歡樂滿載白石大海

日期: 09/16/2017
農曆: 七月廿六
地點: 維港白石對開大海
艇家: B記
釣友: 大表妹、細表妹、饞嘴力高x2、YY
天氣: 天晴酷熱、微風
水流: 慢流、水質不俗
釣穫: 沙立 x1 (斤頭)、黑沙 x1 (6兩x1)，瓜衫、什魚一堆埋單7、8斤

是咁的，今次釣行可謂期待已久啦。因為個釣行出發日子真係一推再推，事關呢幾個月都係颱風季節，所以明明難得大家約好左期，卻又因為打風既關係改左兩次了。前幾日睇天文台同埋天氣圖，本來諗住又有可能取消喇，但係到最後，兩個颱風「泰利」同「杜蘇芮」都採取左遠離香港既路徑，一個往台灣走、另一個則往越南去，所以夾在中間的香港不但沒事，更因為咁樣而令原本打算會落下雨吹下風既的天氣，變為天晴酷熱，真係完全想像唔到呀！

就係咁樣到左出發前兩日我地睇住天文台既預測終於決定起行啦，咁架生就唔駛準備架啦，因為我係之前打算出發既日子既時候已經準備好哂，我唯一要準備既，就係魚餌喇，因為野食方面，梗係交比伙食團長力高預備啦！係食呢方面，「佢至係權威」，哈哈。咁出發前一般我都會發短訊問 B記最近期釣況，一來可以知道有咩魚艇釣下可以幻想下之外，最重要既就係可以幫助我計算買魚餌既份量。咁今次問佢，竟然唔係好似上次咁話得一些石狗什魚釣下，同我講話出到白石的話都有些沙立、惑魚、細鱗釣下，叫我準備埋蝦仁；平時我都已經會準備架啦，今次收到咁既情報，梗係再買定多些打底啦！於是前一曰走去街市睇，但係就無平時用開既赤米蝦，不過都有唔少黃蝦仔、紅蝦同埋中蝦，於是各買一些回家，立即剝殼，然之後當然又係加工，秘製醃染成得食蝦仁啦！

好喇，終於出發啦，果然天氣炎熱。大家碼頭集合左左之後就上艇啦。今日我地早左些少出發，因為之前一晚 B記打黎話想早少少收工，因為佢母親大人擺大壽佢要去飲喎；咁樣梗係無問題啦，即使我地唔早早少少出發，都可以提早收工啦；母親大人慶生喎，梗係要重視啦！不過我地上艇果陣就開玩笑咁講，B記今日你早點釣到撈簊魚，又或者我地有人釣到魚啦，咁咪可以早收工囉；釣得愈多，更可以愈早收工添呢。當然都係講笑啦，但係講笑之餘，都又真係我地既心聲黎架，就係「一係釣得多，一係大大條」咁囉。

上艇之時，已經確認左各團友除左從不暈船既大表妹之外都 (當然仲有我係堅持盡量唔啪)已經啪左一粒暈浪丸了，所以諗住應該都無問題了。問題就在於原來大家啪既都係「幸福浪途適」而唔係平時我比開大家食既日本白兔仔，以致之後唔同人都有唔同程度既暈船咁囉。一路車去白石我都係不停地綁架生，因為基本上都係我一個人負責哂眾人既架生，終於好不容易黎到釣點之時我亦終於將眾人既架生同埋自己既兵器都準備好哂啦。

不過出到黎白石開外又唔同係維港裡面，雖然天氣極晴，但畢竟前一兩日鄰近地方先有颱風掠過，所以難免仲有會湧浪吹到，所以到達釣點白石時，原來阿細表妹竟然已經暈眩得面色都蒼白了。不過相信佢本身就係呢排身體唔多舒服先會咁樣，因為上次老表歡聚樂悠遊 https://yy08.pixnet.net/blog/post/106144873 佢都試過喺釣魚之前一晚行完夜山再黎釣足一日都面不改容呢。咁佢就唯有抖下先再作戰啦，但係其他人就正式就位開工啦，而我，則先為大家將蝦仁釣餌溶雪。到我終於可以埋位拎起支竿時，阿B記已經係入面掟左條魚出黎，嘩，良型瓜衫一條！係阿丹渴求釣到既瓜衫呀！跟住就到力高細佬話好似有魚食餌啦，但係佢既魚絲同阿B記疊埋，所以結果係當B記收線上黎時勾埋佢條魚絲同埋魚上黎呢。喂，又係瓜衫一條喎！真係不得了呢。跟住到大表妹話好似中魚但又唔知係咪喎，收左線上黎睇下咩環境先啦梗係，原來係微型瓜衫一條，但係呢度成一百尺水深，所以佢已經中哂壓，想放生都放唔生了，所以只能無奈將佢放落生倉呢。跟住B記過左無耐又抽多一條瓜衫上黎，絕對製造左一個今日會爆釣無限既景象出黎！B記見到有幾條瓜衫壓倉，於是就同我講話「如果阿丹係度就好啦，佢咁鍾意瓜衫。其實呢期都保持住釣到這些良型瓜衫，我都好想影相傳給你們看的，但係又怕到你地黎釣既時候釣唔到咁咪大鑊? 所以最後我都放棄左呢個念頭啦。而家今日釣到喇，你記住發照片比阿丹睇啦喎」，真係同我地一樣，只要一見到瓜衫就立即聯想到阿丹呢！哈哈哈。

呢個時候，細表妹仲未回魂，仍然坐左係出面回緊血，但係坐係艇內既細佬，呢個時候都停哂手，話需要稍作休息喎，睇黎佢都係暈暈地船架啦，畢竟今次只係佢第一次落艇釣魚呢。所以咪話囉，魚釣人係無錯架，第一次落艇釣魚，反而係開齋既果一位，所以好波不如好運永遠都係至理名言黎。講左咁耐，都未提到我自己，鬼咩，連同坐係出面既力高，我地都竟然未有魚訊；而好喇到我終於等到一口魚訊一抽之後就成組架生都無哂(即係比雞泡剪左囉)，真係無奈到一個點呢 ...

返左寨無耐，阿大表妹又話應該中左魚，雖然感覺唔到食餌，但係揚絲時卻覺得有點重量，於是收線上黎，喂喂喂，又係良型瓜衫一條呢！真係諗住今日係會瓜衫爆不停，但點知阿大表妹之後卻 ... 跟住B記都有釣返一兩條沙立仔，但係其他人就得個望字，當然，仲有人係繼續休養緊、回緊血啦... 望下個鐘，都成十點幾十一點，我都仲未開到齋；唉，而家釣魚既我已經真係再無信心可以好似以前咁大大聲同人講魚仔殺手係我啦。不過其實整體黎除左剛到時果浸流比較開口時，之後都比較疏口，B記話可能同浸底流亂亂地有關，所以佢決定繞繩再車遠少少去白石開外大海位試下運氣。

咁又唔錯，起碼到位無耐坐我隔離既力高終於都開齋了，雖然只係小梳蘿一條，但係都算係好開始丫。而就係咁，我就成為左在座咁多位釣緊魚而又唯一未開齋既人士喇。好在，都唔駛等得太耐，總算都比我有今日既第二口魚訊啦，咁我輕輕一逗，收絲，扯旗立仔一條，終於總算都叫開左齋喇。而呢個時候，雖然都仲係未落繩釣魚，但係細表妹同阿細佬好明顯就情況有所改善，回血不少，起碼細表妹已經識得用把口黎回應我地既動態了。呢個時候阿力高又話感覺到好似中魚啦，咁今次就肯定比條梳蘿大條既，起碼佢話感覺到有重量先丫，就係咁樣，一條良型石釘就上左水喇。好在我都唔輸蝕，好快就執返一條石狗；之但係跟住好快又輪到阿力高中魚啦喎，今次上水既係好味既沙鑽一條，佢食餌食到吞哂勾，本身我都想用個新買既釣魚鉗同佢「做手術」拎返隻勾出黎既，但諗下咁難得有魚開口食餌，都係剪左佢綁過隻、齊齊即刻釣魚搏多條好過啦。

就係我地前面開始有返些少景象時，入面既 B記也好像不甘寂寞，忽然間叫阿大表妹幫手拎撈簊；喂，呢種咁既粗重功夫就梗係等我黎啦，於是我即刻收絲放低我支魚竿走去拎撈簊然後漁童模式等候B記上魚；B記一邊收一邊都講話唔係好大條，就咁彈上黎都得，我就話既然準備左就無謂搏啦，我地魚又唔係多，又唔係忙緊釣魚，梗係用撈簊穩陣一些好啦。卒之條魚喺毫無環擊之力下就上黎見我地喇，斤裝沙立一條，不過不失咁啦。我笑住口即時同B記講話，趕住收工的確係有點唔同既，積極既一面彈哂出黎，哈哈。大家見到咁既場面，梗係即刻打起精神落餌作釣啦，竟阿細佬都立刻積極起來，唯獨阿細表妹呢個時候卻在沉睡，估計剛才暈眩時耗盡能量，所以需要補眠休息補充戰鬥力。諗住中完條立仔，好景會陸續有黎啦，點知卻又再是水靜鵝飛的格局，只是偶爾來幾條小魚，包括力高的一條良型黃釘，以及B記的一些沙立仔和石狗仔。而最勤力釣魚的兩位，即係大表妹和我，則卻是只有你眼望我眼地等待魚訊...

真係好少有我釣左成朝都只係得兩條魚毛，咁都算喇，連另一位主力戰將大表妹今日都好似時不與我咁樣，和我打成二比二平手，真係有點無奈。連 B記都話呢個水流尾可能都要等到成點先會完，所以即使細表妹到現在仍然沉睡，都絕對無所謂、無損失；因為大家都係等時間過，希望過左呢段時間之後，情況會有所改善。

繼續等了有等， B記又繼續車出一點大海位，但係卻發現海底好多地方都比人「下了綱」(即是放下很長的魚線和很多魚勾，等待魚兒吃餌自動上釣，然後到時候就慢慢收起長長的綱線收割魚鑊)，所以我地唔單止魚就唔到幾多條，仲不時會釣到那些滿佈排口的綱線呢。所以都幾無奈，想釣魚就要釣排口，但係那些漁民早就把鋼線都鋪在海床的排口一帶，你話我地係咪好無奈喇? 但係點無奈都好，魚還是要繼續釣。這就是我們的戰鬥魂！終於唔知過左幾耐，我係感覺唔到魚訊既情況之下，突然覺得支竿好墜手下，咁於是就收線啦，支竿都頂到彎哂，B記見狀問我駛唔駛撈簊，我話唔駛啦，都無感覺，應該唔係魚黎，不過既然收到，咪繼續囉。就係咁樣慢慢一下、一下咁頂，終於比我收到上黎啦，原來咪又係勾到人地下既綱，不過唔同既係，除左條綱同埋勾，仲見到有魚已經食到入哂扣；咁B記即刻大叫話「阿Y快手，收割魚鑊！」咁我就第一時間將最近條魚收埋黎，原來係瓜衫一條，本身我仲諗住慢慢同佢解勾，但呢個時候B記又再三催促啦：「喂，打劫斬唔好嘆慢板啦」，於是我就即刻搵把魚鉗剪左隻勾拎左條魚就繼續收線向下條魚進發啦！今次係一條良型黑沙！即時剪勾架啦我已經，但係B記都仲係覺得我慢；無辦法啦，附近下綱既漁民隨時會出現架嘛，咁佢負責睇水把關，梗係最緊張果個啦！而就喺唔知咩時候，原本應該還在沉睡中既表妹呢個時候竟然出現左係我隔離仲幫手收線添喎，原來佢本身都補眠補到差唔多，差唔多想起身加入釣魚時，就聽到B記叫我快手一點，咁於是立即彈起身加入幫手了，咁於是係佢幫手之下我地又收多一條瓜衫了；而將呢條魚收割完之後，我地收多兩三條勾都唔見有魚，於是我地就決定暫停是次收割了，費事比人點左相就無謂啦。無啦啦執多呢幾條魚，即時無哂壓力。因為再加上本身既斤裝沙立同埋幾條瓜衫，基本上我地今晚餐飯既魚鑊已經夠哂啦。點解咁講呢? 因為今日出發之前，我屋企同阿表妹屋企都知我地去一齊釣魚，咁於是佢地就話不如一齊食飯啦，咁既然又一齊食飯，又不如再搵埋我阿婆同阿姨打麻將直落食晚飯啦，所以今日我地既任務就係要搵魚比成圍人開餐！咁而家基本上都夠食了，所以壓力即時減輕唔少，係差煲魚湯姐，咁應該唔難既，餘下既時間我地努力釣下魚仔，一人釣多兩三條都應該夠煲了。咁於是即刻叫阿大表妹發個短訊比阿媽，通知今晚餐飯既魚已經有著落，唔駛去街市買魚了，哈哈(誤)。

細表妹訓完一覺終於感覺好多了，面色亦都紅潤返不少。佢見我地咁開心，食返少少野就重回我地行列啦。而事實除左佢訓返一覺補血成功之外，個海面情況的又且確又真係靚仔返唔少，所以本身唔多舒服既細佬同埋不停打嗝既我都已經滿血回復，格外精神。而阿細表妹可能真係屈左太耐有點能量滿瀉，返寨之後第一個上魚既就係佢，之後仲要快快手就起多幾條魚仔。我都只能無奈地望住大表妹慨嘆呢個世界唔係多勞多得既，我倆一直默默耕耘了一整個上午，但係所得既成果卻迅間就比細表妹超越了，所以都係果句啦，好波不如好運。不過機會始終都係留比有準備既人，爛船都總係會有三斤釘既；就算大魚唔理我，都總會有魚仔會光顧我既，所以我都終於起返幾條魚仔，為我地要飲既湯出返幾分綿力。

釣下釣下，細佬既魚絲又同我地幾位打哂大交，咁大家都要一齊收線解解佢咁啦，不過呢個時候我地就收埋一條魚上黎喎，咁究竟係邊個既呢 ? 最後憑住隻勾，我地發現條白頸係屬於細佬既。我地就講笑咁話細佬今日釣既兩條魚，都竟然係由其他人幫佢起上黎，簡直係神乎其技喇！不過我地都好希望細佬釣魚可以親力親為，自己感受到中魚同埋上魚既樂趣，所以都不時一齊為佢打氣呢。而終於皇天不負有心人，過左無耐細佬都終於成功起左佢今日第一條親手釣既魚- 雞旦惑，而事有湊巧地係同一時間佢家姐亦都中返一條古惑仔，再度營造出一個魚訊密集既假象比大家。講得係假象，咁大家都知道係咩一回事啦。就係咁樣我地一路釣到差唔多三點鐘，釣況都可算是乏善可陳，於是B記就提議車返去將軍澳對開既黑角頭試下運氣，咁反正今日我地都已經無欲無求，就淨係想啖湯再煲得濃一點，去邊度都無咩所謂啦，早點返去，也可以方便B記早點收工，於是我地就繞繩離開呢個永遠都充滿著無限可能、不過今日卻未盡發揮佢潛能既白石角啦。

諗住返到入黎黑角頭都係揸下流攤，殊不知都有些魚仔釣下，不過同時間亦都有好多不速之客 - 雞泡來大咬。最誇張的時候我地試個作釣的六個人可以同一時間有四個人中魚都是雞泡，剎那間彷彿全海都是只有雞泡魚一般，令人無奈。不過係呢度，除左我執返幾條石狗、池仔同埋狗棍之外，阿大表妹都終於再度發市，仲要連續起返幾條魚仔，總算係嚟返個尾段小爆發。我又真係好欣賞佢既態度同埋正能量，釣足全日，中段時間一直都無魚訊無魚穫，但卻從不抱怨或放棄，只會不斷默默堅持，呢一點真係令人敬佩，小弟都自問絕對未有呢份有耐心同埋恆心。就係咁樣大家尾段黎到呢個釣點都執返幾條魚仔，相信我地今晚煲湯絕對夠哂味道有餘啦，咁我地都無謂阻礙B記去參加佢母親既壽宴啦，於是我地決定打道回府，完結今日既釣行。

總的來說，今日魚鑊雖然唔算太多，但除左大魚之外其實每條魚既份量都比上次霧鎖維港齊爆狗 https://yy08.pixnet.net/blog/post/106354723 為大，而且大家都係玩得高興既；當然如果唔係有三位人士(包括我)中途曾經暈船，相信歡樂聲同埋魚鑊都會再更加多一點。之不過我地都已經非常感恩了，今日既天氣其實都算係非常不錯；雖然有點熱，但總算無風無雨，否則我地既情況可能會惡劣不少。而同阿表妹們以及力高這班朋友仔出海釣魚的樂趣則是永遠不會只有釣魚，仲會有無限零食同埋歡樂聲伴隨，絕對會係快快樂樂的一天。希望不久將來我地又再可以再度一齊出海釣過夠本啦。

早晨啊 B記！

塗防曬乳是必不能少的步驟

大表妹中瓜衫

人同魚合個照先啦

幫B記撈完條沙立梗係要同佢影相留念啦

點知佢又唔肯上鏡話要搵個女士代佢影喎

咁於是佢就揀左力高代勞喇

力高條沙鑽

力高示範好波不如好運既又一傑作

兩姐弟同時中古惑仔

細表妹回血之後即中石釘

我條煲湯魚 - 唱歌婆

大表妹標尾會中返條沙立