狂飆法拉利去食歡送飯

狂飆法拉利去食歡送飯

日期: 09/19/2023

農曆: 八月初五
地點: 維港東面一帶
艇家: 朗仔自駕
釣友: 朗仔、阿康、華仔、YY
天氣: 天晴、微風2級
水流: 中速流、水質一般
釣穫: 紅色跑車 x 1

是咁的，話說上星期同華仔去完 尋點覓埋青斑鱗 之後，講起朗仔就黎又要返外國開學，所以同佢就研究喺朗仔飛之前搞返個釣魚加食飯歡送會；但係我地就想試下睇下搵唔搵到條大魚嚟留念之餘仲順便「荼毒」朗仔守大餌釣大魚，所以我地就諗下有咩釣點可以試下。咁啱我喺阿濤個釣友群入面有資深筲箕灣釣友分享佢同朋友釣夜水嘅魚獲照，又紅鮪又黑沙又石蚌仲有啲斤頭斑，咁我同華仔講起話不如可以試下近近地嚟個維港東夜水喎，無魚咪釣夜啲，有魚就早少少收工拎埋條魚同啲蝦去食個宵夜；嘩，諗起都覺得完美，即時問阿朗仔有無邊日夜晚係可以同我地去玩一次，咁佢就搵到一晚比我地話就係得呢一晚可以，其餘既晚上都已經有約。咁就得啦，有左時間，其餘既問題就由我同華仔研究。釣點其實我地都係諗住近近地筲箕灣、鯉魚門，至柴灣一帶，但係路線圖就要再諗，咁既然阿濤釣友咁啱分享開佢嘅釣況，咁梗係做埋功課睇下人地釣邊度、參考一下。研究完基本就有哂路線圖，一切皆準備好，就係睇有無得開花結果。

本身就以為得我地3個釣，不過原來我地釣夜水呢日朗仔其實日頭都出去同埋阿康釣日水魚仔團，咁阿康見我地近近地玩巨物，佢都想體驗一下，咁當然好啦，順便可以有機會毒多一個人「入坑」。約左佢地6點前去筲箕灣碼頭等，我同華仔就去買大蝦、啤酒同埋小食。去到街市，我地本身就諗住就咁買啲細嘅中蝦嘅，跟住華仔就話反正陣間釣完魚會食飯，不如再買啲大隻啲嘅，拎黎搵巨物，搵唔到大魚就我地拎去食飯，大隻啲食得開心啲。一於咁話、大細棕蝦各買一斤。跟手再買打啤酒同燒味，就出碼頭同朗仔佢地會合了。

落到艇朗仔問我地釣邊度，我睇下個天文台潮汐資訊，見到是日轉流時間是大約下晝5點半，而家6點未夠咁換言之即係流水會係幾慢，咁就啱啦，即時叫佢車去鯉魚門阿濤釣大紅鮋嘅沉船排試釣。呢個位算係維港其中一個最深水嘅地方，而且有流水時基本係無乜可能釣到呢個點，所以呢個位唔係一整天都會有艇可以釣到，有魚聚係度就自然大機會啲；而家既然都叫做轉流後十幾二十分鐘，應該都仲未開始行流，可以試下釣一陣，一個唔覺意，分分鐘一條大紅鮪食埋嚟咁我地就可以提早收工食飯去。既然釣得呢個位，我就梗係揀隻大棕蝦做餌，話哂下面有粗嘢嘅機率都比較高，梗係有大餌就勾大餌啦。朗仔都特登揀左隻最大隻嘅棕蝦，佢話感覺到下已經有條粗嘢等緊佢喎；至於華仔就未有落繩，佢話呢個釣點成四十米水深，一上一落繩好辛苦喎，不如食支煙仔當讓賽喎，反正呢度深水位都係釣一陣就釣唔到，到時埋去駁邊佢先加入戰團。落繩釣得幾分鐘就又要準備收繩返賽，都真係幾攰，而呢個時候又有隻拖船駛過，我地唯有車去航道執邊等佢慢慢車，過哂先再返釣點，等落得繩黎，又唔見左幾分鐘；要知道平時釣少幾分鐘都真係無乜所謂，但而家釣少一秒就係一秒，因為同我地剛才約十分鐘前剛剛落繩時，流速已經明顯有所提升，朗仔都要趁住收繩再返寨時換過粒較重嘅鉛呢。不過釣多一陣，魚食餌就無啦，勾底就反而我同朗仔都中左，真係即時感嘆蝕左兩隻大海蝦比佢。車多一寨都無口，見流水都再快左，於是我地就決定繞繩車返去埋筲箕灣避風塘斷駁掃寨。

我地首先就掃駁尾近西駁口一帶，能夠感受到釣出少少去到十二、三米水深和入少少約7、8米水深的流速是有差距的，而我們也大約就釣9至十米水深的慢慢掃。我為了希望能快些有魚食餌，甚至開多支魚竿架在炮架上、再設置到魚餌大約離海底一噚左右，而自己則再釣多一副手繩。可惜是平時也沒怎麼試過這個操作，再加上這裡的海床底高低凹凸差距不少，所以我魚竿那個釣組很快就勾地了；然後扯繩時則是由那個駁繩結位斷掉了，一來對不熟綁結的我重新綁結挺費時吃力，二來我覺得這個流水情況加釣場我是一人不能兼顧兩副繩，所以就決定把魚竿撤了，專心釣返一副手繩就算了。掃左兩三寨都見無乜動靜，我地就決定車去東駁口那邊試吓。

來到駁頭、落餌位大約八至九米，水流又比西駁口那邊好像細一點。埋到駁邊，我同華仔都諗住有機會喺會有些斤裝魚食餌，所以都揀細棕蝦做餌，我地同阿朗仔講話有機會有啲較細嘅撈箕魚、不如用細隻少少蝦時，朗仔就話繼續用大蝦搵大魚，細嘅留比我地搵。沿寨釣左幾分鐘，呢個時候華仔話好似魚絲有被拉扯感覺，然後阿康就話係佢收緊繩、應該係疊左佢繩，所以華仔就不以為意，點知華仔收繩上來睇時，隻蝦就被剪剩蝦頭部份，即係剛來阿康副繩疊住佢副繩時、其實真係有魚食餌，如果佢當時在放多少少比條魚食，咁可能條魚就會食深啲而有機會抽魚了。不過釣魚就無得如果啦，唔到釣就唔到釣，一於落餌再砌。華仔就叫朗仔車返前隻艇、由流頭慢慢壓埋去頭先條魚食餌個位度，睇下條魚會唔會貪心仔再食多次餌。而佢亦都同朗仔講話「喂，有啲細型古惑撈箕魚食餌喎，換隻細啲嘅蝦同埋勾落黎一齊釣走條魚啦」，不過朗仔就話，既然你氣場咁強，要釣贏你就要諗方法，同你硬對硬、用一樣釣組同釣餌咪會輸比你；咁我不如試下用大餌睇下會唔會有驚喜，無食餌係正常嘅，有食餌贏嘅就係我，咁我繼續揸大蝦，食飯魚就靠你地喇。我就加句話係呀，你隻蝦咁大隻，食得埋黎的話，班就至少三斤，紅鮋果啲魚就都四、五斤幾跳架啦。細條啲兩三斤魚就交比我地啦。

車到駁口頭落繩，呢度再淺水左啲，得七米，而且水流仲無咁急添，幾好釣咁。正當我係度幻想緊啲斤頭石蚌同紅鮋食埋我隻細棕蝦時，我望到對住我嘅朗仔手扯左副繩一下，好似疑惑緊係咪勾地，跟住下一秒就已經見到佢即時舉手頂魚，然後再慢慢起身再出埋兩個手肘去頂住條魚，喺果一刻其他人先至意識到朗仔中左巨物！朗仔開了雙踭頂魚時，我就問朗仔開了攝錄機拍攝沒有，佢話無，因為根本無時間有多餘嘅手可以按到制就已經全力在頂魚！跟住見佢慢慢起身再開著兩肘慢慢收魚時，就知道情況緩和左，條魚應該可以收服得到，我即時去拎撈箕在旁準備，只等條魚影出現；收頂多兩手就見到粒陀到水面，我就叫朗仔順個勢準備帶個魚頭向我呢面個方向，然後兩秒之後見到一個黑色巨影出現，都未望清楚係乜魚我下一秒嘅記憶就係我一頭兜左條魚然後撈箕頭比朗仔一托上黎，跟住一條粗碌無比嘅紅鮋就上左艇了！嘩，全部人即時極度興奮，我仲同朗仔來左個激掌，初步目測條魚有成六斤。我話嘩，淨係個魚頭都差唔多成斤重呀！眾人都好似仲沉醉緊喺呢個不可思議嘅氣氛當中，對眼前呢一刻嘅景象都覺得難以置信。咁又係呀，我地一心都係諗住今晚就算有食餌都可能兩三斤，朗仔隻中蝦中到嘅咪可能四、五斤魚囉，但係眼前呢條紅魔鬼，目測都起碼六斤幾，認真誇魚。朗仔更加話佢第一次釣到紅鮋，估唔到就係咁大條，可以話係佢嘅紀錄魚。講緊嘅唔係淨係紅鮋嘅紀錄魚，而係佢釣港水咁耐以來嘅紀錄魚呢。

中完大魚，大家即時無哂搵魚食飯嘅壓力，但係就一心諗住既然有魚食餌、啱哂流水，梗係落餌再砌睇下搵唔搵到多條魚啦，咁我同華仔、康哥都係繼續細棕蝦，而朗仔則話佢都收夠籌，釣到多條細撈箕魚對佢都無意思，一於繼續守大蝦。咁我同華仔梗係祝佢好運睇下釣完紅鮋可唔可以搵到大斑啦。即時返寨再釣，慢慢向後流，無就再返寨。返到第二寨時，釣釣下我就聽見華仔啊一聲，然後佢收返繩上黎就無左隻蝦了。佢話呢口食餌無慢慢拉而係一口就扯，不過唔到釣佢亦都無抽魚動作，就係咁樣就比條魚偷左隻蝦了。見到有魚食餌，我地就喺果一帶再掃，不過之後都無食餌。我地就繼續往後面掃駁了，但係感覺個地都無前面咁鞋口，於是釣左寨我地就返去駁頭再試，諗住掃多陣無食餌就繞繩過杏花村、柴灣果面試下。

掃埋果寨都係無動靜，我地就車去杏花村對出一帶作釣，呢面流水相對筲箕灣駁果面就靜得多，而且石口都無咁參差，似係碎沙石底再加偶爾一兩舊石，釣左一陣我地就提議不如過柴灣貨倉出面駁位，事關杏花村我地釣嘅果堆位都好似比較適合波子壓底蝦仔多過釣頭蝦，對於今晚時間有限嘅我地，都係唔好喺果度浪費時間，過黎柴灣駁口釣返啲高低石可能較容易會再驚喜。

望下個鐘都九點幾，一於打去問食飯間鋪頭收幾點，佢地話收十二點，咁計返時間我地就諗住釣到十點收工，換言之即係得返唔夠一個鐘釣。我地先掃駁口向外一帶，掃左一陣都係無口，一於就試下防波堤向內，即貨物裝卸灣的出口一帶。我就繼續守細棕蝦，朗仔就當時係揸大蝦，而華仔同阿康就轉用今朝釣剩僅餘幾隻嘅沙蝦仔做餌，睇下會唔會有啲磅頭魚玩下。點知最後就比阿康中條梳蘿魚，然後我地釣多陣見時間都差唔多就決定收工。即時係度同條紅鮋瘋狂打卡，有條梳蘿魚喺度嘅好處就係可以用佢嚟同條紅鮋做對比。無對比無相害，真係有哂比例眕落條魚就特別巨。咁打卡影相時就梗係順便秤魚，大家估下條魚有幾重？(下面睇相先再開估)，打完卡就同條魚放血，然後就執野收工、車艇埋將軍澳上岸食慶功歡送飯去。

最後條魚我地四個人就梗係食唔駛啦，咁一於就打包返屋。而朗仔話今次係佢第一次食魚都已經感覺食到飽，真係誇張咁話喎。而我同華仔就真係好開心，可以實現到出發前計劃嘅比朗仔中到大魚令佢體驗到粗繩、大餌、中怪獸嘅感覺、同佢以往玩幼繩就魚係完全兩回事。亦都高興佢可以釣到破紀錄魚，我地都笑笑口話朗仔中完呢條魚，可以令佢今次返到外國讀書呢一年不斷回味、認真無憾。希望朗仔下次返黎香港時，又再同我地揸粗繩、勾大餌、釣大魚、豐富佢本「漁童日記」啦。

狂飆法拉利去食歡送飯
魚餌示意圖：大細棕蝦各一斤