維港不能解釋劇本釣行

維港不能解釋劇本釣行

日期: 09/05/2023
農曆: 七月二十一
地點: 維港西面一帶
艇家: 朗仔
釣友: 朗仔、朗爸、康哥、YY
天氣: 天陰、一兩陣驟雨、西風4, 5級
水流: 慢流、水質一般
釣穫: 細鱗 x 6 (兩斤x 1、斤頭 x 1、磅頭 x 3、6両 x 1) 、目黃 x 3 (斤頭 x 3) 、黑沙 x 4 (斤頭x 2、磅頭 x 1、6両x 1)、火點沙立一堆，埋單十四、五斤

是咁的，話說經歷完 眾人皆中我櫃龜

※ 延伸閱讀 ※

眾人皆中我櫃龜

之後，龜氣重的我有感未能解到釣魚手痕之感，已經諗住同朗仔去維港釣下魚仔玩返日解下龜氣。咁啱佢同康哥、朗爸夾到期可以嚟個快閃，就問我加唔加入；既然原本約好左嘅釣期又因為颱風蘇拉而「吹走左」，咁梗係即刻答應，準備出發啦。不過今次釣行其實我就有一個目標嘅，就係搵大牛廣釣，事關呢期都有不少釣友釣維港時都中到牛廣，所以搞到我都好想挑戰一下；因此我就同朗仔研究定除左佢地用沙蝦仔之外，我就要買大海蝦做餌，而如果有南區出發，我又怕佢地舟車勞動可能會有折損，上網睇過資料就決定出北角街市買完蝦就在公眾碼頭落艇。而既然北角落艇就梗係釣埋北角碼頭一帶嘅放生魚熱點啦。計劃好哂，就等出發。

朝早坐車去到北角街市，就跟網上資訊去到所推介嘅店舖買蝦；雖然基圍蝦係平，但係易死，草蝦蝦少少但都係嫌佢養蝦唔夠活潑，最後揀左再貴啲嘅海棕蝦，買左一斤、問魚檔姊姊要左啲水，再整埋個氣泵打氣，就行出去北角公眾碼頭。點知行到出去碼頭附近，已經見到有圍欄寫住「因施工關係、碼頭暫時封閉」。我即時打個突，然後就往渡輪碼頭方向果面睇下有無其他位置可以落艇，一路行一路望，仲見到維港名艇家基哥在其中一個碼頭位對開作釣呢，但係我個心思都只係諗住搵個點可以落船，但係行到盡頭都係搵唔到任何可以落艇嘅地方。於是即時短訊朗仔，好彩佢都仲係買緊冰粒未黎到，咁同佢相量過後就決定約在炮台山那邊的公園落艇。咁我叫佢如果到先就喺對開海中心釣住先，我大約需要十至十五分鐘時間行過去。唔坐車係因為諗住我要喺北角碼頭再行出去電車路再坐車、落車再返出碼頭其實唔會比我沿海邊行快到幾多，所以我都係索性行過去就算。

十五分鐘之後，我就同朗仔康哥佢地會合左喇。咁由於已經嚟到炮台山，車返去北角係唔順路，咁我就決定今日暫且放棄釣北角，而先行釣下呢一帶對開海中心既位置，睇下會唔會有咩魚執到。第一個釣點好鞋，而且仲有高低位，真係睇少一陣試少一兩下底已經勾石；果然我一落餌，然後未有即時收起，跟住就已經勾石、並喪失了我今日第一隻生猛海蝦了。排口夠哂鞋，但無魚食餌，既然咁難呔，返左兩寨都無料我地又繼續前進去下一個釣點。明顯呢個排口都係有石，雖然無咁大舊石，但都係靚位，但奈何都係無魚食，所以返左一次寨之後我地又再準備移動。不過就係呢個時候我又覺得我隻蝦好似比生物攬住，不過個感覺又唔算好重，所以我都無同大家講話要拎撈箕，但係我就有思疑過可能係有墨魚攬住我隻蝦。咁一路收，收到就到水面，阿朗仔就已經準備開船，到我收到上水面真係見到有隻小墨魚我即刻叫阿康幫手撈，但阿康未有反應之時朗仔已經開左艇，就係咁樣我睇住隻墨魚係水面攬住隻蝦、沖住水咁樣撻下撻下但係死都唔願放手；然後呢個時候阿朗仔先聽到我嘅叫聲而停落黎而阿康又跟手就用撈箕仔將墨魚撈起，真係貪心使其致命喇。平時啲魷魚攬蝦通常上到水面附近就鬆口，要撈就要快手，但係呢隻墨魚寶寶就死攬到隻船開埋啲水花係咁將佢拋離水面幾下佢都唔放手，咁就注定你要乖乖進入生倉了。

撈完墨魚仔我地就繼續往下個在附近的釣點去，但係都係無口，於是就索性車過尖沙咀星光大道那邊作釣。可能車得比較近岸，而果度又多是遊客，有些遊客都對我地係度釣魚感到有趣。咁我地就梗係無理佢地嘅，照樣咁釣啦，可惜排口就感到有石位，但就真係無魚食餌；而且呢個時候水位有些漲，我地唔可以再車埋啲去到星光大道下方的柱位掃柱釣，只能在外圍掃底，所以食餌嘅概率我諗又再減低一些。釣多一陣都無口，我地決定返翻去有較信心食餌嘅地方，於是就繞繩，直接往上環信德一帶前進。

黎到「主場」，信心即刻加強，我就繼續大蝦侍候，其餘三人則繼續蝦仔。車左第一寨，竟然一口魚訊都無，但係無阻我地信心，事關呢度只要肯守，就會有出頭天；只不過我係有點意外車左成寨四個人唔好話上魚，係連魚訊都無。返寨再流，釣左幾分鐘，就見朗仔有動作，不過就唔係見佢抽魚而係佢一黎就係就魚嘅動作，就左幾手，又頂左兩手，跟住見佢收頂、收頂咁上，好不輕鬆，即係條魚已經投降，咁基本未見魚都已經估到佢係咩魚喇。果然，上水面見魚影，斤裝細鱗一條，我幫佢輕輕一兜魚就上來了！總算是個好開始，釣到十一點，終於見到第一條魚。好野唔好比佢停，快啲繼續釣，而呢度排口都夠大，所以我地都唔駛先返寨而係就咁繼續作釣。一路笑緊朗仔話條細鱗唔係釣而係下魚下返黎、一路繼續釣，唔夠五分鐘，就見到朗仔又比魚攻擊，今次個衝擊力仲勁，條魚都無比機會朗仔做準備動作就已經衝左埋黎搶手袋，只係見到朗仔勉強迎擊抵抗，但係條魚明顯同啱啱條細鱗唔係同一級別，朗仔只可以邊就魚邊開艇嘗試就魚；其實可做嘅都唔係太多，只係盡量比條魚游，希望佢可以游得耐游得攰從而慢慢收到佢返來，就可以好似上次激戰維港跑車歡送會咁樣釣到條魚啦。不過今次就無咁好彩啦，只見條魚玩玩下就衝左船船尾方向，朗仔只好叫康哥幫手將尾機調到去空波以免車葉打斷魚絲；跟住條魚就更加放肆，打個圈之後一個屈尾十就船艇底游去。比條魚埋得艇底耐啲多數都兇多吉少，所以朗仔都不顧得咁多即時著返尾機嘗試擺頭令條魚唔好喺艇底下面，可惜已經太遲，魚絲已經𠝹斷，就係咁樣，呢一回合嘅打怪獸失敗。睇住朗仔屠牛失敗，即刻講笑話點解條魚咁識揀，食朗仔嘅蝦仔幼繩都唔揀喺佢隔離等住屠牛、揸粗繩勾頭蝦嘅我呢，如果比我中到，基本上就唔會斷到魚啦咁。(但係呢個原來都係有劇本安排的．．．)

既然有怪獸，梗係返寨再釣，不過大家都係未有食餌；而其實一路釣時都有一個問題出現，就係因為我係勾頭蝦用較重鉛而朗仔佢地都係輕鉛，所以佢地魚絲都數會斜住往海底咁釣而我副繩就係垂直的；而由於流水是由朗仔艇尾流向我艇頭方向，所以佢魚絲好幾次都疊到我副繩，並且將我的大蝦都揈甩了；於是我只好就坐到較遠但又較高的艇頭那邊作釣。十一點幾，釣左一陣都係咁靜局，朗爸就拎啲野食出黎開始邊食邊釣。我見反正都無魚食餌，見朗爸食野食得幾開心，我都不如拎點野食出來吧，單手拎住副繩，單手拎住個麵包，背靠在艇頭的梯級，好不舒服的將麵包咬起來。殊不知當我咬到第二口時，我只感到有一下無比嘅衝擊力就咁將魚餌拉走，面對如斯光景，我竟然沒及作出任何反應，更遑論抽魚嘅動作，再加上艇邊較高身，我連舉手的動作也未能做到。就係咁樣，面對住我嘅朗仔就見到一個慘叫了一聲然之後就目瞪口呆的我了。呢一個打怪獸回合，我、未戰即敗。我亦都即時笑住咁講話幾分鐘前仲喺度講緊話咩如果朗仔條魚唔係食佢副繩而係食我副繩嘅話咁條魚就走唔甩啦咁樣，但係現實卻係，我連魚都未能抽到，認真失威，哈哈。

抽唔中魚就繼續釣，但係就算坐到艇頭，我發覺偶爾我副繩都會同朗仔條魚絲有交集，而因為我係勾頭蝦，所以好容易隻蝦就會易甩左。咁樣落去都唔係辦法，咁解決嘅方法就唯有係我同坐艇後面另一方嘅康哥調位，咁就唔會比其他釣友係艇尾流向艇頭方向嘅魚絲纏上。嘩，點知原來呢個都係劇本嘅一部份！點解咁講？就係我同康哥調左位大約幾分鐘嘅時間，阿康就有所動作然後就叫朗仔撈箕侍候，跟手就係一條磅頭細鱗上水了。真係有無咁搞笑啊？我一離開個位、阿康一接力就中魚，係咪劇本先喇。咁都仲不特止呢，隔左都唔夠五分鐘、都仲係車緊同一寨，阿康就又有抽魚動作，然後則又再叫阿朗仔幫手兜魚，跟住就係又一條磅頭細鱗上水！嘩，真係有無咁誇張呀？阿康坐左我原先個位都唔夠10分鐘就黎個細鱗梅開二度，難怪朗仔都笑我話我原先個位係壓住左啲細鱗，我一起身行開啲魚就出返哂嚟。我都笑笑口咁講話對唔住我錯，哈哈。但其實真係我又唔會覺得有咩可惜喎，事關我係釣緊頭蝦，咁大隻蝦啲磅頭細鱗根本就食唔入亦都唔會食埋嚟我度，所以而家佢地及時可以睇到阿康隻蝦仔食埋去又上到嚟，絕對係好事嚟呢；只不過真係咁啱遇著剛剛，我一起身、原本坐艇尾仲未開齋嘅阿康就二連發，故事有夠峰迴路轉咁啫。

不過釣完呢三條細鱗之後流水就開始減弱，然後就係一段時間都無魚食餌。朗仔就講話今朝認真失策，用左其中一段流水時間嚟去銅鑼灣果邊搵新排口試新寨；如果用果一頭半個鐘試位時間埋嚟釣，起碼都執多一兩口魚；不過呢啲都係劇本嚟，就正如我地朝早拎唔到嘅果兩口(相信係牛廣)，都係劇本。既然無咩流水，我地就繞繩車去西隧頂一帶作釣，不過釣左陣都發覺流水弱到連隻艇仔都推唔郁半點，釣左好幾分鐘我地嘅位置都無點樣郁過；喺今日無魚仔無石狗公食餌嘅情況之下仲要停哂流，真係可謂垃圾時間。其實今日都真係幾奇怪，釣到成十二點半一點，全艇人都可以一條石狗沙立都搵唔到；而家望下個生倉，只係得三條魚，但就係三條細鱗囉，都真係算係幾少有嘅情況呢。呢個時候今日無嚟嘅華仔就發短訊比我八卦一下今日釣況，我都只係比左朗仔張細鱗相佢同埋講話今日嘅釣況好奇怪，佢就問有無十斤魚，我就回覆佢話真是太樂觀了，而家係連三份之一都未有啊。

無魚食餌，咁都盡人事諗下辦法啦；望下天文台個潮水表，都仲有成個幾鐘、即係下晝兩點島先再開次行流，咁朗仔同康哥講就話不如去遠少少試吓一個火點位睇下搵唔搵到火點。康哥都即時話佢都有咁嘅諗法，於是大家就即刻繞繩艇西環方向車去啦。到位作釣，由於朗仔話呢個位基本只係得火點，咁我都換返副幼繩釣波子壓底沙蝦仔，睇下有無機會開返個靚齋。排口唔大、好快就過，第一寨就無食餌，然後返流，一落繩無耐朗仔就中魚，果然就係一條火點，我問朗仔呢個位係咪無其他魚，佢就話釣幾次都從來只係起過火點，咩石狗沙立釘仔都搵唔到，而釣呢啲火點嘅秘訣都係睇你隻蝦跌唔跌得中佢地身處嘅窿，所以揚多幾下餌，搏下隻蝦揚起完會跌落去啲火點面前咁就會中喎。不過返流返左兩次都無口，我地唯有就由車過少少另一個排口繼續掃火點。雖然魚都唔係幾開口，不過都比康哥執到條火點，今日睇個勢都係康哥有料到架啦，調左位果然唔同哂，哈哈。

雖然無乜口，但睇流水都仲有成半個鐘先開始行，唯有喺度磨多陣，跟住先離開呢度慢慢車返埋去中山公園果面再一路向東釣吧。無聊的時候就先食左嘢吧，唔係等陣有魚釣時又食緊野應接不下就麻煩了。磨下磨下都係無口，終於磨到兩點，同朗仔講話一於就車埋果欄一帶搵細鱗，呢個位我地之前試過起流時幾寨執到成五、六條細鱗，一於而家又去試下啦，反正今日都係無雜魚仔，淨係得細鱗火點吖嘛，呢個位睇黎可能有啲計仔喎；朗仔就笑笑口話咪咁多幻想啦，邊有咁多細鱗啊，返多一兩條火點先再諗啦。華仔得閒又短訊過來問釣況，我就話釣到呢個時候，生倉都係得五條魚，而且仲有兩個人(即我同朗爸)未開齋咁囉。但都真係幾得意架，釣蝦仔，釣到成兩點，生倉得五條魚；而邊個會估到係一條魚仔都無，而會係三條細鱗，兩條火點呢。但係不能解釋嘅事就係今日嘅劇本，好戲陸續有嚟．．．

埋到果欄開始作釣，釣著釣著，都開始感覺到流水有點起動，隻艇都會被水流慢慢推郁，我地嘅信心都開始加強，而我都期待緊開齋嘅時刻。但係今次有魚食餌嘅仍然未輪到我，只見調左位後坐我隔離嘅朗仔今次有哂聽繩動作，然後再一抽，中魚！跟住就要就魚同頂魚，睇個勢都絕對唔係火點啦，而且條魚識還拖，朗仔都估緊係乜魚，唔似今朝條細鱗咁玩到一半就已經投降，呢條魚一路玩都仲叫有力反抗，令到我地都疑惑緊會係乜魚，不過一切猜想都隨住條魚見光而打破哂，因為又係一條細鱗！至於佢都叫段段有嘅原因就係佢都有成兩斤！即時我同朗仔都已經笑左出聲，乜料子又係一條細鱗，搵條魚仔都搵唔到，但係細鱗就已經執到第四條？我再笑佢話一早都講左呢個位係埋黎「搭火車頭」架啦，係要講話釣火點，又話我多幻想，而家咪執條細鱗囉，仲要係暫時最大條嘅添，真係笑死我。

見到又一條細鱗，大家鬥志更加旺盛，心諗終於等到流水又開始來了，接下來分分鐘食埋黎嘅就係到自己了。釣左一陣，今次中魚嘅又係阿康，只叫佢輕輕鬆鬆咁樣抽一下魚然後就收魚，朗仔同我都話「今次終於有魚仔啦」、「會唔會係沙立呢」，點知上到水，又係一條火點。說好的魚毛呢？真係笑死。就係我傻下傻下咁估緊下一條魚會係朗仔定今日好釣得既阿康中到時，一下好清脆嘅食餌感覺從魚絲傳遞到去我手上，我聽阿朗仔講話忍一忍手等佢再食多下跟手一逗，中魚！都有少少反抗喎，即時諗緊既然今日無沙立，咁都好大機會喺火點啦吧；果然一手一手咁收，上到水的係一條良型火點。好嘢，釣到兩點半，我都終於開齋了。釣到呢度，生倉8條魚，4條細鱗，4條火點，連阿朗仔都話好似抽獎咁，唔係細鱗就係火點咁樣，認真有趣。

返流再釣，今次抽到獎嘅係康哥，見阿康哥輕鬆收繩上魚，朗仔已經話咁即係火點啦，好啦唔幫你撈啦，自己搞掂啦。果然又係一條良型火點，康哥好嘢！順住個流繼續釣，水流亦都繼續慢慢加速，搖下搖下，我忽然就感覺到有一下食餌，即時一抽，但又好似勾左石咁，跟住我嘗試拉繩離地，扯多兩扯，條繩又鬆返出來咁，但係同時我又感覺到有魚走水喎，於是收魚啦；啊，條魚明顯比剛才條火點大，收多兩收，幾近肯定又係細鱗；果然收到上水，又多一條磅頭細鱗入倉！釣到呢個時刻，生倉10條魚，有誰人又可以估到會係5條細鱗，5條火點，一條其他魚甚至乎魚毛都無，真係不能解釋，讓人嘖嘖稱奇。釣到嚟呢時候，我同朗仔都講笑住話睇黎呢個係劇本；所以今朝早細鱗就上到嚟，但係果兩口牛廣就一口都拎唔到，原來就係為左跟住個劇本嘅設定走，係一早設計好嘅。

既然有魚，就繼續順流釣，好快又到朗仔有魚，佢一中就話魚仔黎，接今日走勢應該似係火點嚟，點知收到上黎，竟然係一條五、六両嘅小細鱗，真係完全估你唔到！而就係笑緊朗仔條估你唔到細鱗時，忽然我就感覺到一下搶手袋，然後我就係條件反射式嘅舉手頂魚動作；嘩，呢條魚比起頭先條磅頭細鱗，都唔在同一個級數喎，雖然我都可以一手一手咁收，但係條魚都叫段段有力，偶爾都仲想反抗爆返落去，不過始終體型有限，所以都係乖乖的慢慢就範；係今日咁嘅釣況劇本，我地都估係細鱗啦，點知就上到水面勉強見到魚影時，幫我撈魚嘅朗爸就話似係白鬚公，而收多兩手見到哂條魚時，則原來是一條斤裝牛廣！嘩，我今日嘅目標魚呀！嘩，係我地今日艇除左細鱗火點以外嘅第三款魚呀！終於喺第十二條魚時搵到喇。咦，終於打破左僵局啦，咁即係其他魚種係咪會陸續有嚟喇？

釣維港真係好睇流水，釣到頭先2點幾我都仲未開齋，但係當開始行返流時，短短一小時之內我都已經有三水魚食埋來呢，所以黎緊呢兩小時希望繼續可以有魚食埋黎同埋好好把握喇。我地隻艇一路都係慢慢咁由中山向東車，見一路都有啲魚釣到咁於是都無返寨，咁釣下釣下就去到黑沙泡位，釣左一陣，阿康首先起手，佢一路收魚一路話係魚仔黎唔大條，咁我同朗仔都係度估話咁係沙立啦掛？點知上到黎，一條小黑沙出現咗係我地嘅面前！我同朗仔都笑到停唔口，除左又有是日新魚種同是日嘅一條鯛魚之外，個天仲繼續都係唔比我地搵到沙立同石狗呢兩款魚，真係好有趣呀個劇本。不過呢個位叫得黑沙泡位，都應該真係幾聚鱲魚嘅；而釣釣下見到朗仔起手抽魚，今次佢唸唸有詞咁講話係沙立啦掛，點睇都似係沙立喎，唔係其他魚啦吧；佢一路收一路更有信心咁話係沙立，而果然，是日第一條小沙立終於上水了。朗仔都係度興奮緊話一到排就終於搵到是日第一口沙立時，句嘢都未講完，前面嘅阿康就抽左一下魚然後笑笑口話要撈箕，朗仔就話幫緊你幫緊你，但唔好比條火點我呀，唔幫你撈架。收多兩手，見到魚影，阿朗一兜上黎，斤裝黑沙一條！嘩，黑沙梅開二度呀，朗仔即時叫阿康做鯛神，哈哈。一邊幫阿康影相，一邊講笑話艇尾船長位一直封印左佢嘅小宇宙，坐返出來即刻大解放、起勢中。一邊笑聲滿滿，一邊繼續釣，相隔都唔知有無十分鐘，又係阿康扯魚；見係阿康中魚，朗仔就問佢呢條又駛唔駛撈箕呀，然後阿康又話「要呀、唔該」，跟住一手一手咁收，然後朗仔見魚影一邊兜，一邊大叫鯛兄鯛兄，又一條斤裝黑沙上水，完成三連霸！又係大黑沙，認真神奇，我都諗唔到仲有咩可以講，只好加入朗仔齊聲叫了康哥一聲「鯛兄」有料，哈哈哈。話時話，自從我條牛廣仔突破左細鱗火點陣而其他魚種都陸續開始加入之後，細鱗就好似退居幕後咁樣未有出現。

既然流水啱又有魚食餌，咁我地都唔駛點樣咩返寨，一於就順住堆魚釣，釣到無口先再睇下返寨定車去另一個排口吧。睇黎呢浸流水真係好刺激到啲魚嘅食慾，釣多一陣，今次又到我又食餌，而且又係搶手袋式食餌，所以我都即時逗住條魚絲頂左幾手，然後就開始一手一手慢慢咁收；都係果句啦，雖然條魚交足貨仔地負隅頑抗，但奈何佢就體型有限，再加上我都揸緊4號繩，所以佢都係比我收伏得貼貼伏伏；朗仔見我咁樣收繩法，都諗住條魚似係細鱗，不過條魚上到黎，則又令佢有點意外，因為又係一條斤裝牛廣呢！就係咁樣，我都嚟個牛廣仔梅開二度。

釣到呢度，其實仲有一位釣友仲努力緊、尋求開齋嘅機會，無辦法，今日康哥氣勢太過強大，所以光芒有點蓋住佢旁邊嘅朗爸，所以朗爸釣到成四點都仍未開齋。不過朗爸心態好，沒有放棄亦沒有抱怨，而且仍舊勤力地不停揚餌和試底，所以上天都係唔會對佢咁差嘅，最多都係同佢開左個玩笑咁樣。只要你肯保持積極，啲魚始終會有所回應的，因此接下來終於有魚食餌食落去朗爸度了，而朗爸亦都金精火眼，一食、一抽、一中，然後一手一手咁收，終於條魚上水了，是一條接近磅頭的火點呢！而我即刻表示讚好之餘，亦都話我都係火點開齋的，之後就會有其他更大嘅魚食埋來的了，總之就係魚兒陸續有來啦。

不過未有魚找上朗爸時，今日釣贏哂嘅阿康又有魚食餌啦，只見佢輕輕鬆鬆咁樣，又收服一條大火點。然後就係朗仔笑緊話今日阿康個位要貼返個「康」字以作阿康專用位時，朗仔都有魚食餌，然後好快咁就又有一條小沙立出現在眼前了。跟住我地都笑笑口話今日好有趣，朗仔就專釣沙立，康哥就黑沙，而我就係牛廣，其他人暫時都未有中到他人的「專屬魚」。過左幾分鐘就輪到我有魚食餌，一抽一中，我都估條魚會係沙立架啦，不過朗仔就笑話沙立係佢嘅，可能我中嘅會係火點呢，不過我就即時彈左條小沙立上水，再加多句話「好彩，我都識釣你啲魚，我都有紅色嘅鯛魚」，哈哈。再釣多一陣，今次就輪返到朗爸有魚食餌了，佢抽完之後都有一手一手咁收，即係都有小小份量嘅，果然條魚一上水，又係一條磅頭黑沙！睇黎而家真係起哂流，啲魚開哂口，都係十零分鐘嘅事，我地四個人剛好就輪住一人中一口魚喇。

魚肯開口起上黎，真係點釣都有得中，就係朗爸解完條黑沙，係度拎隻沙蝦仔勾緊之際，跟手已經見到阿康中魚，而就喺我聽到聲望過去之時，我亦同時感覺到一下搶手袋式食餌，於是我一抽魚而又感覺到條魚爆我之後都加左句話我都中魚喎，影緊我地中魚嘅阿朗即時都兩頭望，又望下康，又康下我，都唔知影邊個好；都係阿康淡定話叫佢影我就得，佢果條只係魚仔，我果條點睇都大過佢果條喎，於是朗仔就「離棄」康哥，將鏡頭對住我，並叫朗爸幫我手準備兜魚；喺我一手一手慢慢收魚之時，阿康條沙立仔已經飛左上艇，而我果條魚亦都好快就上埋來，喂，又係一條斤裝牛廣仔！就係咁樣，我都繼阿康之後，來返一個「專屬魚」三連霸。

其實我地一路順住流釣，都差唔多已經流到去上環消防局對開了，不過我地都諗住釣埋呢度先至再返流或者車前去信德。未幾，朗仔就起左一條良型沙立上黎，然後無耐又中多一條良型火點。跟住大家就靜左落黎有成五分幾鐘都無人有魚訊。如果換做是今天早上的時候，五分鐘無魚食餌根本不算什麼，但係而家正是行流時間，再加上我地剩餘嘅作釣時間不多，光陰寶貴，朗仔諗左一諗覺得以水流計，剛來一路食餌嘅魚群會似係往西，於是我地就車返去西隧頂一帶搵魚了。雖然魚訊唔似剛才咁強勁旺盛，但係等左幾分鐘我地都有魚訊出現，只見朗爸輕輕鬆鬆就上多一條火點。等左又過幾分鐘，今次又到釣贏全部人嘅康哥有食餌啦，而佢都輕輕鬆鬆、不負所托咁，將一條良型火點納入艇中。

望下隻錶，其實都已經五點十分，不過今日呢個下半場實在太好玩，太過反轉，所以我地都決定加少少時。而我見所剩時間無多，我地生倉都唔少魚，所以決定換架生，轉返揸粗繩、勾頭蝦，睇下會唔會有返一條似樣嘅撈箕魚食埋嚟。朗仔見反正所剩時間無多，知我想要搏粗野，一於就車返去今朝上環斷魚嘅位置一帶比我放手一搏啦。咁當然，用棕蝦做餌嘅，仍然只係我，而佢地都繼續係沙蝦仔做餌搵其他魚。

釣左幾分鐘，首先有魚食餌嘅就係朗仔，見到佢一抽魚之後即時要就魚，都幾近肯定就係牛廣啦，不過睇個勢就絕對唔係今朝果條怪獸級別嘅，但係又會比我所釣到果幾條斤裝嘅大啲咁囉；見佢再玩左幾手，跟手條繩一空，魚就甩左跑掉了；無辦法，佢只係揸副五磅魚絲，無得好似我咁同條魚硬隊，甩左都係無可奈何嘅事，反正有得爽左幾下都唔太差了。其實就無咩所謂嘅，但當然我都笑下佢話佢今日佢敗魚係「始於牛廣(斷)、終於牛廣(甩)」，不過亦都同佢講話呢啲都係劇本一早寫好左嘅嘢，所以絕對唔算係咩遺憾。反正除左牛廣之外，今日佢嘅食餌、要攞到嘅魚都全部攞到哂呢。

但係同佢講完呢返說話都唔夠五分鐘，呢個時候我只係忽然感覺到一下炸烈式嘅搶手袋食餌，而由於真係太過突然而且勢頭強大，我都未有反應得來可以舉手頂魚，更遑論有抽魚動作。我只能做的，就係勉強捉返副繩，繼而用另一隻手都揸埋落副繩度，希望可以剎得住條魚那怕一秒，然後再搵機會捉緊條繩從而頂魚來個大反擊。但係條魚嘅爆炸力同衝擊力實在太快，係我個腦仲啱啱出現緊剛才所講嘅畫面同諗住有所行動時，魚絲卻在我能揸緊佢之前鬆左一下，而就係咁樣，條魚就甩左了，因為所有嘢都來得太快，我係根本無抽過魚、而令到魚勾可以打實條魚。所以只係有一下嘅虛絲，條魚就搵到空位令魚勾鬆開了。就係咁樣，我都繼朗仔之後，「始於牛廣(抽空)、終於牛廣(完敗)」，哈哈。當然，我係沒有氣餒嘅，不過就有點懊惱自己竟然沒有好好把握得住呢個好機會。不過唔理啦，時間無多，即時一邊繼續懊惱，一邊勾多隻棕蝦落去繼續搵魚，希望覆桌。但係之後我地都再沒有呢種強力嘅突襲式食餌出現啦，反而最後有魚訊嘅係朗爸，而佢亦都把握得到，收左一條火點上黎作為我地今日釣行嘅埋齋魚。佢亦都講話，「啊今日隻艇釣咁少魚種，我原來釣下釣下都釣到三款喎」。數一數，係喎，今日出現在我地艇嘅魚種就只有威足上半場嘅細鱗，全日數量最多嘅火點，我地只能夠拎到細而攞唔到大嘅牛廣，康哥三連霸嘅黑沙，同埋今日笑笑口搵左成日大半日先至出現第一條嘅沙立，總共五款魚。真係釣咁耐維港，都好少可釣到成十零斤魚都釣得咁少魚種。所以我同朗仔先話今日個釣況係好奇妙，不能解釋，彷彿一切都係劇本寫好。咁都係啊，由我今朝上船係北角遇到碼頭封閉不能落艇而要走去炮台山落艇都已經夠哂故事性啦，難怪朗仔都話雖然成日釣維港，但今日呢個釣行絕對有趣，亦都係一次難忘嘅回憶。

咁又真呀，有幾可釣足全日，一條魚仔都無，條條都叫做可以上下碟咁呢，以玩味黎講就絕對夠哂，如果要煲魚湯，就唯有塞哂啲沙立落去煲囉。講到呢度，真係唔能夠唔講下出發之前果晚我同朗仔講起話我同屋企人講話出海釣魚，阿媽就話叫我拎些魚仔返去煲湯。咁我係揸大餌的，所以魚仔就要靠朗仔啦，朗仔亦都話無問題，釣到咩石狗公、沙立等細魚都比哂我拎去煲湯，佢自己搵到兩條黑沙就夠了。結果我地今日全日石狗都真係可以一條都無，沙立都只係寥寥可數，所以好似有些事情冥冥之中係有所關連、自有主宰呢。

好喇，劇本嘅玩笑就講到呢度，至於講返今日釣魚最深刻嘅，就絕對係果兩口錯失左嘅大牛廣。唔係話咩走魚斷魚永遠都係最令人記住之流嘅說話，而係今日首先我就真係得果兩口大魚食餌，第一口未來得反應而錯失掉都只能說是遺憾同埋自己反應唔切；但係第二口嘅完敗，真係首先令我感受到牛廣嘅超級爆炸力之餘，其次亦令我檢討左自己對釣呢類魚時嘅戒備不足同埋提醒自己下次再有同類爆烈式食餌時先萬要提醒自己即時舉手頂魚並嘗試用另一隻手立即幫忙揸實副繩做到抽魚同頂魚嘅動作；希望下一次我再遇到大牛廣時，到最後我係可以好似朗仔 激戰維港跑車歡送會

※ 延伸閱讀 ※

激戰維港跑車歡送會