌上面去，所以更加費時。所以水深其實釣魚竿真係更方便。點都好啦，一樣係咁釣，一樣係咁樣等待。等下等下，見到前面阿鬼抽左一下竿，然後就係度頂，美麗的弧度又再出現，但係我就分唔到佢係中魚定中鬼網，不過佢頂左幾下之後就斷左絲，照咁睇又真係可能係魚喎，因為剛才我地中石中鬼網時都要用好大力先可以將魚絲整斷，但係佢而家頂左幾下就斷左，相知真係如佢所言般係中魚然後過石斷。

斷完呢口釣多一陣都係無口，再加上又見到隻水警出現在遠處的啟德郵輪碼頭附近，望下個鐘都三點半，濠仔於是話收繩完場。就係咁樣我地今日嘅長洲遠征獵鱸加維港紅鮪團就正式完結了。雖然無魚中到，但係其實都無乜所謂，打龜既野真係釣魚嘅過程黎，絕對係比到今日第一次跟阿濤釣魚嘅阿斌同埋艇釣新手馬里奧一個體驗，同埋比到一個信息佢地就係網上睇片到現實世界係兩回事黎架；網上睇到既釣魚片往往真係釣手背後經歷左幾次嘅打龜或者不理想魚獲之後先至會有一條片出到比你睇；當然，我係講緊好似阿濤呢種堅持拍有質素嘅片而唔係為左出片、曝光率而把每一次釣魚唔理釣到乜都出片嘅一些「網紅」黎講啦。點都好，今日其實都係開心既，要數美中不足就真係天氣真係唔理想，所以搞到我成個上晝都唔在狀況、中住壓黎釣。另外當然就係食餌情況啦，雖然話唔係好介意釣唔釣到魚，但係有魚食下餌，點都好玩過無魚訊架嘛。但係又咁講，完場之後上網睇到其他艇的釣友放上網的魚獲照，火勝艇今日都釣到十多條鱸魚，真係艇皇真係艇皇，當然佢地用嘅蝦都係大蝦會較得食，但係都要佢地肯堅持同埋挨風浪先會得到咁嘅收獲啦。所以釣魚真係唔可以話全部靠運，技術、運氣、魚餌同埋堅持都同樣需要，呢個就係大家所講嘅天時、地利、人和了。點都好，希望下次好快又可以出發去釣魚，相信等阿鴻在國內隔離完畢返黎香港之後我地又好快可以再次出發了，始終真係希望可以過農曆新年之前再出發多一次艇上有人可以中到魚過下年咁啦，哈哈。

筲箕灣落艇