平行時空爆釣維港

日期: 07/23/2016
農曆: 六月二十
地點: 維港東龍對出白石一帶、將軍澳對出一帶
艇家: B記、自駕四匹
釣友: 大細表妹、鯊魚、YY；阿丹與舅仔
天氣: 全日陽光普照西南風 3-4級
水流: 生流尾、水質不俗
釣穫: 細鱗 x1 (3斤) 什魚一堆；紅蕃 x1 (斤頭)、星鱸 x1 (半斤) 爆池& 花膠池

是咁的，上星期同阿丹爆釣完4匹仔之後，大家心癮難耐可以點算? 唯一解決方法咪就係只可以再去釣過囉。咁另外其實之前一直都同表妹佢地講開話想覆桌釣維港，不過之前一直就唔到時間，但係難得早幾日大家家庭聚會食飯見黎緊個星期6都得閒於是就提議話不如去搵B記啦，咁我就話一於等我第日打比B記問下有無期啦。好啦咁第二日同阿鯊魚去開街踢波講起話去釣魚，佢話上次釣唔到大魚今次想去覆桌睇下有無好野咁我話得啦預埋你，咁本身我諗住搵埋阿丹一齊，但係佢舅仔喺睇完我同阿丹嘅七年之癢爆釣四匹 https://yy08.pixnet.net/blog/post/106356769釣行之後又話好有興趣想參加；而我左計右計人數都超出左B記一隻艇可承受既載客量，咁無理由要有人掃興的嘛，於是就計劃左今次呢個「破天荒、劃時代」嘅平行時空、在同一個天空下兩艇齊釣維港嘅釣行了。

有計劃就即刻實行，打比B記要左個期之後就梗係去準備架生，由於大細表妹同鯊魚都無架生，即係意味住都係我去準備好哂比佢地到時用就得啦；而表妹佢地就負責小食部，即係當日的零食呀、生果呀、飲野呀就佢地負責，咁樣分工估作都幾好架，更似一個團隊嘛。咁我原本諗住去買返兩個新手碌、入返堆鉛就夠啦。買好哂架生再買埋蝦仁返到屋企準備醃時打比B記問下最近釣況如何、同埋當日要預備幾多魚餌時，佢就講話沙蝦仔唔好揀太細隻，揀返堆起碼有手指尾大細嘅沙蝦仔，要黎捕鱗同沙立，似乎預示著當天有什麼事情將要發生。而另外佢仲講話最近雞泡猖獗橫行，很多無辜釣友都一堆堆鉛被打劫了；而最可憐的那位更是在中魚後，收了幾十尺準備要用撈簊的時候，被雞泡無情的在水中剪絲，連魚帶上幾十尺魚絲統統煙消雲散，剩下的，只是那位無奈的釣者，空虛地對住大海喊著「為何要這般對我!? 讓我歡喜讓我憂...」所以，叫我準備定多些魚絲同鉛，以防當天會被剪到片甲不留之後無架生可用。聽到咁令人既驚且喜的消息之後就梗係唯有再次出門過去香港仔補給多副手繩同入多些鉛啦，事後證明真係好彩無慳呢程腳骨力，唔係真係到時都唔知係邊個要讓比其他人釣了。

另外，阿丹同舅仔亦計劃好左當天出動4匹仔去爆池；咁舅仔之前係初心者，未有自己架生，咁既然而家都覺得釣魚好玩，開始中毒的情況之下，就梗係適當時候入手置返套私伙架生。於是阿丹就同舅仔買完架生之後亦都買定蝦仁返去醃製了，佢仲特登係魚具店買左支醃蝦專用汁呢。

出發前一日同鯊魚去完沙灘曬，搞到懶洋洋，原本鯊魚諗全用手絲，結果話反正出開黎，不如買支魚竿明天釣魚用，舒服之餘又唔怕大風吹到魚絲亂哂，咁我當然舉腳贊成，梳洗完之後我倆就過海睇魚竿去，最後佢都揀左支伸縮萬用竿，方便收藏在背包之中，便於攜帶。就係咁樣，打埋去釣具店訂生蝦，所有野都終於安排好哂，準備出發。

出發當天，一早起身就陽光普照，心諗咁早就已經曬到咁，真係等下出海要做好預防措施先得，執好野出發去釣具店拎埋生蝦就發短訊給各隊友以確定所有人員都起床無誤，跟住就坐車直奔上船地點嘉亨灣去。和大細表妹集合好之後就上艇過三家村等鯊魚了，而另一面的阿丹和舅仔則亦已差不多到達將軍澳準備拎艇出發了，而我地呢個平行時空釣行就隨住鯊魚哥同埋佢架爬山單車落艇的一刻，正．式．開．始！

由於是日天氣非常之好，唔太大風浪又無雨落，所以可以直奔出東龍出面一帶的大海位，所以我地經過差不多一小時鐘船程終於到達是日的第一個釣點 - 東龍背對出一帶。沿途其實我都一直吹水一直綁架生，但係手繩又係我綁，魚竿又係我開，所以就算到達釣點時，我發現其實我仲係未綁好哂咁多副架生，所以我就叫阿表妹地落繩釣住先。點知率先落繩嘅大表妹底都未到就話唔對路，成副繩輕哂；嘩，即係比雞泡剪左絲啦已經。有無又咁快呀? 搞到本來想跟住落繩既細表妹同鯊魚都話要睇定點，等大表妹釣多陣無事先釣喎。咁我又終於綁好哂所有架生，就想睇下有無池魚釣，但係落左仕掛拋繩快繩左幾次都係完全無食餌跡象。而呢個時候阿大表妹開齋啦喎，原來係古惑仔一條，於是其他人都陸續落線。不過可能我借比鯊魚隻絞嘅魚絲顏色實在太過螢光，所以佢個仕掛第一口甩左條魚之後再落多一次就即刻成抽仕掛連鉛都被雞泡剪得一乾二淨！而B記其實較早前亦在後面都被剪了，所以我地決定走位避難，再車出一點到大海位試一試運氣，反正都係釣碎石底，不過呢度水深就更加深，成40米，真係收繩都收到手軟。釣左陣，細表妹都開齋了，小黃釘一條，而大表妹呢個時候又有魚上，原來係扯其立仔一條，仲要係勾身上，真係有點運仔咁喎。至於我同鯊魚，則仍然未有料到。我就叫鯊魚玩多陣仕掛，而我就試下用手繩睇下有無料到。不過可能鯊魚果支竿的魚絲實在太吸引，很快的我那副新綁的仕掛又再被雞泡魚剪到乾乾淨淨，咁樣我唯有叫佢暫時抖抖唔好再用果支魚竿釣住，要釣都釣住手繩先，不過佢就懶，所以就話休息一陣、飲啖茶食個包先喎。而我呢，此時亦因為大表妹頭先上完條魚仔之後副手繩亂哂所以就放低手上魚絲，走左去幫大表妹解絲啦。而鯊魚呢，食完個包之後就話唔忿氣話想試下用我支竿釣多一次，如果再被剪就先去釣手繩，畢竟今日其實我鉛都唔係帶左真係好大量，每人我都係預8, 9粒 (因為一個人拎哂咁多人份量其實真係好重架)，佢半個鐘就已經唔見左兩粒鉈又真係有點快，而且我鉈都係預每人兩至三粒，所以佢基本上個人子彈鉛配額都差唔多用完喇 (苦笑) 唔用仕掛，唔用果支竿，唔等於無事，雞泡魚仍然無處不在，而且好似繼續要針對佢，釣左都唔夠十分鐘，當B記話收繩返寨時佢收收下繩條魚絲就咁中水就比雞泡剪左，足足無左成七、八十尺，對於全隻絞上PE線得100米不到的魚線來說，唔見左成80尺真係可謂一個重創！咁樣魚就仲未釣到，架生就已經唔見左幾組嘅鯊魚又決定休息一陣先，反正暫時黑氣纏身，點樣努力都無用。

而終於同大表妹解決左果堆打結的魚絲，我都懶得再喺支竿度綁架生住，就用手繩釣起黎，但係魚訊本身今日就真係好麻麻，而且運氣亦唔係企係我一方，而觀乎情況黎睇，幸運之神應該暫時就係企喺大表妹後面，是關佢解完絲釣左都唔夠一排又釣返幾條石狗公了。而很快的佢又在其中一次收線的時候釣到我今日很想釣到的目標魚 - 花膠池，而且仲要唔算細條呢！一見到佢有花膠池釣到，我就立即收返起副手繩走去開竿綁仕掛，但係人地就單勾收繩到勾到，我就成排仕掛放落去都無料到，咁樣好明顯就知道咩的一回事啦，但係後悔都黎唔切，就係B記話收繩返寨時，我的仕掛都收到上水面了，但係就係呢個時候見到有條雞泡都追到上水面然後跟手就追住咬抽仕掛對上位置，只見佢跟住魚絲上到半空然後一咬，連魚帶仕掛的就跌回海中，而我那抽新開的仕掛又同鯊魚哥哥一樣，未竟全功就已經戰死洗場了。(哭) 於是我就同阿大表妹講都係等佢地釣多幾條池魚時我再考慮用下剩低最後的那一排仕掛。而又真係吹漲再吹漲，細表妹過左無耐都竟然中水中返條花膠池，彷彿牠們就是在向我示威著、彷彿命運就在作弄我。但其實我又沒有氣餒，畢竟釣魚就係咁樣，總有些時候是不夠別人旺的，何況以今天疏落的魚訊，我又唔係真係差得好緊要姐，佢地都其實唔係比我釣多好多，只不過平時習慣左老早開齋吧了；唯有繼續耐心等候較像樣的魚訊吧。反正鯊魚都仲陪緊我...咪一於齊齊攬炒住先囉。 (誤)

鯊魚始終比較喜歡用竿，尤其我地的釣場又深水而且又看到大細表妹都試過魚絲亂作一團而要費時解結；所以佢回左氣之後就拎起我支魚竿作釣了。剛開始的時候，和我一樣老是只有扯其立仔猛烈的電報攻勢，不過等等下我終於見佢抽了一下竿，然後就開始收線起來，而且看起來有點點重量，因為那個鬆鬆的磅頂在他收線的時候總是虛虛的因重量而出絲，所以我立刻伸手把他的磅頂調緊然後著他繼續收線，很快的一條手掌大的紅瓜衫就上來了！看到這次釣到的紅爪衫比上次出來釣的石狗公大上不少，鯊魚都話目標達成，齋已開，可以去訓一陣晏覺了。這當然替他高興，但係叫尚在等待開齋一刻來臨的我情何以坎呢。

我都一路釣一路同佢地講話釣咁耐魚好少到中午時份我都仲係未開齋，而且其他都已經開了齋，認真是較為罕見的情況呢。但係我又唔會意志消沉的，只會繼續努力...等待，不過時刻尚未到來而已。而呢個時候雞泡又開始多了，細表妹同阿B記都被剪，所以B記又決定車去大海位另一個排位碰下運氣。而車車下艇的時候，B記突然叫我地睇下前面海面上的那條魚死左未，佢話見到條金鼓浮下又沉下咁樣掙扎左好一陣子，叫我地睇睇未死的話就用撈簊把牠撈上。咁樣車到架艇埋條魚度睇到條魚未死得而且都仲好靚仔，即刻撈個撈簊輕輕一兜，大約4, 5兩重的金鼓就不勞而穫地來到我們的生倉了。真係釣唔到魚都撈返條魚先丫嘛。

中午時份望下個生倉，兩斤零魚三斤都未夠，心諗今日真係柯拔甩，不過急又急唔黎，一於無魚咬我我去搵野咬 - 食三文治好過。而鯊魚同阿細表妹呢個時候都敵不過睡魔的引誘，齊齊走左去搵周公玩鬥地主。不過佢地訓緊覺既果陣其實又真係無咩蝕到，阿大表妹都無乜料到，而我雖然終於都釣到石狗開齋同釣多一兩條什魚，但係較似樣的魚仔則仍然未見蹤影。

我地呢面就水靜鵝飛，咁阿丹佢地果邊又點樣呢? 我見咁靜局、B記又車緊艇去另一個寨口時間就發個訊息問阿丹佢地嘅釣況，咁其實見佢地成朝無乜點回應都估到佢地應該係幾忙住釣魚，果然當我問佢地嘅時候，過左一陣就收到阿舅仔用幾張相去回覆，第一張就係阿丹中條花膠池，和我們那條差唔多大，而另外那一兩張則是阿丹用仕掛中一串的池魚仔，大概一排6隻勾佢仲4, 5 條吧；咁即係示佢地又爆釣池魚啦，而阿丹就加多句話那些池魚都是在上次我和他爆釣的那個秘點度中的。如果就咁睇，上晝真係我地全艇大落後給他們兩個，估計佢地兩個釣埋的總重量可能比我們5個加埋還要多呢。

不過沒緊要，有釣未為輸；一日未叫收工，一日都仲有希望家嘛；而去到新寨釣左一陣之時，就在細表妹訓醒、起身問阿大表妹在佢訓左咁耐覺的時間入面，佢有咩好野釣到的時候，之前一路接近成個鍾都無乜料到的大表妹即時就有魚訊，一抽一拉，上水的正是紅爪衫一條，比今早鯊魚的　那條還要再大上半個頭的呢！真係可謂暫時的大魚獎得獎魚了。而細表妹則開玩笑的咁講話好彩有佢問一問大表妹，刺激到佢嘅士氣同運程先至令一路無魚的佢再度找回幸運之神的眷顧。而其實我覺得可能轉左新位有些少改善，我都除左石狗、扯其立同梳羅之外此時終於都叫做釣返條黃釘仔，雖然唔大條，但總算都係好開始丫；而鯊魚此時亦都休養完畢、宣佈回歸。而細表妹由於轉左位置到鯊魚原本的位置，即我的隔離，而大表妹就坐左出黎阿細表妹原本的位置，所以鯊魚就走左去艇內靠右面，即細表妹今朝的位置作釣。總之我則開玩笑咁講話地獄使者一起身就搞搞震走左過幸運之神大表妹那面坐埋一邊，即管看看誰的氣場更利害、可以壓得住另一方呢。不過佢地果面點樣「鬥」我仲未知結果，我地呢邊就即刻受惠啦，因為鯊魚一離開左原本在我隔離的位置之後，我好像一吐早上的污氣，起碼我釣完釣黃釘仔之後又再起多幾條石狗，雞泡撞唔到之餘，仲係呢個時候中到其中一種目標魚 - 石釘一條，而且都有成手掌般咁大條，以今日既釣況黎講我都覺得算係收貨嘅一條魚了。而呢個時候果邊鯊魚都有魚中了，佢雖然有點不滿意魚不夠大，但總叫也是石狗一條。而呢個時候佢就邊拎住條石狗邊講話訓左咁耐覺都可以追到同細表妹成績打成2比2平手，認真得戚。不過細表妹亦不甘展弱咁話佢都有去左訓覺，所以2比2唔係什麼咩特別，要決勝負就由這一刻開始吧。
大家的鬥志就由這番說話之後立即燃起；不過，被燃起的可不止我們，因為就在平行時空的另一端阿丹那邊，此時舅仔傳來了阿丹和一條魚的合照，不用細看也可以看得見魚，因為條魚唔係池仔，唔係紅衫，而係一條紅雞/ 假三刀！目測都有成13, 4兩呢，認真令人羨慕妒忌恨呢。不過咁樣反而更加成為我地的動力，因為我地都覺得呢個時候就可能係全日最有機會發圍嘅時候了，所以大家那團火就熱得更加熾熱起來。果然唔夠一陣間，今朝只有斷線、沒有魚釣咁滯的地獄使者鯊魚呢個時候再度中魚，上來是一條手板大小的沙立，絕對比那些五蚊銀扯其立來得強呀；而佢亦都係中完呢條沙立之後，在細表妹面前示威話贏左佢，因為佢暫時以3比2領先呢，氣得細表妹只有乾瞪他的份兒。
而中魚嘅真係唔止你同我，還有他們，說的是那邊的阿丹他們。呢個時候佢地又話中多條半斤重的星鱸仔仔，同幾條石釘仔，認真唔野小呢！就連細表妹都同我講笑咁問我係咪次次都係要成3, 4 點打後先會係釣魚黃金時間；而就係咁樣我地今日嘅釣行隨住魚兒的活躍程度突然有顯著嘅提升而宣告正式進入高．潮．階．段。

咁已經都叫做擺脫左終於頹勢而漸回正軌的我此時率先有一口石釘仔上水，然後後面B記都中返兩條牛秋仔，不過這些魚仔原來都只係為左接下來要出現的魚鋪定紅地毯而先上來報到而已。大家都在鬥志旺盛的釣著魚，就連一向懶洋洋的鯊魚哥自從訓醒左之後就唔知做乜事咁難得肯坐定定拎起副手繩專心釣魚，唔通呢個世界真係有氣場? 由於我坐個位的位置是直接望住鯊魚那邊的，而正當我同細表妹邊傾偈邊釣魚時，忽然望到鯊魚那邊有所動作，只見佢舉起個手碌好似想頂斷條絲，原來佢勾石了...啊，咪住(慢著)，咦，條魚絲扯得郁仲會反拉，好似係魚黎喎... 跟住我見佢個動作仲係用個手碌頂住黎扯條魚絲，我心諗如果係大魚就不妙了；以他這樣的手法、再加上那副只有8磅(約2號)的魚絲很大機會的會因頂不住那拉力而斷掉的！於是我放低魚絲就衝過去，伸手把他的魚絲拿上手「看過研究」，感覺一下是否真的中魚。唔上手都由自可，一上手我都未開始收繩，只不過是揸實條魚線，就已經感覺到魚線的另一端傳來強勁的爆發力！我即時不敢怠慢，小心控魚，等牠先衝一會，我才開始嘗試慢慢收繩；這時的我認真十分忙碌，除了釣魚，我仲要分配指示給諸位經驗尚淺的朋友仔：首先我想將戰場從艇內的位置轉移到艇頭出面好方便撈魚，但係叫他們幫我接住副魚絲再在膠簾外轉出去竟然無人聽得明我想怎樣做，好吧那暫時唔理呢個問題；而另外我又要叫在旁定了格的大表妹收繩，因為我怕我倆的魚絲會打大交而增加兜魚的風險；另外我在收左條魚幾手覺得能夠上魚的機會大增之後就叫他們準備撈簊，而我估計今次他們會因為上次霧鎖維港齊爆狗 https://yy08.pixnet.net/blog/post/106354723 那條石玤之後都應該有經驗了吧，再加上B記睇到咁嘅情況之後亦都立即上來幫手接過撈簊「候命」，這一部份應該算是最放心的了；而最後就是安排攝影師負責拍攝上魚片段了，而大家諗都唔駛諗就決定將這個重任交給身為導演的鯊魚哥了；我一邊安排好不同指令而另一邊就繼續同條魚搏鬥緊，而其實喺收左幾手之後都幾可肯定係火車頭了，我仲邊收邊同B記講話唔心急得仲要等多陣，條魚仲要衝多陣先可以收到上黎；不過亦就可以放心的說，雖然水很深，但係釣場就基本上無大石位，所以應該都無咩機會係會比條魚過石斷絲，而最難搞的頭幾手收魚條魚絲都無事、都頂得住，只要唔會倒霉到上魚途中遭受雞泡魚剪絲襲擊的話，這條魚應該都可謂係囊中之物。大約又收又放咁玩左5分鐘有多啦，終於見到魚影喇，條魚此時其實都差唔多謝哂皮、投哂降了；所以我輕輕一帶條魚埋黎艇邊時B記就往水裡的魚兒迎頭一插，一條三斤細鱗終於上水！大家都歡呼起來，鯊魚一直大叫住「我成功啦，我可以去訓覺啦」，而我則戥佢高興咁大叫話佢終於「揚名立萬啦」，而表妹地就在旁讚嘆著「好大條呀」，總之現場洋溢著一片歡呼之聲，全日的頹氣黎到呢度都可謂一掃而空！

中完魚大家精神就更加抖擻，怱怱影過幾張相後，大家都想趁住有黃金時段標返個尾會，畢竟這時其實都已經3點半有多了，要釣的時間都唔算太多，所以真係希望借勢起圍，搵多條魚返去一齊加餸開飯；因為其實早在是日出發之前，我和表妹們的阿媽都話如果今日有大魚釣到的話就有齊去「慶功」食魚呢。不過呢，細鱗暫時就搵唔到，但係就比細表妹起返條良型石釘，單就黃釘同石釘兩種釘釘黎講佢呢條可謂全日之冠呢！而我隔左陣、係返寨之後不久都中多條良型石釘，雖然唔及細表妹果條，但係我都好滿意喇。咦，講時講，講左咁耐中魚，好似好耐無提過阿大表妹喎? 呢個世界有些東西真係唔到你唔信邪，自從阿地獄使者鯊魚哥坐過過去幸運之神大表妹果邊之後，唔單止我即時破左龜氣，細表妹係呢面就算仍然唔係好多魚中但係至少佢係少左遭受雞泡攻擊。而坐佢隔離阿幸運之神就遭殃啦，即時被地獄使者的吸星大法吸走左旺氣，好長時間都無魚中無魚訊，反觀鯊魚自己就中左條「揚名立萬」火車頭；佢嘅神奇，真係唔係講笑，真的令我拜服啊。

餘下嘅時間大家都係一直保持住士氣咁樣作戰，不過好野就無再出現啦，而且雞泡又開始猖獗起來了，收繩上到水面時不是都見到有雞泡追到上來，而其實在艇尾的B記就已經遭殃了好幾次，連計全日都已經足足丟了一打鉛了，所以佢就率先收繩，同我地講話等我地釣埋呢寨就收工回程，畢竟由白石對開大海位車到返三家村同嘉亨灣都要成個鐘船程。而釣多陣都見魚訊減少之餘雞泡襲擊卻有增無減之下我都諗住收繩作罷，點知呢個時候都比我中水中條牙帶埋齋，算係攞返個尾彩咁啦。我地呢邊就係時候打道回府了，但係在同一時空下的阿丹他們則繼續奮鬥中，因為佢地嘅釣場比我們近岸，而且佢地的還艇時間是6點鐘，所以可以好像上一次我同阿丹釣果陣玩到5點半後先起錨回程；加上佢地今日釣況咁好，而且佢地果邊仲無乜雞泡魚，梗係繼續搏殺到最後一秒鐘啦。而佢地最後雖然都無乜執到咩特別好野，但係釘仔同紅衫都執返三幾條就係有嘅；再加上之前已經爆哂生倉的池仔同埋有條壓倉嘅紅雞同星鱸仔仔，簡直就係完全爆釣，滿載而歸！至於我地，總括黎講，今日魚訊其實就真係算係麻麻，魚仔都唔係點肯開口，而且雞泡又多(大大話話應該剪左我地總共廿粒鉛有多)，但係好彩就有架火車頭傻更更咁衝左埋黎我地度，好讓我地都算係有返條魚交差。而對於鯊魚黎講更加算係佢嘅第一條撈簊魚，雖然唔係佢親手上魚，但係點都叫係比佢中到嘛，梗係入佢數啦；如果唔係我見果陣未有貨壓倉、條魚絲相對一個新手挑戰條魚黎講又咁幼，我真係會放手比佢玩架；不過這些高危動作都係應該帶佢入魚場比佢學校下點樣上魚同甩魚啦，就好似之前我同阿表妹地去新手帶挈爆波叔 https://yy08.pixnet.net/blog/post/106144657 學習控魚一樣等佢地有個初步了解先，等出到海要實戰時心裡就有個底了；畢竟，在海釣場走魚和在魚場走魚係完全兩回事呢！不過點都好啦，今日天氣又好，唔單止陽光普照，仲算叫做有返些少海風吹下，加上流水又唔係好大太難釣，所以其實我都覺得今日算係幾好玩；而且幾個朋友仔又可以嘻嘻哈哈玩足一日，再加埋呢次破天荒的平行時空兩艇齊釣維港嘅新奇構思咁有趣，希望可以喺我再度踏上長征旅途前能夠玩多次先走人呢。 [完]

7
醃蝦汁

休魚期無赤米，唯有用中蝦