敗走蚺蛇遇網紅

路線: 西灣亭-> 螺地墩-> 西灣-> 麥徑二段-> 鹹田灣-> 安記士多-> 大灣 -> 東灣 -> 往米粉頂途中敗走 -> 回頭走回鹹田灣 -> 麥徑二段 -> 大浪坳 -> 赤徑 -> 北潭凹 -> 西貢市中心德興麵家

登山之友: 超級嘻嘻、細表妹、YY

是咁的，挑戰完青山腹地之後，細表妹表示佢對山鞋真係喺應付浮沙碎石方面稍為薄弱，因而入手左一對新山鞋；以上星期我同佢就已經去了妙高雲海與天門結界 https://yy08.pixnet.net/blog/post/106492702 試鞋，不過就仲未試到乾的沙石路段的性能，於是我地今個星期決定再度出徑。而在雞公嶺同蚺蛇尖兩大選擇之下我地選擇左後者，希望可以邊睇西貢美景邊試新鞋性能表現。不過今次行程我覺得比這沙石路段更有挑戰性的就是天氣！我地要在炎熱的天氣完成一尖四灣絕對是一個嚴峻的挑戰來，畢竟上次行青山時，表妹同超級就已經試過熱到唔見左半條命仔咁，而今次路程長度更是有過之而無不及，所以絕對會係我地今次行程嘅最大考驗！

由於保守估計要行八個小時，所以我地決定無論如何都要十點開始行，所以我地八點半已經約好在坑口集合，然後乘坐小巴入西貢市中心食早餐、再買完補給品，我地就再坐小巴向我地是日嘅起點西灣亭出發啦。無錯，我地決定採取同一般行蚺蛇尖路線方向嘅逆向，就是由西灣亭出發，經過四灣再上米粉頂然後挑戰蚺蛇尖再在北潭凹離開；這是因為西灣亭位置隔涉，電話收不好信號之餘在我們完成行程之時也會沒有小巴經過；相反從北潭凹離開的話我們可以有巴士及的士可見，不用下下都電召的士；就係咁樣我地在考量過交通接駁方面之後就決定來個逆走蚺蛇尖。而另一考量就是我們不想走重覆路線，所以不想就咁北潭凹出發然後在大浪坳上蚺蛇尖之後行一個圈再到北潭凹離開，所以就試試這條路線吧。當然事後會發覺這個策略其實有點不智，這個容後再談；但亦是這個決定，令我地遇到更有趣的事情呢。

點解咁講呢，原來就喺我地喺西灣亭上緊裝、搽緊太陽油嘅時候，忽然見到有幾個熟悉的臉孔在剛到達嘅的士度走出來，佢地都係山界比較出名嘅網紅，其中一位甘美我除了有追蹤之外，基本每條片我都有看呢。等佢地整完裝出發之後我地亦都起程了，不過佢地應該就係直接落西灣，而我地路線就反而會先上螺地墩山頂再落山，因為咁樣路線雖然要上山看似辛苦過慢慢落去西灣，不過我地覺得上山看風景比在山腰中間走著是更加值得的呢。走了一會我地都已經看到了標高處了，從這裡也已經可以看到我地嘅目標 – 蚺蛇尖就在遠處。從山頂這裡看著三百六十度嘅風景肯定比沿麥徑落西灣開心得多。打卡之後我地就沿住山徑離開一直走到西灣去。

其實我地係可以唔駛走到西灣沙灘而係就咁接回麥徑二段前往鹹田灣嘅，但係我地又想去個洗手間同埋去士多買冰凍可樂，所以情願走一點回頭路去到西灣沙灘個廁所。點知過到去先發現個廁所封左無得去！即時連去士多嘅興志都無埋了，於是我地又再沿住沙灘往回走。沙灘嘅氣溫比我地剛才在山頂時唔知點解黎得熱，再加上雖然空曠但又唔係好覺好有風，所以行起上黎都有點翳焗。雖然話西灣行過去鹹田才大約兩公里，但係喺呢個炎熱同悶熱嘅天氣底下，對大家嘅體能同耐力已經算係一個挑戰了。行左一陣都已經見阿表妹紅都面哂，而阿超級都開始有點紅起來並且話語愈來愈少，我都真係怕佢地會中暑，但係西貢呢段麥徑二段出名就真係無乜樹蔭位，所以都是乾曬。而阿表妹只好用水樽的水向頭頂、面和後頸灑水，並拎個手提小風扇出來吹，希望可以降溫解暑一番。不過呢個都只係權宜之計，而我地都只可以繼續緩慢地前進。終於好不容易走到一個位置是有一點樹蔭位的，而我地已經見到都有幾堆人正在這個樹蔭位休息避暑呢。不得不佩服那些北方來的強國人士，因為我見到其中一組正在休息的人士都是強國的人，而這幾位人士不論男女，都是穿著長袖的薄風衣和褲子，真的是有夠誇張！我地係度休息左一陣子，等眾人開始回氣，面色也比剛才好多了之後，我地先至繼續再度起行。行下行下終於都黎到鹹田了，當然第一時間就往士多走去。阿超級話睇落安記士多比海風那邊的露天茶座多點陰位，所以我地就揀左去安記士多了。雖然我地都有水有飲料，而我自己更是有成兩公升剩低而令背囊很重，但係呢個時候唔理啦，梗係要飲番些最凍最爽的冰凍可樂先至可以一解我地嘅辛苦啦。飲完野回哂魂之後，當然胃口就來了，所以我地呢個時候都決定要順道食下午餐補充體力。雖然我地喺坑口地鐵站係買左華御結飯團，但係既然有士多，當然就係食番些新鮮現煮的食物暖肚來得開心吧。

開開心心食完餐旦麵同烏冬之後，我地休息多一陣、等阿超級再買水補級之後我地就要準備繼續上路了，畢竟我地已經係度都差唔多抖左成個鐘頭了，望下個鐘都已經三點幾，再唔出發我地真係天黑前都去唔到蚺蛇尖了。洗完塊面就即時起行，我地沿住小路走到大灣，根據安記士多老闆嘅資訊，佢話大灣沙灘足足比鹹田灣的四百多米多了一倍，即時有成八百多米，而這開揚廣闊的感覺確實令人更加感到心曠神怡。食飽飲夠係唔同些，走起上來個人都精神好多；不過我地就要繼續趕路，因為我地係士多真係消弭太多時間了，阿超級話我地都要加速來追番失去左嘅時間差，因為怕上到山都成六點幾咁落山時天黑就會較麻煩了。於是我地就繼續由大灣轉去東灣，然之後我地就要前進往上攀升三百多米的米粉頂了。初時走起來還可以，不過其實這個路況個人感覺比青山那種純粹的乾浮沙碎石更不好走，而且還是在這個藍天無雲的天氣下走著，真係愈來愈覺得舉步維艱。睇下阿表妹同超級佢地都愈行又愈來愈紅了，而且速度也緩慢起來，不過我地都諗住要盡快攻頂，所以都苦苦堅持住。一直望住遠處的蚺蛇尖咁掙扎住地大約上到二百來米，見到個太陽仲係咁毒辣，而我地嘅速度估算上到去都可能要六點多七點，如果係咁樣落山真係麻鬼煩，而且也有失我地一貫只係想快快樂樂地行山而唔係搞什麼個人自我挑戰，於是我地就趁住停下來飲水同埋灑水嘅時間討論一下敗走嘅可能性。能夠產生得研究敗走嘅可能性，味意住其實我地都意識到以我地嘅狀態咁樣走落去都只有辛苦堅持、沒了有趣和享受；雖然完成了可能會有鬆一口氣，又挑戰成功果個感覺，但係之於我們而言，慢走山野之間，享受大自己帶給我們的靈氣與寧靜，更是我們所嚮往的。就係咁樣，我地就決定敗走今趟行程，不再攻頂上蚺蛇尖，而是往回走向鹹田再沿麥徑出北潭凹了。雖然路線距離其實是差唔多，但起碼不用再在烈陽下攻頂，以及在天黑時在都是浮沙碎石的蚺蛇尖下山，而只是輕輕鬆鬆的走在石屎路上，絕對輕鬆和安全得多。

放下了那份一心趕路攻頂追時間的心態之下，大家頓時放鬆起來，面容即時也從容起來。這真係以今日我地嘅行程黎講比較少見到的臉容呢。大家即時為敗走呢一刻以背後的蚺蛇尖打個卡紀錄一下，然後就找個位置坐下來休息一番。呢個時候大家先至有番那個欣賞四野，放鬆打卡的心情。表妹同阿超級見到往上下多十來米有個位置好打卡佢地就走左上去，但係我心諗既然我地已經唔再係要攻頂，我連呢廿米都唔想再行，所以我就同佢地講你地慢慢影啦，我就先往回走、先下山去了。走到了一塊剛才經過見到其實幾靚，但因要趕路而沒有過來打卡的石塊上面，我就咁左係上面邊飲水，邊休息，邊等住佢地落黎幫我打卡。等佢地都過來的時候，大家也就感嘆的說，好彩我地選擇了敗走，要不就錯過這裡的美景了。一輪打卡過黎，我地就繼續下山往東灣走去。

我們這次則選擇在沙灘邊走東灣，然後再走回大灣。呢個時候大家都係懷住輕鬆嘅心情走著，腳步亦彷彿輕了許多。而阿表妹更少女心爆發、在沙灘上時而漫步、時而起舞、時而因為見到沙蟹在沙上疾走而拔足奔跑追逐。走完了大灣沙灘我們就在角落找塊石頭坐下來吃飯團，享受著海風和大自然帶給我們的憩靜。雖然呢面就睇唔到日落，但係黃昏的氣息還是滿滿的，天空也開始出現了晚霞。雖說我地已經不用再趕路，但係我地都仲有好幾公里要走才出得北潭凹，而且還要坐車回西貢市中心才有飯吃，所以計算一下時間，我們還是要繼續起行了。路還是要趕，不過也是輕鬆的提速而已。

好快的我們已經又回到了鹹田灣，在士多去個洗手間同埋更換一下水袋之後，我地又在繼續行程了。天色都開始昏暗起來了，不過我地都是繼續前進，未有用頭燈。走了一陣子我地終於也經過了大浪坳，亦即原本我地無敗走的話，會在蚺蛇尖下來接回麥徑的分岔位。這時天色其實都已經黑了，但是由於是農曆十五的關係，月亮可謂是又圓又大又亮，光得連我們走在林內的小路也能看得見它的光。雖然它很光，不過我們為了安全的提速走路，這時我們也把頭燈和小電筒都開了。我們這個步速很快的也走到了赤徑，稍稍停步飲幾啖水之後我地就準備緩緩的攀升百多米路段往北潭凹走去。可能經過了全日的行程我們的身體其實都已經疲憊起來了，再加上慢慢的要往上的走著，腿部都其實有點繃緊和小抽筋的先兆，所以超級呢個時候就停下來話要補給一下能量、食個飯團，順便再試試之前買來的應急抽筋水，睇下個效果咁話喎。咁喺呢支抽筋水同埋飯團嘅雙重加持，再加上佢輕輕的伸展動作，小息了一會果然就好多了；而我地食完飯團能量都提升返當然亦都戰鬥力即時回升返，可以開開心心繼續趕路了。呢段路其實都有路燈，不過就很多支都壞左未有修理好，所以都係一段有光一段無光咁樣，不過無所謂啦，我地自己都有燈，所以都無阻我地嘅進度，而我地都係咁樣一直的走著，未幾就已經差不多來到我們是日的終點北潭凹了。

應該是大約還剩二三十米吧，不過我們都已經看到了位於終點的公廁了，所以我這時也發出了興奮的叫喊聲，歡呼了一句，「啊，終於到了，你好嗎」。喺唔會預料到有任何回應嘅情況之下，呢個時候我見到有十多二十個身影一同因為我的呼喊而轉身向這個方向望過來！嘩，真係好鬼尷尬啫，即時收左聲扮無野咁樣再加快步韻咁行左入去個公廁度，但係我地就睇到佢地都著哂制服，原來係消防員。睇個情況出動咁多人，應該係要做任務了。唔敢阻擾佢地做野或者休息，所以我地都打算快步行去不遠處嘅巴士站睇下搭巴士又好，電召的士又好；點知呢個時候就見到有架巴士駛緊過來，即時跑過去巴士站上車。上左巴士，我地都見路旁除左消防車，仲有警車、救護車同民安隊車，睇黎真係可能有人有意外定咩了，點都好，都希望無人出事、能夠平安啦。

返到西貢市中心，都剛過九點，真係好彩仲可以搵野食；本身諗住去食車仔麵，不過去到檔口阿姐話已經收左爐無得食了，咁我地唯有就有乜食乜啦。行左過隔離食牛什粉，又比我地喺鋪頭入面見到有個電視台藝只同佢老婆食緊野喎，不過食緊飯就無謂打擾人啦。終於飲飽食醉大滿足之後，我地就行去巴士站搭車了。平時遊記最多寫到食飯就已經完結了，點解今日仲未完？咪因為仲有些趣事遇到囉。有咩咁趣呢咁究竟？就係喺我地行緊過去小巴站時經過了巴士站，呢個時候竟然比我又見到了今朝喺西灣亭遇見的那些山界網紅喎！真係世事有無咁橋呢，一日竟然偶遇兩次，起行先見一次，臨別又再見多次，真係勁好笑。而我地今日嘅行程就喺我過去同我有睇開既果個網紅打招呼合照之後，正式結束了。睇返今日行程，雖然最終係敗走未竟全功，登唔到頂有點遺憾，但係天色好好都影到好多靚相反而先係更加開心。不過檢討返我地個登山路線計劃其實真係有點失策，逆走蚺蛇尖一開始係先行完四灣消耗左一半體力之後再慢慢攻頂，雖然避開左正午太陽最猛烈嘅時份攻頂，但係行完四灣先攻頂一來已經無咁好體力，二來就係會有機會上到蚺蛇尖時已經天開始黑而增加難度或風險，就好似今日咁樣而令我地最後要選擇敗走。相反，如果一開始就從北潭凹出發，只是經過一段輕鬆的石屎路段去到大浪坳先出山徑攻頂的話，相信大家雖然會曬得辛苦一點，但係在體力較充沛之下慢慢邊走邊曬水還是可以順利登頂的。之後走落山後去到東灣大灣時可以再就時間、體力來調整計劃和行程，選擇從北潭凹走還是再漫走四灣，應該會比我地而家咁樣更具彈性同埋相對輕鬆。點都好啦，吸取左今次敗走嘅經驗，我地下次應該會從北潭凹出發然後直取蚺蛇尖再走到鹹田之後就再上麥徑走回北潭凹離開，畢竟今天我地已經行完四灣了，下次就搞掂埋個「尖」就可以啦。不過世事就係咁得意，唔係今日我地選擇逆走，又點會可以一日遇阿網紅佢地，仲要係兩次呢，哈哈哈。

好天氣