疫後友緣再聚青山灣

日期: 08/17/2022
農曆: 七月二十
地點: 機場、屯門一帶
艇家: 山歌仔
釣友: 芒果仔、阿賢、華仔、YY
天氣: 初時晴、其後大驟雨、東南風4, 5級
水流: 慢流、水質一般
釣穫: 青斑 x 1 (三斤x 1) 、目黃 x 1 (兩斤) 、什魚幾斤，埋單十斤

是咁的，話說阿Y上個月就同阿濤去左長洲尋倉巧遇多樣性魚種 https://yy08.pixnet.net/blog/post/106493563 釣魚，咁阿濤雖然條片就仲未上好，但阿恆就好快手咁已經剪好左片並放埋上網了。咁唔知過左幾多日喇，芒果仔突然就係我地個訊息群組入面放左阿恆條片上黎話見到我喎，仲話我中魚唔駛龜喎。跟住吹多兩句佢就話約左山歌仔去釣魚，問我去唔去；都唔駛問幾時同釣乜我就同芒生講話我去，定左期有左資料話比我聽就得。跟住第日芒生就話已經約好左山歌仔同埋夠哂人，都係我地訊息群入面囓隊友。咁問佢要準備咩架餐就話都未定，過幾日再問山歌仔喎。跟住過兩日又收到芒生電話就話山歌仔都係車機場三跑、沙洲一帶，叫我地準備8磅、20磅魚絲各一副，而鉛就輕啲用5至20克已經夠喎。計畫行程就主力蝦仔同虫、搵下立呀沙鑽，然後到最後收工前釣幾寨頭蝦睇下有無粗野。

架餐就講完，跟住芒生就話果日又會買一板啤酒去，好似幾年前打龜龜群聚港珠澳暢飲獅威 https://yy08.pixnet.net/blog/post/106268932 果陣咁，而佢另外仲會買兩支白酒帶比山歌仔返屋企飲。總之果日就係諗住輕輕鬆鬆有酒飲，有魚釣，有水吹咁啦。但係作為地獄黑仔王個朋友嘅我，真係有時都唔到你唔信邪；揀好日子去釣魚，點知出發前果幾日天文台就改左天氣預測話會吹到成5、6級風仲會有雷雨，咁我地唯有取消延後擇日再戰。喺比阿芒生笑我邪門嘅時候，我地最後就揀左之後個星期三，架餐不變，不過作釣時間就由原先下晝3至9 改為 1點上艇。咁由於改左期，有原定隊友去唔到，咁我就問芒生可唔可以帶個朋友仔去，佢話無問題於是我就將阿華仔叫上了。

出發當日，真係久違青山灣了，連而家上艇方便左、有個小碼頭都唔知添。等齊人上左艇，喺車去釣點嘅途中，芒生就問大家玩唔玩大魚獎，咁梗係玩啦，位位夾夾50，反正我都當跌左嘅，只係有個動力同埋多個吹水嘅回憶咁都已經值翻哂喇。不過大魚獎係唔受埋山歌仔玩嘅，因為同佢玩基本上即係輸左九成，所以大魚獎當然都係我地四個嘅牙骹遊戲。

話咁快就黎到機場三跑，山歌仔就講比大家知話個釣組最好上下兩門勾，上面細勾啲勾蝦仁，下面就可以勾蝦仔。我用竿就慢慢開竿同綁架餐，山歌仔就已經拎左魚餌就開始作釣，不過我都係啱啱綁完架餐，餌都未落，佢地又未有魚中嘅時候，就已經見到海事處隻船埋黎趕，話機場範圍唔比釣魚，咁我地唯有走位車遠少少釣，其實都係三跑果頭，不過應該就唔係果啲特別禁區度咁囉。

身為青山灣林峰，釣魚又叻，開齋嘅係山歌仔都可以話係基本操作。話就話係釣咩立仔、沙鑽，但係山歌仔一中魚果下已經話即期去到邊都見到佢地，咁即是黃立倉仔一條啦，上到黎，都係手板大細，比我上次長洲外釣果堆大少少咁囉。釣左一陣，都無乜口，可能魚仔細細，食極唔到釣，雖然山歌仔都跟住起左一兩條連米，但係跟住佢都係話轉位。然後就同我地講話要用細勾，去釣沙鑽咁，上面繼續蝦仁，然後下門勾就用青蟲。我都未開齋就已經要轉釣組，即時換個隻細勾同埋重少少鉛釣。

話就話釣沙鑽，但係山歌仔釣上黎嘅第一條魚仍然是連咪，而我地大家都有魚訊，但係就都好似好奇怪咁好細口食極都無得起手；終於我有等到一下食餌好似抽得，然後一逗、上到水一睇，竟然係一條泥鯭比我打中身勾上來，真係算佢唔好彩。老山上左幾條連咪之後，都終於搵到是日第一條沙鑽了。阿賢都以一條沙鑽開齋，而芒生同華仔則繼續掙扎。返寨途中，華仔問山歌仔可唔可以唔用細勾，山歌仔就話其實魚都仲得，但係釣沙鑽就真係要細勾，如果唔係都好難搞。咁我就睇下華仔隻勾，比我用緊果隻又真係大，咁我就即時比左隻細勾佢，叫佢快手換完快啲釣多幾條魚上黎開個齋先。雖然唔密口，但山歌仔繼續有連咪有沙鑽，而我呢個時候都抽到條似無還有嘅魚，原來係一條油立仔，唔怪得大家釣極都唔到釣。

大家繼續釣，山歌仔同阿賢繼續都有釣到連咪同沙鑽，呢個時候芒生都終於有條連咪上到來，點都好，都叫係開左齋先，就係剩返華仔；可能係因為佢副繩粗吧，事關佢真係好少玩手繩，除左同我和阿鴻入櫃勾頭蝦時係用粗繩之外，其餘時間佢都係用竿，所以勾蝦仔玩手繩都應該算係初哥。佢甚至連幼繩都無，是日都係用緊副20磅。雖然我有話可以比副8磅10磅佢玩，但係佢話用住20磅感覺實在啲，咁就一於比佢試下先囉。呢邊視佢有佢掙扎，果邊廂我就有魚食餌，一食一逗，會走水喎，應該都係小倉倉子，不過用支 Abritz -m150 玩都已經爽到些少；反正又唔係大又唔怕佢甩同斷，就慢慢嘆住咁上魚，見到魚影，輕輕一彈，幾両黃立倉上水了。跟住大家都有唔同嘅魚仔中到，然後突然我有一口食餌一逗就係咁走水，睇個勢似係大條過之前上來果啲些少嘅黃立倉喎，咁就一於嘆魚慢慢玩啦；單手控住支竿轉左幾下終於見到魚影，果然係黃立倉仔，不過點解有兩條嘅? 原來我中果陣條魚走水攬埋隔離阿賢條繩，而佢都應該係有魚食埋來中埋，咁我中左佢就由得我玩，所以變相我就一個人爽哂兩條魚，唔怪得我心諗點解咁鬼好力嘅呢！

繼續作釣啦，今次終於見到掙扎中嘅華仔有動作，見佢抽魚跟住上魚又話會少少走水，都估係黃立倉架啦，點知上到嚟，原來係雞籠倉一條，就係咁，全員都開哂齋了。跟手大家都繼續有魚仔食餌，除左剛才所提到嘅沙鑽、連咪、油立、黃立倉等，仲比我同山歌仔都各自執到條幾吋黑沙仔，即時我就話可以拎返屋企魚缸養了。除此之外，我又中多條黃立倉喎，今次走水嘅力比之前嘅大翻少許，嘆完魚上到水，都差唔多有成半斤重，算係今日咁多條倉倉子入面最大條嘅了。唔通我可以憑呢條魚而贏得大魚獎? 唔好啦，望都望全艇有人可以中到撈箕魚啦。

釣到呢個時候，話釣沙鑽但又唔算多，山歌仔就叫繞繩走位；跟住到釣點，佢就同大家講話呢度可以勾返蝦仔，搵人勾頭蝦都得，如果無人勾就佢勾咁喎。咁於是我就下面勾沙蝦，上面勾青虫，睇下有咩食埋黎啦。一路釣，我地其實都一路睇住啲天氣嘅狀況，事關九龍其實都應該已經落緊雨，望過去遠處荃灣果面其實個天都暗哂，山歌仔都話新界北果面都已經落左好耐雨喇，但係我地機場呢面都仲係無雨落，望去沙洲果面更加係陽光普照，彷彿就係另一個平行時空既世界咁。不過點，魚都係繼續釣，而首先有魚食餌嘅係我喎，食埋黎一抽，肯定係石口魚仔來，上水見魚影，三四両芝麻斑一條，咁就梗係貢獻比山歌仔個魚排仔啦。魚唔算密口，都係間唔中先有一條半條魚仔釣到，大家都係吹水多，芒生就講緊遲下有機會要搞返轉外海中班團咁，聽到華仔非常有興趣。魚唔密口，咁梗係督下手機啦，跟住呢個時候華仔就話見到山歌仔忽然放低部手機，揸住副繩聽餌，然後帶一帶手繩，跟住就一抽，然後講左聲「撈箕」，跟住頂、收咁一手一手咁上；因為水淺，好快就見到魚影；喂，唔錯喎，一條兩斤幾接近三斤嘅青班就上左艇了。山歌仔仲笑笑口講話成日都係要分心做住第啲野、玩住電話先有魚食餌，於是我就話一於等我都玩住電話黎釣魚先，睇下會唔會又有魚中。

不過跟住有魚中嘅係玩緊電話嘅華仔，雖然唔係咩大魚，卻是總有一條在佢左近嘅小芝麻，同我剛才上水果條差唔多。咁就啱啦，齊齊去山歌仔個魚排仔度長大啦。一路釣，都係繼續望住遠處啲雨雲同埋聽住天氣報告，山歌仔都話唔知可以挨多幾耐，但應該最後都係會打到過黎架啦，因為呢個時候雖然沙洲仲係超晴，但係北區已經出哂水浸報告添，所以我地打水戰都只係時間問題。唯一望就係望大雨前睇下會唔會多幾口食餌先啦。跟住都係有啲魚仔上吓釣咁啦‧但係都係無睇頭。而終於，「期待」已久嘅雨雲呢個時候都終於殺到，芒生問一問山歌仔轉唔轉位去避雨定點，山歌仔話繼續係度水戰搵下有無條頭魚釣；就係咁樣，雖然都叫有個天遮，但係我地之後呢個鐘都係一路濕住身咁作釣，可惜釣況都係好疏口，但係既然濕左個頭，就唯有繼續落去，不過雨戰左成個鐘都無乜睇頭，於是山歌仔就叫我地繞繩、離開機場一帶，往屯門方向駛去。

本身我仲係度諗緊山歌仔會唔會車過踏石角碼頭果面邊釣邊避雨，不過只見山歌仔都係直劈內河碼頭個內駁位，我就同華仔講，唔駛諗啦，勾頭蝦啦，呢度都係搏下紅鮪同斑架啦，同埋時間都唔係多，都成五點幾，而家唔搏、更待何時!? 即刻拎左副10號繩出黎綁隻2/0鉤，揀隻生動大眼仔就勾落去作釣了。呢個時候全員都已經轉哂釣鉈勾頭蝦了；釣左一陣，雨勢都已經大為減弱，不過就仲未有人有食餌；繼續順住流釣，流左去駁尾，雨都停埋，但係大家都係繼續守緊、務求有一口食餌出現，不過仍然未有動靜。

於是乎，山歌仔就叫我地收一收繩，轉為車去碼頭對住大海方向嘅果一面作釣。我見水流急左，都即時換左粒2號鉈，咁先唔駛行住斜繩作釣。勾得頭蝦，都係要守；不過邊有咁多魚食餌丫，釣左兩寨都未有魚食餌，於是我就拎部手機出嚟，邊釣住邊督機咁囉。學山歌仔話齋，啲魚總係最鍾意喺你唔得閒、唔專心嘅時候就食埋來，今次亦唔例外。就喺我「單手模式」嘅時候，突然一下重擊、直接就搶手袋咁，而我能做嘅，就只係條件反射咁樣抽起條繩抽到最高，然後左手趁右手仲未升到最高嘅時候立即就拋低部電話，跟住即刻出手去攬翻條繩做埋個收魚動作，再右手揸翻緊條繩慢慢收、頂；而我腦袋亦都空白左一片，淨係識得叫話「撈箕！」兩隻字，其實平時中魚都唔會咁快就叫定撈箕，通常都係等上多幾手等條魚離哂地，就黎見魚影先叫都未遲，但可能太耐無同山歌仔、芒山釣魚，再加上條魚嘅衝力都有返咁上下，所以我一邊頂魚嘅時候，一邊就刺激到只係識得叫撈箕喇。旁邊阿賢都話唔駛咁緊張同心急、慢慢黎，撈箕會幫你拎架啦，慢慢玩多陣先啦，收到上黎就會幫你撈架啦，咁我只好專心頂魚啦。嘩，條魚個力量真係唔講得笑，果下爆炸力都幾犀利，我最近釣魚仔都未有試過咁嘅力量喇，不過都絕對係可控範圍啦；始終十號繩，其實都係一手一手咁頂住佢就得，都唔係好駛點就魚，但個持久力都幾犀利，玩左幾手我都係未回魂，淨係識得講話條魚幾犀利，都係要撈箕。跟住山歌仔聽到，以為真係有咩巨物，於是就係後面快步行左上黎睇下駛唔駛幫手咁；我一心諗住會唔會係啲四、五斤海紅鮪啦，點知玩多幾手硬爆條魚上黎，一見到魚影，唔係紅色喎，原來係牛廣 (事後朋友話係目簧)，而且唔係大條，跟手山歌仔幫我輕輕一兜條魚，伴隨就聽到佢一個淡然嘅輕笑聲；咁又真嘅，得果兩斤零魚仔，雖然係銀色跑車啫，但係都唔駛大驚小怪、方寸大亂咁架嘛，今次真係雖然中魚但係霸氣盡失啦，哈哈。不過點都好，中左呢條目黃(牛廣) 我都叫做解鎖咗新郵票；同埋睇黎今日個大魚獎都有啲眉目了，事關所剩時間都應該唔會太多，同埋條魚都叫做有返些少重量，普通近裝魚都唔會贏得過佢呢。

一邊回味住剛才燒手嘅情境一邊繼續作釣，先至發覺剛才燒手了，然後食指的皮有點裂開了。山歌仔話咁係好平常啦，因為我地剛才打水戰濕左身同埋手咁耐，手指嘅皮都浸到淋哂，然後有條銀色跑車咁樣發飆、瘋狂走繩，燒手燒到手指損了是很平常的現象呢。唔理啦，損唔損手都好，鬥志都來勁了，幻想住仲會唔會有下一口食餌，可惜一路揸到完場結果都係再沒有一口魚訊了。因為我地釣多兩寨之後，芒生同老山都決定是日完場，而就係咁樣，隨住大家繞繩嘅果一刻，是日大魚獎亦都正式宣佈落在幸運的我手上了！大家一路執野，山歌仔亦都開艇啟程回航，我地亦都係度討論一定要搵日出去釣一次中班，不過呢個都係睇芒生之後同山歌仔約成點了。

總結黎講，今日雖然魚穫一般，但其實都幾乎合我地嘅預期，都係旨在出來聚聚舊，見下面、傾下偈、吹下水、緬懷一下、飲下啤酒、再順便釣個魚享受一下忘憂時刻，而我都喺幾年之後再次踏返上山歌仔嘅釣艇，亦都將華仔帶埋上黎；希望我地真係可以好似芒生咁講，黎緊入班季之後，搵到一日天晴、山歌仔又有期比到我地、即興出去外海走翻轉中班團見識一下吧。

已經面目全非嘅機場